Psalms 139 - Ohiatonhseratokénti

Iáh Thahónton Nahonwatékwaʼse Ne Rawenni꞉io

Ne Raterenhnathentsátha. Né꞉ne Táwit raorénhna.

¹ Saiá꞉ner, Waskát꞉kense tánon sistsientéri.

² Sateriéntare nó꞉nen enkátien tánon nó꞉nen ténkʼtaʼne; ahí꞉non nió꞉re tsi tientéri nakanontonhniónhtsera.

³ Tát꞉kens; tohkàken watsióte khés wahkatoríhsen; akwékon sateriéntares tsi nikeweienhnótens.

⁴ Iekaníhare nohénton nahontaʼkewenhnínekenʼne, ónenk shisateriénthare tsi nahó꞉ten enkíron.

⁵ Kwáh kíʼ tsík nahonthahiotserátonke tsi teskatsatáton; sashastsʼténhsera sástha tsi téskenes.

⁶ Nètho atʼthokhátshera shó꞉tsi iorihwanerákwat nakeriwáke; sóhtsi tiótʼte iáh tatʼkwéni nakatsénawasʼte.

⁷ Kanónhʼwe niáke nakonhiatékwaʼse? Onh ní꞉ioht tsi ahèren akéthe tsi nónhwe níses?

⁸ Tó꞉ka karonhiáke niáke, tó꞉ki enteshé꞉seke; tó꞉ka tohhiakatatenatʼtónhnien tsi tsiohontsáien ne kenhéion, tó꞉ki á꞉re enteshé꞉seke.

⁹ Tó꞉ka thóh nónh꞉we iatátʼthen ne kwáh ahínon ít꞉ken ne tsitkarakwínekens nòkwah niáke khés ne thóh nónhwe iakathatíteron ne kwáh ahínon i꞉tken ne kaniatarakhekówa,

¹⁰ tó꞉ki enteshé꞉seke násek kenhténhse, tánon ne sehseweientethákwen tsi niʼiostóre enwakatsénawasʼte.

¹¹ Tó꞉ka akíron, “Oriwiʼiohónwe ne tetsiókaras tsi entewakeróhroʼke, tánon ne teioswátʼthe ne tsiatatʼthóntie asontʼthénhne iahónton,”

¹² ók shé꞉kon kíʼ nònhne ne kwáh tetsioshathakéras iáh thatetsiókaras ne sarihwáke; nasontʼthénhne thóh nateioswátʼthe ne sarihwáke tsi ní꞉ioht nenhtiékhene, asèken ne tetsiokaras eh nateioswatʼthe ne sarihwake.

¹³ Asèken kwáh í꞉se shasahánion tsi nihioterihwatséren ne tsatakónson; í꞉se wateskhekhánion né tsi iewirahrá꞉kwa nakenisthénha.

¹⁴ Tekonhnonwerátons, tsioríhwa tsi nihiorihwaneráhkwat tsi tatsiatíshon. Tsi niʼiorihwanerákwat ne sahiothénseras; nètho kwáh ioiánere tsi wakateriéntare.

¹⁵ Nó꞉nen nastsienhsónhas shonhtónhni, kwáh tewateweiénton tsi tekakhánion nakenisténha tsi iewiraráhkwa, thóh nónhwe shonhtonkatehiarónhtie nathashétonhke, sateriéntharakwe tsi thóh tiatáthakwe—

¹⁶ Wasétken nohénton sakenhnákerate. Tsi niwenhniserákes ionhkatkawénhni akwékon sahiatonhserákon kahiathónhnion, nohénton ne thènen sonhthonthásawen.

¹⁷ O Sewenní꞉io, tsi niwaterihwenhtó꞉re tsi ketsénhriens ne sanonhthonhniónhtsersas; tsi nihiawetowánen í꞉ken!

¹⁸ Wakateniénthen nakásheʼte—sénha ne iawetowánen tsi ní꞉ioht tsi tekatsinetaró꞉tharons nonesarónhkwa; Nónenh énstie, sehé꞉kon kíʼ nitinikwékon.

¹⁹ Ó né nasehnonhwarhiákon ne ionhwetahétkens, Ó Sewenní꞉io, tánon nètho ratinekwenhsanónhwe éhren ahónhnete ne tsatákʼta—

²⁰ karihwahétkens ronhtónhnions ne sarihwáke; karihwahétkens ronhtónhnions tsi nòkwah ne sasenhna.

²¹ Ó Saiá꞉ner, tsi nikhésons tsi niháti ne ieshá꞉shons! Tsi nikhésons tsi niháti ne iáh teiesawenhnaráhkwah!

²² Kwáh iohiánere tsi khésons; thóh nithékhete tsi ní꞉ioht ne taiakwahtatʼtsiónhseke.

²³ Takaterhiasát꞉kens, Ó Saiá꞉ner, tánon kí takenikonhraienhtéri.

²⁴ Sésak tó꞉ka kén thènen ahonkatiénhni ne karihwahétken nakonháke. Tatkéntens ne tsi iohatátse né í꞉seke nónhwe nieʼiawénon.