Psalms 140 - Ohiatonhseratokénti

Naterén꞉naient Nahonsahiontsiatotaríhsi tsi nokwáh ne Tehiontat꞉tions

Ne Raterenhnathentsátha. Né꞉ne Táwit raorénhna.

¹ Saskeniákenk, Ó Saiá꞉ner, tsi nónhwe nihónhnes ne ronhnonkwetahétʼkens: táskene tsi nónhwe nihónnes ne ratiʼnikonhrahhétkenʼs,

² ronhnónha ronhtenikonhrónhnis ne karihwahét꞉ken ne raotinikonhrákons tánon iehotikonhtákwen ratitsirónh꞉nis naterihiósehras.

³ Né ronhnenhnasákes thóh nihioiotí꞉ies tsi ní꞉ioht nóniare, tánon ne ratiskwenhtókons thóh iáwere ne kaniarákʼtsens ahononhkwahtsheraksénskwah. Selah

⁴ Táskene, Ó Saiá꞉ner, tsi nòkwah ne ratitsanákes ne ionhkwetahét꞉kens; táskene tsi nónhwe nihónhnes ne ratinikonrahét꞉kens né tsi nahó꞉ten rohnatenikonhrónhni nahonkeshastsʼtenhserónhti.

⁵ Ne ratinikonhrahétʼkens ionkateristaiénhni, asheríhie nahóten ronataharonhniáton ne tehotitakwaríhton tsi ronateristaientákwen, tsi hiohatátses nónhwe nihotikwahtákwens tsi ionkaterístaien ne nahiontséna. Selah

⁶ Enhiróhri ne Roiá꞉ner, “Í꞉se nakení꞉io í꞉ken; satahónsatat, Ó Saiá꞉ner, nakewenhnaókons tsi niwakaterénhnaien.”

⁷ Ó í꞉se Natiá꞉ner í꞉ken, né nakawenk rashátste satsatákwas, í꞉se táskene ne shiʼtewenhniseráteʼkwe siʼwaterí꞉ioʼkwe.

⁸ Tó꞉sa tashé꞉hion, Ó Saiá꞉ner, ne raonaskanéktsheras ne ronhnonkwetahét꞉kens; tó꞉sa iahá꞉tsies ne karihwahét꞉ken tsi nihontenikonhrónhnis. Selah

⁹ Tsi niʼiákon ne tehionkehonwarónhni tewatarakétsko, satonhtat tsi natehioterientakaria ne ratiskwenhtake rononha shó꞉tirann!

¹⁰ Satónhtat ne ioswenhtathékha ahotírahne! Satónhtat tsatahonarahtenhniónkwen osónhkwakon iehonwatihiatónhti, iáh shé꞉kon tathahontahontkétsko!

¹¹ Tó꞉sa satónhtat ne iakenhnasát꞉sen naʼiakoianerenhseraiénhtake tsi ionhwenhtsáte; sathón꞉tat ne karihwahét꞉ken iostorekéha tsi ahiakotórahte ne ratinikonrahét꞉kens!

¹² Wakateriéntare nètho Roiá꞉ner iehokonhtákwen tsi sakoiénawaʼse ne tehiontkárias, tánon ne rohióthens ne karihwakwahrihshiónhtsheras ne raotirihwáke ne rotithenténions.

¹³ Orihwiʼiohónwe ne thonhnonkwetaiéris tsi thenhontenonhweráton sasénhnakon; ne rotirihwatókens kwáh sahénton enhonnónhnheke.