Psalms 40 - Ohiatonhseratokénti

Teiontenonhweratónkwa ne Nahonsaiontatewenni꞉ione o꞉ni ne Aterénnaient Nahiontatié꞉nawaʼse

Ne Raterenhnathentsátha. Né꞉ne Táwit raorénhna.

¹ Waʼkenikonkátste tsi waʼhiʼiateráhrate ne Roiá꞉ner; waʼtatʼtsákete nahatahónsathate tsi natekaséntʼthos.

² Sahatiatathatáko tsi iotʼtionwáʼien ne kenhé꞉ion, éhren sahatiatenháwite tsi nón꞉we ne ionesaronkówaks, tánon ostʼthenrakwenkaráke nón꞉we natonsahátʼtaste, tánon iahontsaníron tsi nón꞉we natonhsakatekháhaʼkwe.

³ Waʼhakerihónhnien orénhnase tahonsakeríhwaʼkwe, né nahowenhnáshon ne wáʼton Sewenhní꞉io tsi natesatenonhianíton. Iakotiokowáʼnen enhiontkátho kí꞉ken owenhnashónhas né enhiakoronhkáten, tánon né enhiakahónhnien nahontahonwéʼtakwe ne Roiá꞉ner.

⁴ Iakotáskats tsi nihiákon thonwetákwen ne Roiá꞉ner, iáh kahiatonhnishónhas tekonwaʼtihniahé꞉sen, khés niahonwaʼnatsatárahse tsi nihiákon ne kahiatónhni konwaʼtisénhnaiens.

⁵ Wé꞉so iorihwáke tsi niskwahtseráse, Ó Saiá꞉ner onhkaʼNí꞉io, iáh ónhka nahonsaiesaiérenhke! Wé꞉so ne iorihwanerakwahténions tsi nisatenikonhrónh꞉ni nonkwarihwáʼke. Iáh nonwénhton tatkwéni nakwékon akatróri, né꞉ne tsi niiawetowánen iáh ónhka taiekwéni nahiónhsehte.

⁶ Karihwiʼiosehokónhas tánon ne thènenh aiesatátʼtie iáh né thaʼtesatonhontsóni, iáh ne tesehrihwaʼnónhtons ne katʼtshénen kaiatakwékon akonwaʼtsatát꞉tsahate ne ietsienhará꞉kwahke khés ne karihwiʼiosehokónhas né éhʼren ahonsakahá꞉wite ne karihwáʼneren. Khèkhok, teskahontakarónhtons né nakonhiatón꞉tene,

⁷ tánon ká꞉ti watʼkherihwasehráko, “Kénʼen í꞉kes; thóh tsi nikahiatonsehrakweʼnónhni nón꞉we nihiontkhiatón꞉kwen.

⁸ Kenón꞉wes nahontakonhnikonhraiérihte, Ó akeʼNí꞉ioʼ ne sahianerénhsera akwerhiá꞉ne nón꞉we nikahiáton.”

⁹ Né tsi iakokʼkenhníson ne shonkwetaʼshón꞉has, Saiá꞉ner, Wakatróri ne karihwí꞉io tsi takwahiatanóns꞉taton. Saʼteriéntare tsi iáh nonwénhton takát꞉kawe tsi enkatroríheke.

¹⁰ Iáh tewaʼkerihwahséhton ne karihwí꞉io ne senhténhrat nakonháke; kwáh tiókonte tsi waʼkatrórih ne sarihwaʼtokentítsera tánon ne senhténhrat; iáh tewaʼkerihwaséhton ne iorihwaʼtóken sanoronkwáhtshera tánon ne sarihwatokentítshera tsi nòkwah ne iakhotsiokowánen iakokʼkenhníson.

¹¹ Tó꞉sa, Ó Saiá꞉ner, tashón꞉nek ne senhténhrat nakonhá꞉keʼ; ne iohrihwaʼtó꞉ken sanonronhkwáhtshera tánon ne sarihwatokentítshera tiotkonhónwe enwaʼtiatanonstsaʼtonhatiésehke.

Né Naterénhnaient Nahiontatiénawaʼse

¹² Né karihwahetkénsera waʼtewakatiatháton kwáh í꞉ken tsi iawetowáʼnenh í꞉ken; Nakerihwaʼnerahák꞉tsheras onknónterane, tánon iáh tetkwénies nahonsatkénhake; sénha né iawetowánenh tsi níkon waʼkenonkwiseró꞉te, tánon kanikonhróktha.

¹³ Tasarihwaʼiérik, Ó Saiá꞉ner, nahonsastiatáko! Ó Saiá꞉ner, tesasteríhen tatiatakènha!

¹⁴ Aiáwenhs tsi niháti ne ronteniéntʼtha nahionkenonwaʼrhiákon, iehiokonhthakwénhak tsi ronhwaʼtisénhni tánon tehonwananitonniáten! Aiáwenhs tsi niháti ne ronatʼtsenhnónhni tsi natewaʼkanikónhrahre sonwaʼnátʼtat tánon ronhwaʼthisenhnáksat!

¹⁵ Aiáwenhs tsi niháti ne thiʼhiontiéron ahonateronhiénten tsi nihonwaʼthisénhnion.

¹⁶ Ók aiáwenhs tsi nihiákon ne iesahiatísaks ahontonnárenh tánon ahonatʼtsenhnonhníhake shonháke; aiáwenhs tsi nihiákon ne ienorón꞉kwah ne senténhrat iaʼhiakokonhtakwénhak ahonhníron, “Tsi natehotenonhianíton ne Roiá꞉ner!”

¹⁷ Ók kíʼ ní꞉i waʼkí꞉ten tánon tekatkárias, ók kíʼ ne Roiá꞉ner iáh tehatiatanikonrénhʼen. Í꞉se natiatakená꞉tsera tánon takenonsthatonhátsies; tó꞉sa satenhnískwat, Ó akeʼNí꞉io.