Psalms 18 - Ohiatonhseratokénti

Kanontiió꞉tshera Kanonweratónhtshera ne Natesenhniétshera

Ne Raterenhnathentsátha. Né꞉ne Táwit raorénhna. Ne roióthense ne Roiá꞉ner , ne wahatharákwen naowenhnasónhas kí꞉ken karén꞉na thóh shiʼwenhniserátekwe nó꞉nen ne Roiá꞉ner shonsaohiatotarísi tsi nokwáh ne rontshanákes ne ronwáhsons, tánon ne ratshanáke ne Saul. Wahénron:

¹ Konhnorónhkwa, Ó Saiá꞉ner í꞉se nakeshatsténhsera í꞉ken.

² Roiá꞉ner se nakisténhra í꞉ken, nakatenhénhra, tánon ne sahtiathákwen, akeNí꞉io, nakisténhra ne rahonháke nón꞉we nikatasehthákwah, ne nakatʼroʼosthákwah, né꞉ne kashaststénhsera sewatiathákwen, ne nakáwenk iotenhenraníron.

³ Iahináhton ne Roiá꞉ner, rahónha ne ioríhonte ne tahonwanonwenhráhton, ká꞉ti tionkenonsthá꞉ton tsi nòkwah ne iónkshons.

⁴ Nahosehrí꞉ie ne kenhé꞉ion tewakwáhnen; tsi nihionontakwahronhtónhtses ne karihwaiesáhtshera tonkatiatónh꞉ti;

⁵ nahosehríhie ne Sheol onknerénkthon; tsi nihioterísthaien ne kenʼhé꞉ion onhkenenhrót꞉thase.

⁶ Thóh natewakanikónrahre iahináton ne Roiá꞉ner; rahonháke nakení꞉io watkhasénhtho nahatiénawase. Thóhrahononsatokentikówahne waʼhakewénhnaronhke, tánon tsi tekaséntʼthos ne rahonháke iaʼhohonsónhkote.

⁷ Ehʼthóhʼne waʼtsahonhontsíshonkwe tánon waʼhó꞉wake; ne tsitkenskwáʼhere ne tsi iohnonténion waʼtsowí꞉sonhkwe tánon waʼtiaonwentsíshonkwe, tsioríhwa tsi nihonakwénhen.

⁸ Takaienhkwahrínekenʼne tsi tehanionhkáronhte, tánon nó꞉tsire ne iakothóntha tsi raʼsahkáronte takahiákenʼne; ne ioswenhthathékha rahonháke nontáwe.

⁹ Waʼthasáhkete ne tsi karonhiáte, tánon tahátsnenhte; né rasitókon katénskwe tsi natetsiókaras.

¹⁰ Tánon né waʼhosáhten ne rahshástste raronhiakeró꞉non; thóh ráhtie tsi iówerahreh.

¹¹ Né waʼhateróhrokʼte ne tetiókaras; kaʼtsikeráhtens, titkanekáhereh, né tehotsiatathaséhton.

¹² Iowisónhtion tánon tewatʼtsirahrítkons ótsireh thóh nitewé꞉tha tsi natewaninekarahwáʼnions ne raohénton tánon thóh waʼtiótkaʼwe tsi natetiotsikeráhkeras.

¹³ Né Roiá꞉ner kwáh ó꞉ni waʼhawéraste ne tsi karonhiáte, tánon ne raowénhna ne Kwáh Éhʼneken Tótthe waʼhonwahwenhnáronke

¹⁴ Waʼharónh꞉thate ne raoiénkwires tánon waʼtesahkhoktékwahte ne ronhwásons; waʼthatsirahríhkhon tsi waʼtewahninekarahwá꞉nion, tánon waʼsaʼkotékwate.

¹⁵ Ehʼthóhʼne tsi kanatserathátse ne kaniatarahkhekó꞉wahne waʼhokénhtane, tánon ne tsitkenskwáhereh ne tsi ionwenhtsáte iatetsoteró꞉ron tsi nenhsatewenhnatsánite, Ó Saiá꞉ner, né꞉ne waʼkástatʼthene tsi satónhriethe ne tsi tesehnionkáronhte.

¹⁶ Ne Roiá꞉ner tontahatsátate thóh nón꞉we éhʼneken tánon wahatiéna, wahaʼkeskó꞉ko ne kwáh tsionótes.

