Psalms 19 - Ohiatonhseratokénti

Rawenni꞉io Raoiatanerahkwáhtshera Tsi Nihosahánion Ne Shontonhthonhontsaʼtásawen Tánon Ne Kaianerénhsera

Ne Raterenhnathentsátha. Né꞉ne Táwit raorénhna.

¹ Ne tsi karonhiáte ne ionatrorhiáton ne raohiatanerahkwáhtshera ne Rawenni꞉io; tánon ne tsi karonhiáte wenéstha tsi nihohioténhen ne ratshanáke róstston.

² Sewenniserát꞉tions tsi kathará꞉kwah ne Rawenni꞉io raohiatanerakwáhtshera, niatehiokaratseráke tekarihwathétha natthokhátsera.

³ Iáh kanèka naronhkhátsera, iáh ó꞉ni nowenhnasónhas; nahotiwénhna iáh thaiakokthóntene;

⁴ Kíʼ ó꞉ni naotiwénhna ohontsakwékon nitewé꞉tha, ó꞉ni nahotiwenhnaókon iehionhontióktha ne tsi ionwenhtsáte. Né tsi karonhiáte rothosehró꞉te ne kará꞉kwah aoriwáke,

⁵ thóh ní꞉ioht tsi tkarahkwínekens tsi ní꞉ioht ne roniá꞉kon tahiá꞉kens tsi ranonwétstha, tánon tsi ní꞉ioht ne rón꞉kwe ronhnhashástste tsi teharé꞉rons,

⁶ Tsi hiehioteronhiáte nón꞉we tewaʼthasháffa, tánon thenwaʼteronhiatáse; tánon iáh thá꞉hothen tehiothasehténhnis nahotharihénsehra ne (Rawenni꞉io) raoráhkwah.

Né Raoianerénhsera Ne Rawenni꞉io

⁷ Né raoianerénsera ne Rawenni꞉io tsi nihiorihwatóken, á꞉se tioshaststenseráwis natónnhets; ne raoianerénhseras ne Roiá꞉ner oriwí꞉io í꞉ken. Tiakó꞉wis atʼthokhátsera tsi niʼiákon ne tsakototʼtáni;

⁸ ne raotsiawenhrá꞉tseras ne Roiá꞉ner tsi tkarihwaiéri í꞉ken, Iotsenhnonniaténhnis nawéri; ne raorihwá꞉tatʼtseras ne Roiá꞉ner teioswát꞉te í꞉ken, tánon tiówis ne kanikonhraienthátsera nonikónra;

⁹ ne raoteronkwáhtsera ne Roiá꞉ner tsi aóskon í꞉ken, tsi nénhwe tsi thenkawisháststeke; Ne raorihwenhthátsera ne Roiá꞉ner tsi tó꞉kenske í꞉ken tánon kwáh tiokwét꞉ton karihwakwahrishón꞉tsera í꞉ken.

¹⁰ Sénha né tehiorenhkénʼniet nètho tsi ní꞉ioht nowistanóron, ó꞉ni ne wé꞉so kawistanoronhtserí꞉io; tánon sénha tehiotsikhétare tsi ní꞉ioht ne otsinakontakwáhne otsikhéta, tánon tsi niwattsánons ne tsi rathisestathahástha notsinahkontakwáhne.

¹¹ Ronónha ó꞉ni ne iorihonhníhon ne sanhátseras ronwatitokaténhni; nenhontiénawaste kowánen tsi tenhonaterihwasehrákwahse.

¹² Ók ónka naieriwattsénhri ne raonaterientawenhriétsera? Sastiatorahrísi tsi nòkwah ne kariwaséhton ahiakonhíkon.

¹³ Tatʼtsiatón꞉nek ne sanhátshera tsi nòkwah ne thiwanikonrónhni kariwanerahátʼtsheras; tó꞉sa sehríhon nahionkatiatakwení꞉ioste! Ehʼthóhʼne ká꞉ti kwáh iáh othènen tahonkenhitseraiéntake, tánon waʼkatsiatotaríhshon tsi nòkwah ne karihwaʼhét꞉ken karihwanerahát꞉tsera.

¹⁴ Aiáwenhs nakewenhnasónhas ó꞉ni nakanontonnióntsheras ó꞉ni tsi nikatenikonraiéntons nakweriáne aeserientí꞉io, Ó Saiá꞉ner, iséke nón꞉we nikathasehtákwah tánon í꞉se sestsiatákwen.