Psalms 14 - Ohiatonhseratokénti

Iáh tehonwatiriwahnira꞉ti ne iáh Teotini꞉ioseraien

Ne Raterenhnathentsatha. Né꞉ne Táwit raorénhna.

¹ Né tiakotónhnokte rontatró꞉ris, “Iáh teʼkáien ne Rawenni꞉io.” Kwáh ratikwékon tsi ronhnonkwetahétkens, karihwák꞉sens tsi nihotiʼieránions; iáh né saiáta nahioianeréhake né thènen ahohióten ne tkarihwaiéri.

² Né Roiá꞉ner karonhiáke nón꞉we tethesakokánere nonkweshón꞉ha ne nahatkátho tó꞉ka kén ónhkak nahiontenikonratʼtókhake tánon ronwahiatísaks ne Rawenni꞉io.

³ Kwáh ratikwékon ronwatsiathatiskwáhton ne Rawenni꞉io, skát꞉ne tsi wahononkwetahétkenhne. Iáh ónhka ne tehionterihwaʼthentsátha ne tkarihwaiéri, iáh ne tionkwéta.

⁴ Iáh kén tehonatʼthokhatseráien, ratikwékon né꞉ne rotihióthens ne kariwahetkénhsera, tsi niháti ne sakotiiataratsiónkwas nakonkwetashón꞉ha tsi shí꞉ken ní꞉ioht naotinatárakon, tánon iáh tiehonhwanátons ne Roiá꞉ner?

⁵ Ók kwáh kíʼ enhonateronhniénten, asèken ne Rawenni꞉io ratikwekonhátie ne iakoiánere.

⁶ Tenhonwatinikonrhiákten tsi nihontenikonhrónhnis ne rotíten, ók Roiá꞉ner nón꞉we nihonatekwáhsen.

⁷ Ó nètho nahotesenhniétsera ne Israel Zion nón꞉we nénhtewe! Nó꞉nen ne Roiá꞉ner ensehsakorihwakwahthákwaʼse tsi nihononnhétie ne rahonkwetashón꞉ha, aiáwens Jacob kwáh kíʼ enhatonhnháren; aiáwens ne Israel kwáh enwatsenhnón꞉ni.