Psalms 119 - Ohiatonhseratokénti

Neioriwanerakwahténions Ne Rawení꞉io Raoianerénhseras

¹ Iakotáskats tsi nikákon ne tsi niʼieweienhnótens iáh othèhnen tekanitserénhawe, thóh nón꞉we nihiakothahítake raohianerenhserákon ne Roiá꞉ner.

² Iakotaskáts tsi niʼiákon ne iontewénhnaraʼkwe tsi nihorihwawahtáton, tánon tsiakaweriahsakontákwen tsi ronwahiatísaks,

³ ronónha ne iáh othé꞉nen kentsehatiʼiéra nahó꞉ten ne karihwahéken í꞉ken, ók tsi roháthatse nón꞉we nihiakothaíthake.

⁴ Saiá꞉ner teskwatkawénhni ne saianerénhseras tánon ahionkwatsteniáronhke tsi ahionkwatienawastónhake.

⁵ Ó tánon tsi nikeweienhnótens aiáwens aiorihwatokenháken ahonkatienawastónhake ne sarihonnienhnítseras!

⁶ Eʼthóhʼne káti kwáh iáh tahonkatéhate, tsoríhwa tsi thóh nón꞉we natewakʼkarotáhon akwé꞉kon tsi nisatsiawenhráhton.

⁷ Kwáh akeriasóskon tsi tenkonnonhweráton, tsi nenskerihónhnien ne iohterihwakwahríhshion sahiatorethatsera.

⁸ Kwáh enkatewénhnarahkwe ne saianerénhseras; kwáh tó꞉sa nonwénhton takatewénhtet.

Ahiontewénhnarakwe Ne Raoianerénhsera Ne Roiá꞉ner

⁹ Onhʼní꞉ioht tsi aiekwéni ne kenhnitiakohiónha ne tsi iakónnhe ne iáh tahiakononwaró꞉rihke? Ne nahiontenhnikonrá꞉ren tsi nitʼkáhas ne sawénhna.

¹⁰ Né꞉ne kwáh akehriasakwékon tsi enkonhiatisáke; tó꞉sa takeríhon nakatewénhthete tsi nisahtsiawenhráton.

¹¹ Akweriá꞉ne nón꞉we niwahkatewenhiénton ne sawénhna, ne natkwéni ne tó꞉sa akerihwánerake tsi nòkwah ní꞉se.

¹² Tekonhnonwerátons, Ó Saiá꞉ner; takerihónhnien ne sahianerénhsera.

¹³ Tentkatnanétha enhiorahkareníhake akwékon ne kaianerénhseras ne tisatkáwen.

¹⁴ Wakerientí꞉ios tsi ítʼsehre ne sahianerénhseras sénha tsi ní꞉ioht nahontkwatséhake.

¹⁵ Kateweiénstha ne saianerénhseras; tánon wahkatʼkenhsehátie ne sarihonhnienhnítserah.

¹⁶ Kwáh wakonwehséntha ne sahianerénhseras; tsi nisahtsiawenhráhtons iáh thahonkenikónhren.

Wattsenhnonhniatserénhawe Ne Raoianerenhserákons Ne Roiá꞉ner

¹⁷ Tasarihwaiérik tsi nenhskatiéraʼse, í꞉ih ne sanhátsera í꞉ken, ne nahónton akónnheke tánon akatewénhnarahkwe ne sarihonnienníhtsera.

¹⁸ Tesetkakwahrísi, ne nahónton nakatʼkátho ne iorihwanerahkwahténions norihwí꞉io í꞉ken ne saianerénhsera.

¹⁹ Thiwakenatárehne tsi kénʼen í꞉kes tsi ionwenhtsáte; tó꞉sa takaséhten ne satsiawenhrátseras.

²⁰ Wakerhiasanónwaks tsi nikaskáneks; nahonkateriéntarahne ne sahiatorethátsera néʼne kwáh tiotʼkonhónwe akénhake.

²¹ Wasehiatewenhnaiéntonhwe ne ronhthatónhni; sehrewátha tsi nihiákon ne iáh tehiontewenhnarákwah ne sahtsiawenhrátsera.

²² Tó꞉sa sehríhon nahionkenikonhraʼkaréwaʼte tánon ne thahiontiéron, asèken wahkatienawástone saianerénhsera.

²³ Ne ratikoráhsons rontkenhnisáhas tánon hionkateristaiénhnis, ók kí kwáh enkatéweienste sarihonhnienhnítseras.

