Psalms 39 - Ohiatonhseratokénti

Né Naterénhnaient Natʼtokhátsera Tánon Nahonhsaiontatenikón꞉renhse

Ne Raterenhnathentsátha: Rahonháke ne Jeduthun. Né꞉ne Táwit raorénhna.

¹ Waʼkíron, “Enkatenhnikonhráhren tsi nikeweienhnó꞉tens né꞉ne tó꞉sa akeriwáʼnerake ne kenhnasáke ákatsʼte; enkatskwentóroke kwáh tsi nikaríwes ne iónkswenhs tiatákʼta rónhnes.”

² Sák tiwaʼkathatónhni ó꞉ni tatewaʼkátote; kwáh iáh othènon tekáton ók iáh kíʼ othènon tehiorihontákwen; Ók nakeronhiakénsera sénha waʼhosehráheste,

³ tánon né tahiónhni nahonkateroniénhten. Ne sénha né enkanonthónhnionwe, sénha kíʼ tekatatenikonhrá꞉ren; Iáh tewakʼkwénion nahonkatatiénenhke ne tó꞉sa othènen akerihwanónhton:

⁴ “Saiá꞉ner toʼnikaríhwes enkónnheke, Kát꞉ke enkí꞉heie; Tatró꞉ri toʼniʼiostóre tsi enkatonnóten.”

⁵ Tsi nió꞉re tsi kentʼnishónston ne tsi kónnhe, Né sahénton ne tsi kón꞉nhe kwáh iáh othènon thakénhake. Kwáh ónhte ne tsi iakón꞉nhe ne niatehionkwétake iáh sénha ó꞉ia tèhiot tsi ní꞉ioht ne tsi iahó꞉te iahiontónhrie, Selah

⁶ iáh sénha ó꞉ia tèhiot tsi ní꞉ioht nahiotasátarake. Akwékon tsi nihatiéra iáh othènon tekéntons; raʼtateroróhki natsokowátsera, ók iáh tehoteriénhtare ónhka ienhiakohiatáheste.

⁷ “Tánon nónhwa, Saiá꞉ner, asèken onhnahó꞉ten tsi waʼkerá꞉re? Nakarahrátʼtsera í꞉seke nón꞉we niká꞉ien.

⁸ Akwékon saskeniákent tsi nòkwah nakerihwanerahát꞉tseras. Tánon tó꞉sa sehríhon nonhowaʼrohrihtashónhas ne tahiontiéron.

⁹ Kwáh sák tiwaʼkatatónh꞉ni; iáh thatekakʼkwékshions, asèken í꞉se ehʼnisá꞉shon kí꞉ken tsi niwaʼkerón꞉hiake.

¹⁰ Tó꞉sa sénha ishiʼnónhwe natatré꞉wat; ó꞉nenh thó꞉wa akíheʼie tsi niskatianaiahát꞉kons.

¹¹ “Sehiatewenhnaiéntons nonkweshón꞉has tánon sehrewáʼtha tsi nihontséra ne kariwaʼhét꞉kens, tánon tsi ní꞉ioht ne kokhó꞉wa sehiathonténhnis tsi nahoténshons ratinorónhkwaʼ Kwáh í꞉ken ne rón꞉kwe tsi iáh sénha ó꞉ia tehahiatóten tsi ní꞉ioht ne iahó꞉te. Selah

¹² “Satthóntek nakwahterénhnaient, Ó Saiá꞉ner, tánon satahón꞉satat tsi natekaséntʼthos; tó꞉sa ne iáh othènon karíhwa thashónhniane natkashíʼri Asèken kwáh nék khók tsi waʼkatohestonhátsie tsi waʼkenataré꞉nen, thiwaʼkonhontsiáte, tsi ní꞉ioht ne khesotʼthonkonhkénʼen.

¹³ Tó꞉sa ó꞉nenh séhkon thontakatkenhsehrénhten né nahónton ahonhtiénhtahne nattsenhnonhniátshera, nohénton akíheie.”