Psalms 38 - Ohiatonhseratokénti

Ne Tiontateriwastáni ne Iakononhwatʼtani Ieriwanónhtons Nahonsahionkwatáko

Né꞉ne Táwit raorénhna, naʼweiahwarátshera tieiéstha.

¹ Ó Saiá꞉ner, tó꞉sa sanakwahtserákon takatewenhnaʼiéntonf, khés nasetʼréwate sanakwahtserákon.

² Asèken ne saiénhkwires waʼtewatiatáweʼheste, tánon ne sahtshanáke waʼtewaknhiotháko.

³ Kwáh iáh othènen tetsoiánere ne tsi waʼkewárare; né waʼkarihónhni tsi nisanakwénhen; kwáh iáh tetsotakárihte ne tsi wastsientarónhnion né thóh nakása tsi niwaʼkerihwáneren.

⁴ Asèken nakerihwaneraháktsera iohtón꞉iohte sénha tiót꞉the tsi nitewakenonhtsistó꞉hare; né꞉ne iohrieniáhste só꞉tsi hiókste né tahiékwe.

⁵ Tsi niwaʼkatʼkarewahthánion tahionákwen tánon ó꞉ni waʼhót꞉ken tsi niwáʼkeras ne waʼkarihónhni tsi nikenáiekwe;

⁶ Naʼkeronhiakénsehra thóh nió꞉re tsi ionón꞉watʼte iáh tesetkwénies nahonsakatʼtakwaríhsi tánon katonhriót꞉ta; kontatséshon tekaséntʼthos tsi shí꞉ken ní꞉ioht nón꞉kak iakotsiónhnion.

⁷ Kwáh í꞉ken tsi wakitonkwáros; kwáh í꞉ken tsi waʼkenonwákʼtani.

⁸ Thóh nió꞉re tsi waʼkenonwákʼtani kwáh iáh othènen teskatthókas; waʼkonhséhna né tsi niwaʼkeronhiáken.

⁹ Ó Saiá꞉ner sateriéntare tsi nahó꞉ten tewakatonhontsóni; akwé꞉kon satthónhte tsi niwaʼkonhsèhna.

¹⁰ Tewaʼkerhiashiʼshón꞉kwa, katesatstenhserók꞉tha; tánon iáh tesetkarí꞉io.

¹¹ Nakateroshónhas tánon ne teiakwahnonsanekʼkhánions iáh tiaták꞉ta tenonnètha, tsioríhwa ratitsánis nakhehiathenhrá꞉ro.

¹² Tsi niháti ne rónh꞉nere nahionkenonwarhiákon, ronhteristaienhá꞉tons nakerihwáʼke; tsi niháti né꞉ne ronnésaks nahiontkaréwate né rotiʼtharákwen ne kaʼkaronhniátsera, iáh tehontkáwas tsi tehionkaskohtháhnis.

¹³ Ók thóh nitiatóthen tsi ní꞉ioht ne tehahontaʼkwékon iáh tewaʼkatthónte; tsi ní꞉ioht ne iáh tehatátis, iáh tehakwénies ahatáti.

¹⁴ Oriwiʼiohónwe, kwáh thóh nitiató꞉ten tsi ní꞉ioht ne iáh tehothónte, tánon iáh tehakwénies né tahathaterihwakénase.

¹⁵ Ók kwáh kíʼ í꞉se Ó Saiá꞉ner, konrá꞉re; kwáh í꞉se, O Saiá꞉ner, tenskerihwaʼserákwahse.

¹⁶ Asèken waʼkaterénhnaien, “Nék khók tó꞉sa sehríhon ne iónkshons nahontatiatanerákwahte ní꞉i thóh nát꞉sa, tsi niháti tehonataterénhsaron tsi nihionkát꞉konhte nó꞉nen waʼkateraswaksénhon.”

¹⁷ Asèken ó꞉nenh skanó꞉ronks atiatiénenhne, tánon iehiokonhtákwen waʼkakararénhsehrons.

¹⁸ Kerihwaʼnírats nakerihwaneraháktsheras; waʼkonhniénhnis nahonterónh꞉ne.

¹⁹ Tsi nihá꞉ti ne tsi ronhnónnhetse ne iónkswenhs kwáh í꞉ken tsi ratishástste, ronatsiokowáhnen ne iónkswenh né꞉ne kwáh iáh othènen tetsiorihonhníhon.

²⁰ Tsi ní꞉ioht ne ioiánere tsi nahionkatiérase karihwahetkénsera tionkátsenhse; hionkát꞉konte tsioríhwa tsi kateniént꞉tha ne tkarihwaiéri tsi nakátiere.

²¹ Tó꞉sa kíʼ takatewénhtet, Ó Saiá꞉ner; Ó akeNí꞉io, tó꞉sa ahí꞉nonh nió꞉re taséhset tsi nón꞉we níkes;

²² tesasteríhen tatiatakéna, Ó Saiá꞉ner, í꞉se natiatakenhatiéra.