²⁴ Né sarihonhnienhnítseras tewakáwis nahonkerienhtí꞉iosʼte; ne wakatenikonhraʼsonhteránis.

Iatehiakorihwahiéntaʼse Nahiontewénhnarakwe Ne Raoianerénhseras Ne Roiá꞉ner

²⁵ Ónenh tó꞉wa akíheie; thontáskon natakarihtétshera, ne tsi nisahrahráts꞉ton.

²⁶ Konhró꞉ri tsi nikewehiennó꞉tens, tánon wateskerihwasehrákwahse; takerihónhnien ne saweiénhnas.

²⁷ Takónhnien nahonkenikonraiénhtaʼne tsi niʼiohthánions ne saianerénhseras, tánon thóh nónh꞉we nenhkatenikonrahiénton ne iohrihwahnerakwahténions sarihonhnienhnítseras,

²⁸ Né tewakkhonrhiá꞉kon kanikonrakʼsénhtsera; saskeshatsténhseron tsi nisahrahrátston.

²⁹ Takenónstat ne tó꞉sa karihwahét꞉kenke nòkwah niáke, tasahrihwaiérik nakonháke tánon takerihónhnien ne saianerénhsera.

³⁰ Né wakathaterahkwénhni nakonwenhnaráhkwahke; wakathenhnikonrahráton ne sahiatorehtátsera.

³¹ Wák꞉sehron ne sarihonhnienhnítsera, Ó Saiá꞉ner; tó꞉sa takeríhon nahionkatéhate.

³² Tenhwasteríhen nakatewénhnarakwe ne sahtsiawenhráhtseras, tsioríhwa tsi sénha wé꞉so entéskon ne kanikonhraienthátsera.

Ne Naterénhnaient Nahiakonikonhraiéntaʼne

³³ Takerihónhnien, Saiá꞉ner tsi nikéntons ne saianerénhseras tánon kwáh tiotkonhónwe tsi enkatewénhnaraʼkwe.

³⁴ Takónhnien nakʼkwéni ahonkenikonhraiénhtaʼne ne saianerénhsera; kwáh akatonhnhetserakwékon tsi enkatiénawasʼte.

³⁵ Tó꞉sa takeríhon ne iáh thakatewénhnarakwe tsi nisatsiawenhráton, wahkerientí꞉ios tsi ít꞉sehre ne saianerénseras.

³⁶ Takónhnien thóh nahonkenikonhrothénhake tsi akatewénhnarakwe ne saianerénhseras, né꞉ne tó꞉sa othènen ahonkaskenaséhake.

³⁷ Tó꞉sa takeríhon nahontakheiéthakwe ne iotinówenhs kahiatonhnisónhas; tasarihwaiénrik nakonháke ne tsi nisahrahráts꞉ton;

³⁸ Thakerihwanírats ne sahrarát꞉tsera, tsi nisehiararatsʼthénhni ne tsi nihiákon ne iesawenhnarákwah.

³⁹ Tatiatanónstat tsi nihiónke nikonrahkarewátha ne wakʼteronhkwénhnis; tsi nihiorihwaneráhkwat ne saiatorehthátseras!

⁴⁰ Tsi natwakatonhontsóni nakatewénhnaraʼkwe ne satsiawenhrá꞉tseras; thontáskon ná꞉se atónnhets, asèken í꞉se ne teshonkwetaiéri í꞉ken.

Tiakawetákwen Ne Raoianerénhsera Ne Roiá꞉ner

⁴¹ Takenatónhas tsi nió꞉re tsi takenorónhkwa, Saiá꞉ner, tánon tatiatanónstat tsi thóh nón꞉we nitewé꞉tha tsi nisahrahráts꞉ton.

⁴² Eʼthóhʼne entkwéni takerihwaʼserákwahse tsi niháti ionkenikonrahkarewátha tsioríhwa tsi tewaketákwen ne sawénhna.

⁴³ Tatiénawas nakatáti norihwí꞉io í꞉ken né꞉ne tiókonte akénhake, tsioríhwa nakararáhtshera sahiatorethatserákon nón꞉we nihiotaténhron.

⁴⁴ Kwáh tiónkonte tsi enkatewenhnaráhkwahke ne saianerénhsera, né꞉ne tsi nénhwe tánon tsi nénhwe enkénhake.

⁴⁵ Kwáh thóh nón꞉we nenhkónnheke ne kwáh tkarihwahiéri atatewenhniʼiósera; tsioríhwa tsi nikateniéntha nakatewénhnarahkwe ne sarihonhnienhnítsera.

