Psalms 20 - Ohiatonhseratokénti

Né Naterénhnaien Natesenhniétshera

Ne Raterenhnathentsátha. Né꞉ne Táwit raorénhna.

¹ Aiáwenhs ne Roiá꞉ner aiaienáwase nó꞉nen tenhsanikonhráhren! Né raosénhna ne Raoní꞉io ne Jacob thiá꞉ne!

² Aiáwenhs ahontahiateniénhten ne kaienawaséhtsera né꞉ne raononsatokentikówane nón꞉we nahontáwe né꞉ne tsi tionontáhere ne Zion nón꞉we.

³ Aiáwenhs areiárake akwé꞉kon tsi nitisaiesthánion, tánon ahawerientí꞉io akwé꞉kon tsi nisehiatéskonte ne kattshénens. Selah

⁴ Aiáwenhs ahontáhion tsi nitesaskáneks ne sehriáne, tánon akwé꞉kon ahánhane tsi nisatenikonhrónh꞉nis.

⁵ Aiáwenhs tahionkwahénrete nattsenhnonhniátsera tsi sahtesénhnion, tánon raosénhnakon nonhkwaNí꞉io tewaʼniatarakétsko. Aiáwenhs ne Roiá꞉ner akwé꞉kon ahontáhion tsi niseriwaʼnón꞉tons.

⁶ Ónen kíʼ waʼkateriéntare ne Roiá꞉ner kwáh enhoiénawase ne rohiatará꞉kwen; kwáh tenhorihwasehrákwahse thóh nón꞉we nénhtewe ne iotokénti raówenk tsi karonhiáte tsioríhwa ne ne Roiá꞉ner tsi nihashástste, rosniénons ne ronhnontí꞉io nasahkosénhni ne ronwáswenhs.

⁷ Ótiakes ne teiakothaterenhsaronkwáhton ne otsiónkwas, tánon ótiakes koshá꞉tens nenhné꞉e teiakothaterenhsaronkwáhton, ók nonkwanaieséhra né꞉ne raosénhnakon ne Roiá꞉ner onhkwahNí꞉io.

⁸ Kwáh enhatiʼiathakwenhtarane tánon enhatihiatsénenhne, ók kwáh kíʼ thentsitewátane tánon entsitewatsathakwahrísi.

⁹ Tatsítson natesenhniétsera ne ronhnontí꞉io, O Saiá꞉ner; teskwahrihwasehrá꞉kwas nó꞉nenh ienkwahnáton.