¹⁷ Sahaʼtiatáko tsi nòkwah ne ratiʼshátste iónkshons, tánon tsi nihá꞉ti ne iónstsons; asèken sótsi ratiʼshátstes nakerihwáke.

¹⁸ Waʼhonkenenhrót꞉thase né shiʼwatiatotharéhon; ók kíʼ Roiá꞉ner tahakéne.

¹⁹ Waʼhaksnié꞉non nahonsahkatiatotaríhsi ne iótʼteron; sahakeniákenhte, tsioríhwa tsi rawerientí꞉ioskwe tsi nòkwah ní꞉i.

²⁰ Né Roiá꞉ner waʼthakeriwaserákwase ne tahiohianénhawe tsi niwakerihwakwahríshion; ne tahiohianénhawe tsi nihiotkwéniens ne kahtiákahke sahatiéritʼtse.

²¹ Asèken waʼkatienawáston ne raotiawenrátseras ne Roiá꞉ner, tánon iáh tewaʼkeriwanerahákskon ne tahonshonkatkaraténion rahonháke ne Rawenni꞉io.

²² Asèken akwékon ne raoianerénseras akʼkénton káien, tánon ne raoianerénhseras iáh éhʼren tewakkwíton nakonháke.

²³ Kwáh iáh othènon tewakeníkon ne raohén꞉ton, tánon wakataʼtienawákon neh tó꞉sa othénnon ahonkení꞉ke.

²⁴ Né꞉se wá꞉oni ne Roiá꞉ner sahatkárhiakʼse ne tahioianénhawe tsi niwakerihwakwaríshion, ne tahioianénhawe tsi niwakatkwéniens ne raohén꞉ton.

²⁵ Kwáh tsiókon tsi sariwató꞉ken tsi niáti ne rotiriwakwahrí꞉shion ne shonhà꞉ke; tánon tsió꞉konte tsi iáh othé꞉nen tesaní꞉kon ne rononhà꞉ke ne iáh othé꞉nen tehotiní꞉kon.

²⁶ Tsi nòkwah ne ierahkonró꞉non waʼsahthaténeste tsi nitisahrihwaiéri; tánon tsi nòkwah ne ienikonráhtha í꞉se nenʼné꞉e ne satenikonratthókha.

²⁷ Ne rotiʼiá꞉nere í꞉ken ní꞉se waséneste iateshiá꞉ti tsi sariwakwarí꞉shion, tánon ne tehonahtsiátʼton ní꞉se waséneste tsi sarihwaníron í꞉ken.

²⁸ Í꞉sehse ne sahserót꞉tha natkasèhra; ne Roiá꞉ner, akeNí꞉io éhʼren waʼhahá꞉wite nakáwenk tetiókaras.

²⁹ Ne nastié꞉nawase kwáh tekheiaskwaséron ne ronterí꞉ios, toka Nakení꞉io enhatié꞉nawaʼse enkwé꞉ni ne takatawenrá꞉te ne tsi tewasahontóte.

³⁰ Kí꞉ken Ní꞉io—ne raoweién꞉na kwáh tkarihwaiéri; ne raorarát꞉tsera ne Roiá꞉ner kariwanírats tsi iotokenskeʼónwe; rahón꞉a ne iontrenhostákwah í꞉ken ratikwé꞉kon ne rahonháke nón꞉we nenhiotaséhtakwe.

³¹ Asèken ónka nènhne ne Ní꞉io í꞉ken, nék khók ne Roiá꞉ner í꞉ken? Tánon ónka nènhne ne osténra í꞉ken, nek ki ne onkwaNí꞉io í꞉ken?—

³² Né꞉ne Rawenni꞉io rahónha ratiathánen ne kashaststénsera, tánon ne rón꞉nis ne tsi waʼkhá꞉thatse ne skénʼnonk akénhake tsi henkatahí꞉tha.

³³ Ne rahonhniá꞉ton ne kashitáke thóh ní꞉iot kwáh ne ne oskenón꞉ton washitáke, tánon thóh nón꞉we nihakatkáwen tsi nón꞉we niʼioriwí꞉io nonontoharakésons,

³⁴ Raʼrihonniénhnis ne katshanákes nateriʼiósehra, ne ká꞉ti ne kenenhtiákes nakakwéni takassáhkete ne tehiotwís꞉taron otsínekwar karístatsi nahó꞉ten ionhniáton aénna.