⁴⁶ Kwáh enkherihowahhnáten ne sahtsiawenhráhtseras ne rontinonhtí꞉ios, tánon iáh kíʼtahonkatéhaʼte.

⁴⁷ Keʼtsénhries tsi wahkerientiʼióstha tsi katewenhnaráhkwah ne satsiawenhratseras, tsioríhwa tsi nikerihwanorónhkwah.

⁴⁸ Kweniénstha tánon kerihwanorónhkwah ne satsawenhrátsera; kwáh katewehiénstha ne sarihonhnienhnítsera.

Tiakawenhthá꞉kwen Raoiá꞉nerenhserákon Ne Roiá꞉ner

⁴⁹ Sehiárak tsi niskarahratsthénhni, í꞉ih ne sanhátsera; thóh nitsawénhnon tsi teskáwi nahrahtát꞉tsera.

⁵⁰ Nó꞉nen siwakeronhiáken, í꞉se wastsiathóntʼthaʼse, tsioríhwa ne tsi nisahrahráts꞉ton ne wahtsénawaʼse tsi akónnheke.

⁵¹ Né ronhtatónhni kwáh tiókonte tsi kaieronhseráhkon ionhkónhnis, ók iáh kíʼ éhʼrenh tewakéton tsi nón꞉kwah ne saiá꞉nerensera.

⁵² Keiá꞉re ne sarihwenhthátsera ne wahónnise tkènhne, tánon tewakhawiténhnis nahonhkenikonhrahníraʼte, Ó Saiá꞉ner.

⁵³ Nó꞉nenh enkhéken ne rononkwetahétkens tehatíʼiaks ne saianerénhsera, kwáh wakatenakwakwenráhtis.

⁵⁴ Tsi nikaríwes wakenataré꞉nenh kí kénʼen ionhontsáte wahkerenhnarastánion ne saianerénhseras aorihwáke.

⁵⁵ Né tsi niwasónhtes konkéhiare, Saiá꞉ner, tánon ne kanontonniónkwas ne saianerénhseras.

⁵⁶ Ketsénhries natʼtsenhnonhniátsera tsi katewenhnaráhkwah ne shatsiawenhráhtseras.

Ierihwanorón꞉kwah Ne Raoianerénhsera Ne Roiá꞉ner

⁵⁷ Iateshiá꞉ti khók tekoniatonhontsóni, Ó Saiá꞉ner; wakaráhratsʼte tsi enkatewénhnarahkwe ne saianerénhseras.

⁵⁸ Konrihwanonhtónh꞉nis kwáh kerhiasakwékon naskítenhre tsi kíʼnisarahráts꞉ton!

⁵⁹ Tewatiatoréton tsi nikewehienhnó꞉ten, tánon káti wahkaráhratsʼte tsi énkshere ne sarihonhnienhnítsera.

⁶⁰ Kwáh iáh tewakatenhniskwáhton tsi natewasteríhen nakatewénhnarahkwe ne satsiawenhráhseras.

⁶¹ Ne ronhnonkwetahétkens watsionkanikará꞉rahke, ók iáh kíʼtewakenikonhrénhen ne saianerénhsera.

⁶² Nasontʼthénhne wahkatkétsko ne takonhnonweráhton, tsioríhwa tsi nitkarihwaiéri tsi teshatoréhtha norihwasónhas.

⁶³ Í꞉i ne iakwaténhros rahtikwékon ne iesahiótenhse, ó꞉ni rahtikwékon ne iesahwenhnaráhkwah.

⁶⁴ Saiá꞉ner ne tsi iohontsáte ne titkáhere ne iohrihhwatóken sanoronhkwáhtsera; takerihónhnien ne sahtsiawenhráhseras.

Tsi Nikarihwástha Ne Raoianerénhsera Ne Roiá꞉ner

⁶⁵ Ní꞉se satsenawáston tsi nisarahráts꞉ton, Saiá꞉ner, tánon tisarihwaiéri tsi nòkwah ní꞉i, né꞉ne sanhátsera í꞉ken.

⁶⁶ Takerihónhnien nahioianeréhake tsi tatiatoréhthake norihwasónhas ó꞉ni ne táskon natʼtokhátsera, asèken tewaketákwen ne sahtsawenhráhtseras.

⁶⁷ Nohénton sahsetréwaʼte iáhs tekatewenhnaráhhkwah ne sahtsiawenhráhtseras; ók kíʼó꞉nen kí katewenhnaráhkwah ne sawenhnasónhas.

⁶⁸ Tsi nisahiá꞉neren tsi nitisarihwaiéri! Takerihónhnien ne sahtsiawenhráhtseras.

