Psalms 118 - Ohiatonhseratokénti

Né꞉ne Karén꞉na Natesenhnié꞉tshera

¹ Ó tetsisewaʼnonweráton ne Roiá꞉ner, asèken thorihwaʼiéri; ne iorihwaʼtóken raonoronhkwáhtshera kwáh tsi nénhwe enkénhake!

² Ánion nʼIsraerʼró꞉nons ronhníron, “Né iorihwatóken raonoronhkwáhtshera kwáh tsi nénhwe enkénhake.”

³ Ánion ne ratitsihénstatsis ronhníron, “Né iorihwatóken raonoronkwáhtshera kwáh tsi nénhwe enkénhake.”

⁴ Ánion tsi nihiákon ronhwaʼrihwaʼkweniénstha ne Roiá꞉ner ronhníron, “Nʼe iorihwaʼtóken raonoronhkwáhtshera tsi nénhwe enkénhake.”

⁵ Ne tsi niwaʼkenikonraronhiákenhkwe iahináton ne Roiá꞉ner; ne Roiá꞉ner waʼthakerihwaʼserákwahse tánon thóh nón꞉we nahakíteron tsi nón꞉we niwaʼtenatowáʼnen.

⁶ Né Roiá꞉ner tsi í꞉ih nokwáhti í꞉rate iáh tewát꞉terons. Nahóten ahiekwéni nónka ne oʼthènen naiontiérahse?

⁷ Né Roiá꞉ner í꞉ih nó꞉kwahti í꞉rate né nahatiénawahʼse.

⁸ Sénha ne ioiánere Roiá꞉ner nokwáhti iasatekwáhsen tsi ní꞉ioht nahisanikonraʼníronhke rononháke ne ronhnónkwe.

⁹ Sénha ne tsoiánere rahonháke ne Roiá꞉ner nón꞉we iasatekwáhsen tsi ní꞉ioht né thóh nón꞉we nahisanikonraníronhke ronhnón꞉hake ne rontinontí꞉ios.

¹⁰ Rononhontsaʼkwékon tehionkatiathátonhkwe; raosénhnakon ne Roiá꞉ner tsi waʼkhehiátonhte!

¹¹ Waʼtionkehonhwaʼrónhni, kwáh tsikthontahatiʼiérate tsi waʼtionkehonwaʼrónhni; raosénhnakon ne Roiá꞉ner tsi wakehiátonhte!

¹² Thóh ní꞉ioht tsi waʼtionkehonwaʼrónhni tsi ní꞉ioht notsinakontakwáhne; waʼthonréni kwáh tsi ní꞉ioht nó꞉nen nohíkta iotékha; raosénhnakon ne Roiá꞉ner tsi waʼkhehiátonhte!

¹³ Ioshástsʼte tsi ní꞉ioht tsi iahóntreʼke óʼnenh thó꞉wa sahionkesénhni, ók kíʼ Roiá꞉ner waʼhatiénawahse.

¹⁴ Roiá꞉ner seh nakeshastsʼténhsera tánon kashaststenhserowáhnen í꞉ken; rahónha natienawaʼséhtshera rotónhon.

¹⁵ Kwáh í꞉ken tsi karenhní꞉ios rotirénhnaiens ne natesenhniétshera í꞉ken ne raonatosehrákons ne thonhnonkwetaiéris: “Né saweienhtethákwen nahanentʼtsáti ne Roiá꞉ner né iakosénhnies;

¹⁶ ne saweientethákwen nahanentʼtsáti ne Roiá꞉ner ronenhtsakaraʼtáton; ne saweientetákwen nahanentʼtsáti ne Roiá꞉ner ne iakosénhnies.”

¹⁷ Iáh kíʼ thaʼkíheie, ók enkónnheke kíʼ, tánon kíʼ enkatró꞉ri tsi nahoténhsons rohioténhen ne Roiá꞉ner.

¹⁸ Né Roiá꞉ner kwáh í꞉ken tsi waʼhakréwaʼte, ók iáh kíʼ tiehakatʼkáwen tsi nòkwah ne kenhéion.

¹⁹ Teskenonhóntsiens ne tsi iotenhenrakáronte ne karihwakwahrishióntshera, né꞉ne thóh nón꞉we nahónton iakatáwehiaʼte tánon tahinonhweráton ne Roiá꞉ner.

²⁰ Né kí꞉ken ne tsi rotenhenraká꞉ronhte ne Roiá꞉ner; ne tionkwetaiéri thóh nón꞉we ienhiontáwehiaʼte.

²¹ Tekonhnonwerátons tsi waʼteskerihwaserákwahse tánon í꞉se natienawaséhtshera wasáton.

²² Nonénhia ne ratinonsónhnis rotikenronhníhon né kanenhiakwení꞉io iahónton ne tsi tekahiósaien.

²³ Né kíʼ kén ne Roiá꞉ner thóh nihorihwakanonníhon; kwáh í꞉ken tsi iorihwaʼnerákwat nahiontʼkátho.

²⁴ Né kíʼ ken ne Roiá꞉ner rahonhniseríhshon; áhnion tewaʼtonhnáren tánon thóh nón꞉we nitewatenikonhró꞉ri.

²⁵ Takwahnóns꞉tat, kwahnithénhtase, Ó Saiá꞉ner! Ó Saiá꞉ner, kwahnithénhtase, tastion nahionkwahianerásthen!

²⁶ Iakotáskats nón꞉ka éntsien raosénnakon ne Roiá꞉ner Wakwahiatatériste thóh Raononsatokentikówaʼne ne Roiá꞉ner.

²⁷ Né Roiá꞉ner né꞉ne Rawenni꞉io i꞉ken, tánon rahónha teshonkwáhwi ne kaswatthétshera. Ohénton nontasewáhaf ne karihwiʼioseokónhas, tánon ietsienharáʼkwahke iasewáʼren.

²⁸ Í꞉se Nakení꞉io í꞉ken, tánon kwáh í꞉se thenkonhnonweráton; í꞉se Nakení꞉io í꞉ken, kwáh kíʼ enkonsenhnakará꞉thaʼte.

²⁹ Ó thetsisewaʼnonweráton ne Roiá꞉ner, asèken thorihwaiéri, asèken ne iorihwaʼtóken raonoronhkwáhtshera tsi nénhwe enkénhake.