³⁵ Raʼrihonniénhnis ne katshanákes nateriʼiósehra, ne ká꞉ti ne kenenhtiákes nakakwéni takassáhkete ne tehiotwís꞉taron otsínekwar karístatsi nahó꞉ten ionhniáton aénna.

³⁶ Í꞉se tatienawáʼkonhkwe ne tó꞉sa ahiontiéna, tánon iáh kíʼ nonwénhton tewatiatienénhon.

³⁷ Waʼkhésehre ne iónkswens tánon iakhenónhterahne; tánon iáh thatewaʼkátʼton tsi nió꞉re waʼkhehiátonhte.

³⁸ Waʼkhehiatienenhthánion, né ká꞉ti ne tó꞉sa ahatikwéni tahonsahatítane; ká꞉ti thóh kasitháke waʼhonhníheie ronwatisénhnion.

³⁹ Wakhenonwarhiákhon; iáh tehotikwénion tahonsahotitáhon, thóh ratiʼiátaien roʼnenhéion akʼkhénton

⁴⁰ Asèken í꞉se wasʼtsiatánake ne kaʼsháststense nateriʼiósera aoriwá꞉ke; washeiónhnien ne iónkshons nahontenónwaien tiaʼtó꞉kon.

⁴¹ Í꞉se washeiónhnien ne iónstshons naionhkatswaténien, tsi nihiá꞉kon ne iónsshonkwe, wakheiá꞉tonhte;

⁴² Kwáh ioiánere tsi waʼkhenonwenhserário, tsi ní꞉ioht nó꞉nen iokenró꞉te ne tsi iahó꞉te; Waʼkhehiátonte tsi ní꞉ioht ne ionawatstanótes tsi tekanatokénhseron.

⁴³ Shastsiatáko tsi nihotiritstón꞉ni nonkweshónha; Í꞉i ohnón꞉tsi waskónhni tsi nòkwah nonhkweʼókon; nónhkwe ne iáh tekheientéri í꞉i akonkwé꞉ta waʼhón꞉ton.

⁴⁴ Saskeniá꞉kente tsi nòkwah ne ronteriʼioseranónwe onkweókons; waskatiénawaste í꞉i ohénton iatesét꞉taste tsi nòkwah ne ronhnonhontsakerónons; ne nonkwé꞉okons ne iáh tekheientérine wahontsió꞉tenhse.

⁴⁵ Thiʼononhontsá꞉te tahón꞉ne ronattókeri nakkénton; kwáh tsi niiostó꞉re wahonkewenhná꞉ronhke, tsi wahonkewenhná꞉rakwe.

⁴⁶ Ne Roiá꞉ner rón꞉nhe! Ronwasénhnaien nakitsténhra í꞉ken, tánon ronwasenhnakará꞉tat ne Rawenni꞉io ne natiatakenátshera,

⁴⁷ Né Rawenni꞉io ne tahákon natesenhniétshera tsi nòkwah ne iónkswenhs; ratsniénons nakhesénhni ne iónhswens;

⁴⁸ rahónha sahtiatákwen tsi nòkwah ne iónswenhs; kwáh í꞉ken, ní꞉se tsi wasetsenhnakaráhthate tsi nòkwah ne iónswenhs; í꞉se shastiatáko tsi nòkwah ne sakonaséhtha.

⁴⁹ Asèken ne kí kí꞉ken ne kwáh enkonsenhnakará꞉thate, Ó Saiá꞉ner, roʼnón꞉hake ne ronhnonhontsakeró꞉nons, tánon tenkeríwakwe ne kanonweratónhtshera to sasénhnakon.

⁵⁰ Rahónha noniká꞉ta í꞉ken ne kaiatakenhátshera raoriwá꞉ke ne raononhtí꞉io, tánon rawenéston ne ioriwató꞉ten kaʼnonronkwáhtshera rahonhá꞉ke ne rohiatará꞉kwen, rahonhá꞉ke ne Táwit ó꞉ni tsi nienhatwatsiríne ne tsi nénhwe enkénhake.