⁶⁹ Ne ronhtatkowanátha nahonksenhnát꞉saʼte tsi wahonkanowenhtaʼniónhaʼse, ók kwáh kí kerhiasakwékon tsi wahkatewenhnaráhkwen ne saianerénhseras.

⁷⁰ Kíʼronhnónkwe iáh thaóthen teotinikonhrahiénhtas, ók thóh nón꞉we niwahkerienhtiʼióstha né꞉ne saianerenhserákon.

⁷¹ Iohiánere nakerihwáke tsi wakatréwaʼte, ne nahónton akeweientétahne ne satsiawenhráhtseras.

⁷² Ne kaianerénhsera ne teskáwi wé꞉so kéntons nakerihwáke sénha tsi níkon káien ne kawistará꞉kens ne tsi ionhontsáte.

Ne Naterihwakwahrihshióntsera Í꞉ken Ne Raoianerénhsera Ne Roiá꞉ner

⁷³ Satshanáke watsiatíshon tánon watiatasherónhni; tewakáwis nahonkenikonraiéntaʼne ne nahónton akewehientétaʼne ne satsiawenhráhseras.

⁷⁴ Tsi niháti ne teiesarénhsarons kwáh enhontsienhnónhni nenhiónkʼken, tsioríhwa tsi tewaketákwen tsi nisahrahráts꞉ton.

⁷⁵ Wakateriénhtare, Ó Saiá꞉ner, nètho sarihwenthátsera tsi tkaiéri, tánon thóh ne iotokenskehónwe tsi ní꞉ioht tsi wahsetréwaʼte.

⁷⁶ Serihon ne iorihwatóken sanoronhkwáhtshera nahiotateweiehnenhtáhonke nahonkenikonranírate, né tsi niskarahratsténhni, í꞉i ne sanhátshera í꞉ken.

⁷⁷ Seríhon ne sataniténrat nahontiató꞉rehne, né nahónton akónnheke asèken ne saianerénhsera ne wahkereniʼtiʼióstha.

⁷⁸ Sewenní꞉io sehiatéhat ne ronhtatónh꞉ni, ne tsi nihoti nó꞉wenhs ionketʼkenhténhnis ne kwáh iáh othènen tetkarihónhnis; ók ní꞉i wahkateweienstonhátie ne sarihonhnienhnítsheras.

⁷⁹ Aiáwenhs tsi nihiákon ne iesakweniénstha akonháke nahontahónhne, ne nahónton ahonahteriénhtarahne ne satsiawenhráhsera.

⁸⁰ Aiáwenhs kwáh kerhiasakwékon áksere ne saianerénhseras, ne káti ne tó꞉sa akatéhen!

Ne Naterénhnaiet Nahonsaʼieniákenhne

⁸¹ Tewakwisenhéion, Saiá꞉ner, ne tsi nikaríwes wahkateráhrate naskenónsthate; né꞉ne sawénhnake nón꞉we nitewaketákwen.

⁸² Tewakʼkarakenhéion tsi nikenikónhrahre ne thóh naiáwenhne tsi nahó꞉ten sahraráts꞉ton, tóh nikaríwes, “Kerihwanóntonskwe, kát꞉ke entéskene?”

⁸³ Thóh nió꞉re tsi iáh othènen teskerihwástha kwáh né꞉ne í꞉seh iewátsion ne kané꞉hon iotsiatawí꞉ton ne onenharákeri watnekaráhkwah; nek kíʼ sá꞉ka iáh tewahkenikonrénhen ne shatsiawenhráseras.

⁸⁴ Thóh shé꞉kon nenhkariwéshon꞉ke enskateráhrate? Kát꞉ke kwáh enhsehréwate tsi niháti ne ionkenronhiakéntha?

⁸⁵ Ne ronhtatónh꞉ni, rohnónha iáh tehontewenhnarákwah ne saianerénsera, ronattsionhionhniáhnion ne ionhkateristaientákwen.

⁸⁶ Ne sahtsiawenhrasera kwáh akwe꞉kon iorihwatóken í꞉ken; nonkweshónhas ionhkeronhiakéntha tsi nihotinó꞉wenhs tatsénawas!

⁸⁷ Serèka ahonaterihwathenhtsénhni nahionkenonhwarhiá꞉kon, ók iáh kí tewakkenronhníhon ne sahtsiawenhrátsera.

⁸⁸ Tsioríhwa ne iorihwatóken sanoronhkwátshera tsi entewakerihwaiéritʼtse, ne káti nahónton akatewénhnaraʼkwe ne saianerénhsera.

