Psalms 32 - Ohiatonhseratokénti

Ne Natʼtsenhnonhniátshera Nahonsahiontatenikonrénhse

Né꞉ne Táwit raorénhna (Maskil).

¹ Iakotáskat tsi nihiákon nakorihwanerahák꞉tsera kasnikonhrénhen, nakorihwaʼnerahák꞉tsera skarakéwen.

² Iakotáskat tsi nihiákon né Roiá꞉ner tsi iáh othènen tatehsesakoráhwi, tánon ne tsi iakónnhe kwáh iáh othènen tekáien ne kanikonhráhton.

³ Tsi náhae thatewaʼkátote, nastsienshón꞉ha ioiesahonhá꞉tsie kwáh onkenonwaktáthen ne tsi natʼkaséntho konhtatsekówa.

⁴ Tsi niwenhnísehres ó꞉ni tsi niwahshóntes tsi wahsekrehwahthe, Saiá꞉ner; kwáh iáh othènen teséts꞉thakwe, kwáh tsi ní꞉ioht notsítsa tsi wastátʼthens nó꞉nen kwáh iorakwahtaríhen nakenhnáke nikaháwi. Selah

⁵ Eʼthóhʼne káti wahkerihwahnírathe nahkerihwahneraháktsheras nisèke; iáh tewaʼkatónhniʼen tsi waʼkerihwanerenháskon; Waʼkhíron, “Kwáh kíʼ enkerihwanírate nakerihwanerahák꞉tshera rahonháke ne Roiá꞉ner,” tánon saskenikónhrenhse tsi niwakeníkon nakerihwanerahák꞉tsera. Selah

⁶ Éhʼtho Ká꞉ti kwáh rahtikwékon ne rotirihwahtóʼken shonháke iehonterénhnaien; nó꞉nen thén꞉ne teonahtón꞉hontsoni, né nó꞉nenh ionekát꞉tsani entewe iáh tiatahʼiakohiatónhko.

⁷ Í꞉seʼke nónwe nikatasehtákwah; í꞉seh teskénes nó꞉nen thén꞉nen tekanikónrahʼre. Ioʼwènhthe tsi kerénʼnothe tsi nó꞉kwa ne sahiatakenátsera, tsoʼríhwah tsi í꞉seh teskénes. Selah

⁸ Kwáh kíʼ enkonhrihónhnien tsi nihiohahó꞉ten asatʼthahíta; Í꞉ih enkonrihónhnien tánon enkonhiatenhnikónhron

⁹ Tó꞉sa iakosátens tahonsehsewaʼtsérenhke khés ne tewahóntes, né꞉ne iáh othènen tehotinikonhrahiéntas, né nenhʼné꞉e ónenk tsi waʼteristanonhtáhas khés natkonwarotharók꞉tha enthoniniarotaróhke, tó꞉ka iáh kíʼ tsatákʼta thanésehke.

¹⁰ Ne ionkwetahétʼken onén tsi enhatironhiáken, ók ne iorihwató꞉ken kanoronhkwáhtsera ne tehiakotsatháton tsi nihiákon ne tonhwethákwen ne Roiá꞉ner.

¹¹ Satʼtienhnonhníhak rahonháke ne Roiá꞉ner tánon sewaʼtonhnáhren, Ó titionkwetaiéri, tánon tesewahénrent natienhnonhniátshera, sewakwékon ne tsi sewahtewenhnaráhkwah.