Tsakawetákwen Raohianerenhserákon Ne Roiá꞉ner

⁸⁹ Ne sawénhna Saiá꞉ner, tsi nénwe enkátake; kwáh tsi nénhwe enkénhake ne karonhiáke.

⁹⁰ Ne sarihwatokentítsera kwáh tenhkawisátsteke ratikwékon ne tahatiwahtsiraʼthátse; kwáh iohrihwaníronh tsi ní꞉ioht tsi shonhontsíshon.

⁹¹ Orihwahkwékon tsi nishasahánion ne tsi ionhwenhtsáte kakèron nónh꞉wa wenhniseráte ne ionihonhníhon tsi nisathenhnáhon, tsioríhwa tsi ratikwékon í꞉se iesahióthenhse.

⁹² Tó꞉ka ne saianerénhsera iáh ne thahónta hiotasahwénhni nakatʼtsenhnonhniátshera, kwáh ahonkihéionhke tsi niwahkeronhiákenkwe.

⁹³ Kwáh iáh nonhwénhton thaʼhonkenikónhren ne saianerénhsera, asèken thóh nón꞉we niteskáwi natónhnhets.

⁹⁴ Ní꞉ih í꞉se shonkwéta í꞉ken, tatiatanónstat; asèken wahkesáhkon ne saianerénhsera.

⁹⁵ Ne ronhnonkwetahét꞉kens tehonannénraien nahionkenonwahrhiá꞉kon, ók kanonhtonhniónkwas tsi nahó꞉ten kéntons.

⁹⁶ Wakatkáton orihwahkwekon niehiotíhien ne tsi iehiotót꞉te nahoténshons ne watonhnisáhas, ók ne sahtsiawenhrátsera iáh nenhneé tsewatót꞉tha.

Ienorónhkwah Ne Raoianerénhsera Ne Roiá꞉ner

⁹⁷ Óh, tsi nikenorónhkwah ne saianerénhsera! Niahtewenhniseráke ne kanonhtonhniónkwas.

⁹⁸ Ne satsiawenhrátsera ne wakonhniénhnis nakatenikonratʼthókhane tsi ní꞉ioht ne iónkswenhs akehiatahónsahthate, asèken tiotkonhónhwe ne kháwis.

⁹⁹ Sénha ishinónhwe niwahkenikonrahiéntas tsi ní꞉ioht ne ratikwékon tsi nihotinikonhraiéntas ne ionkerihonhniénhnis, tsioríhwa tiotkonhónwe ne kanontonhniónkwas ne sarihonhnienhnítsera.

¹⁰⁰ Sénha ishinónhwe niwahkenikonhrahiéntas tsi ní꞉ioht ne tonhnonkwetahions, asèken wahkatienawáston ne saianerénhseras.

¹⁰¹ Iáh éhʼtho nónhwe tewakatʼtahíten tsi nihiorihótens ne karihwahét꞉kens, tsioríhwa tsi ne tewakatonhontióni nakatewénhnarakwe ne sawénhna.

¹⁰² Iáh tewakatarónhtion ne sarihonhnienhnítseras, asèken kwáh í꞉se ne takerihonhniénhni.

¹⁰³ Tsi natehiowenhnatsikhétares ne sarihonhnienhnítseras, sénha ne tehiotsikhétare tsi ní꞉ioht notsinakonhthakwáhne raotiʼtsikhéta!

¹⁰⁴ Saiahnerenhserákon nónhwe nitékhas ne atʼthokhátsera; káti akwékon ítsons tsi nahoténhsons ne tehiotʼtsátons.

Ne Roiá꞉ner Raoianerénhsera Kwáh Né꞉ne Kahasehra Í꞉ken

¹⁰⁵ Né sawénhna né꞉ne iehaserénhas í꞉ken tsi nónhwe nikhatahitáhas tánon ne tekaswatthétha tsi nón꞉we niwatkháte.

¹⁰⁶ Kwáh iohrihwaníronh tsi wahkarahrátston tánon wakerihwaniráhton, kwáh kí enkatewénhnarahkwe ne saianerénhseras.

¹⁰⁷ Nakeronhiakénhseras, Saiá꞉ner kwáh í꞉ken tsi tehiotenonhianíton tsi ní꞉ioht; tá꞉kon nakónnheke, O Saiá꞉ner tsi kí nisharahráts꞉ton.

¹⁰⁸ Tsiéna nakaterénhnaient ne kanonhronhkwatsherákons, Ó Saiá꞉ner, tánon takerihónnien ne satsiawenhráseras.

¹⁰⁹ Tiotkonhónwe ne tsi kónnhe iotʼteronhónwe nakíheʼie; ók iáh kíʼtewahkenikonrénhen ne saianerénhsera.

¹¹⁰ Né ronhnonkwetahét꞉kens tehionkanikaʼráhraks, ók iáh kíʼtekatsatonhthákwas ne saianerénhseras.

¹¹¹ Né saianerénhseras wakerihonhniénhnis tsi nahoténsons enkerihwanorónhsthake né꞉ne tsi nénhwe enkénhake; ne wakerienhtiʼióstha nakwerhiá꞉ne.

¹¹² Iatewakerihwaiénhtase nakatewénhnarahkwe ne saianerénhseras, kwáh tsi nió꞉re ienkí꞉heie.

Skenenhkó꞉wak Thí꞉ken Ne Raoiá꞉nerenhserákon Ne Roiá꞉ner

¹¹³ Khésons tsi niháti ne thatehotinikónhrahke, ók kenorónhkwah kíʼne saianerénhsera.

¹¹⁴ Í꞉seke nónh꞉we nikatasehtákwah tánon í꞉se nakáwenk tehioniatastákwah í꞉ken; né꞉ne sahwénhnake nónhwe nitewahketákwen.

¹¹⁵ Éhʼren í꞉sewek ne tiatátʼta í꞉se ne sewarihwanerahákskon tiónkwe, kwáh ne enkatewénhnarakwe ne rahotsiawenhráhtsera nakení꞉io.

¹¹⁶ Takeshaststénhseron, tsi nisharahráts꞉ton, tánon kíʼ kwáh enkónnheke, tó꞉sa takeríhon náhon takenikónhrenhne né tsi niwahkérahre naskenónhtate!

¹¹⁷ Takatiénawast, tánon kíʼkwáh enwahtiatanónsthate, tánon kí kwáh tiotkonhónwe tsi enkenikonráhraʼke ne sahtsiawenhrátseras.

¹¹⁸ Iáh tesehiatsenawástha ónhka ne iáh tehiontewenhnaráhkwa ne saianerénhseras; ne kanikonhrá꞉ton tsi nihontenikonhró꞉ris kwáh iáh othènen tekarihwástha.

¹¹⁹ Thóh nisheiérase ne ronhnonkwetahét꞉kens tsi ní꞉ioht nononwénhseras, tánon káti kwáh kenorónhkwa ne sarihonhnienhnítsheras.

¹²⁰ Í꞉se saríhwa tsi wák꞉terons; tánon ne wakteronhkwénhnis ne sarihwenhthátshera.

Iontewenhnaráhkwas Raoianerénhsera Ne Roiá꞉ner

¹²¹ Thóh niwahtiéren tsi nahó꞉ten ne tkarihwaiéri í꞉ken tánon ne ioiánere; tó꞉sa iatakatsakwahríhsi ó ne iónkshons!

¹²² Tsiarahráts꞉ten ne sanhátshera tsi nòkwah ne raotakarihthétshera; tó꞉sa sehríhon ne rontatkowanátha nahionkeronhiákenhte.

¹²³ Tewakkarakenhéion tsi niwakérahre naskeniákenhte, tánon nakánahne ne tkarihwaiéri tsi nisarahráts꞉ton.

¹²⁴ Taskateweienhtónhas ne tsiosèhret ne iorihwatóken sanoronhkwátsera, tánon takerihónhnien ne satsiawenhráhtsheras.

¹²⁵ Í꞉i ne sanhátsera í꞉ken; táskon ne kanikonhrahienthátsera, ne káti nahónton ahonkateriénhtarahne ne sarihonhnienhnítsheras.

¹²⁶ Óʼnen iehióhe ne Roiá꞉ner knahá꞉iere, asèken ne saianerénhsera tehiotsá꞉kon.

¹²⁷ Kenorónhkwa ne satsiawenhráhtsheras sénha tsi ní꞉ioht ne kwáh tiohiánere owistanórons.

¹²⁸ Tánon káti ít꞉sere akwékon ne saianerénhseras. Ít꞉sons akwékon ne wahétkens nihiotánions.

¹²⁹ Ne sarihonhnienhnísheras tsi nihiorihwahneráhkwat; katewenhnaráhkwa kwáh kerhiasakwékon.

¹³⁰ Tsi nikanikonraʼientátha ne sahrihonhnienhnítsheras tekaswathétha, tánon tsiakohawithénhnis natenikkonrahthokhátshera ronhnonháke ne ronhthatonkwetowahnáhtha.

¹³¹ Kwáh í꞉ken tsi tehiotenonhianíton tsi nikaskáneks ne sahtsiawenhráhseras kwáh tewahkerhiashishónkwa tsi natewahkatskaráhwenh.

¹³² Takatahónsahtat tánon takiténr tsi nishehiatséraʼse ratikwékon ne iesanorónhkwa.

¹³³ Takhekahanírat ne tiohianénhaf tsi nisarahráts꞉ton, tánon tó꞉sa satthóntat ne karihwahétken ahonkatsiatakwení꞉iosʼte.

¹³⁴ Takenónstat tsi nòkwah tsi niháti ne hionkeronhiakéntha, ne káti nahónton akatewénhnarakwe ne sahtsiawenhráseras.

¹³⁵ Tasahrihwaiérik nakonháke tsioríhwah tsi í꞉se konhióthenhse, tánon takerihónhnien ne saianerénhseras.

¹³⁶ Wé꞉so tsi watkaséntʼtho tsioríhwa nonhkweshón꞉has tsi iáh tehiontewenhnarákwa ne saianerénhsera.

¹³⁷ Í꞉se ne sarihwakwahríhshion, Ó Saiá꞉ner, tánon tkarihwaiéri í꞉ken ne sahiatorethátsheras.

¹³⁸ Ne kaianerénhseras ne thisatkáwenh kwáh kanánon karihwakwahrihshiónhtshera í꞉ken tánon orihwahkwékon orihwiʼiohónwe í꞉ken.

¹³⁹ Nakenhakwáhtshera wahkatsiathatsahátha kwáh tsi ní꞉ioht nótsire, tsioríhwa ne iónkʼshons iáh othènen karíhwa tehonhnónhnis ne shá꞉tsiawenhráseras.

¹⁴⁰ Tsi nahoténsons takarahrátstenhni kwáh í꞉ken tsi orihwí꞉io í꞉ken! Tsi niió꞉re tsi kerihwahnorónhkwah!

¹⁴¹ Iáh ní꞉ih tetsenhnowáhnen tánon ionkʼkenhrónhni, ók iáh kíʼ tewatkenhratáni ne sarihonnienhnítsheras.

¹⁴² Ne sarihwakwahrihshióntshera tsi nénhwe enkátake, tánon kwáh tsi nénhwe tsi ensharihwakwahrihshiónhake.

¹⁴³ Né tiatanáhnon ne takanikonhráhren tánon nahóntʼteronhne, ók né꞉ne sahtsiawenhráhseras tewakáwis nakattsenhnónhni.

¹⁴⁴ Ne saianerénhseras tiotkonhónwe tkarihwaiéri í꞉ken, táskon ne kaninkonraienthátshera ne nahónton akónnheke.

¹⁴⁵ Kwáh akerhiasakwékon tsi iakonhnáton; teskerihwasehrákwas, Ó Saiá꞉ner tánon kí enkatewénhnarakwe ne sahtsiawenhráseras!

¹⁴⁶ Iakonnáhton; tatiatanónstat, tánon kwáh enkatsénahwaste ne saianerénhseras.

¹⁴⁷ Ohénton shontakarahkwínekenhne iakonhnáton nastiénawase; thóh nónhwe niwahkérahre tsi nisharahrátston.

¹⁴⁸ Ashontakwékon tsi nitsiatiónhni iáh tewahkítas, ne kateweiénstha ne saianerénhsera.

¹⁴⁹ Tsioríhwa ne sanoronhkwáhtshera tsi iorihwatóken í꞉ken, takwahthóntet, Ó Saiá꞉ner; sehnést ne senhténhrat, tánon senónhstat tsi kónnhe!

¹⁵⁰ Ne rahtiniakátste ne ionhkeronhiakéntha ákta tahónhne; né꞉ne ronhnónhkwe ne iáh tehontsenawástha ne saianerénhsera.

¹⁵¹ Ók ní꞉se tiatákkta í꞉ses, Saiá꞉ner, tánon akwékon ne sahtsiawenhrasera tsi iorihwaniron í꞉ken.

¹⁵² Wahónhnise tewahkarónhken ne saianerénhseras. Ne shonhniáton ne tsi nénhwe enkénhake.

¹⁵³ Satkátho nakeronhiakénhsera, tánon tatsiatanónstat, tsioríhwa tsi iáh tewatkenrahtaníhon ne saianerénhsera.

¹⁵⁴ Tásehne nakerihwahshónhas, tánon saskatatewenhniʼióseron; tatsiatanónstat, tsi kíʼni sahrahrátston.

¹⁵⁵ Ne kaiatakenéhtsera aí꞉nonhnióre í꞉tewes ne ronhnonkwetaʼhétkens raotirihwáke, asèken iáh kí tehontewenhnaráhkwa ne saianerénhseras.

¹⁵⁶ Tsi natehiotenonhianíton ne senhtérat í꞉ken Ó Saiá꞉ner, táskon natónnhets ne tsi nitewéhtha ne saiatorethátshera.

¹⁵⁷ Tsi nihonatsiokowánen ne iónkshons tánon ionhkeronhiakéntha, ók iáh kí tewakerihwanórons nakatewénhnarahkwe ne saianerénhseras.

¹⁵⁸ Tsi enkhehiatkátho ne iáh tehotíien ne tewehtákwen. Ionkhonnaksátha, tsioríhwa tsi iáh othènen tehonónhni tsi nòkwah ne sahtsiawenhráseras.

¹⁵⁹ Satkátho tsi nikenorónhkwa ne saianerénhseras, shenónstat tsi kónnhe ne tsiohianénhaf ne sáwenk kanoronhkwáhtshera.

¹⁶⁰ Né tsi werhiá꞉saien ne saianerénsera kwáh oriwiʼiohónwe í꞉ken, tánon akwékon ne sarihwahkwarihshiónhtsheras ne sarihwenhthátsheras tsi nénhwe enkátake.

¹⁶¹ Ne sahkotihénhtenhse tahionkatsiatónhti né꞉ne kwáh iáh othénnen tetsiorihonhníhon, ók kí kerihwakweniénstha ne saianerénhsera.

¹⁶² Tsi nió꞉re tsi wakatʼtsenhnónhni ne tkarihónhnis tsi nisahrarátsʼton kwáh né nónhkak wahetsénhri ahtsokowátsera.

¹⁶³ Ítshons tánon kenhrónhni akwékon nonhó꞉wens í꞉ken, ók kenhorónhkwah ne saianerénhsera.

¹⁶⁴ Tsáta niʼiohrihwáke ne sewenhnísera tekonhnonwerátons, né tsi niʼioterihwakwaríhshion ne saiatorethátseras.

¹⁶⁵ Tsi nihiákon ne ienorónhkwah ne saianerénhsera kwáh hioianereʼónhwe tsi nihiakoianerasthénhni, tánon kwáh iáh othènen takakwéni nahiakoteraskwatsáthen.

¹⁶⁶ Í꞉se kón꞉rare nahonsastsatáko, Saiá꞉ner, tánon thóh niwahtierenhátie tsi nisarihwatátonh.

¹⁶⁷ Katewenhnarákwahs ne sarihonhnienhnítseras; kwáh kerhiasakwékon tsi kenorónhkwah.

¹⁶⁸ Katewenhnaráhkwas ne sarihwatátʼtseras ó꞉ni ne saianerénhseras. Akwékon niesatkáthos tsi nikatiérah.

¹⁶⁹ Satthóntet tsi natekaséntʼtos niahónwe ne sahénton, Ó Saiá꞉ner; táskon ne kanikonrahienthátshera tsi nitewètha ne sawénhna!

¹⁷⁰ Satahónsatat nahkaterénnahient, tánon tatsiatanónstat tsi nitewèhtha ne sawénhna.

¹⁷¹ Kwáh tiotkonhónwe tsi thenkonhnonweratónhsehke, tsioríhwa tsi takerihonhniénhni ne saianerénhseras.

¹⁷² Né thenkerihwákwahte ne saianerénhsera, tsioríhwa ne satsiawenhrásera tsi tkarihwahiéri í꞉ken.

¹⁷³ Tiotkonhónwe satateweienhnentahónhak nastiénawahse, tsioríhwa tsi ne ít꞉sehre ne satsiawenhráseras.

¹⁷⁴ Tsi natewahkatonhwenhtsóni ne saienawahséhtshera Ó Saiá꞉ner, ketsénhries natsenhnonhniátshera ne saianerenhserákon.

¹⁷⁵ Táskon natónnhets, ne káti nahónton takonhnonweráton; nahónton ne sarihonhnienhnítshera ahontiénawaʼse.

¹⁷⁶ Éhʼrenh wahkéton tsi ní꞉ioht ne teionakaronhtónha iohtsiatatónhon shatsatísak ne sanhátshera, tsioríhwa tsi iáh tewakkenronhníhon ne sahtsiawenhrásera.