Psalms 115 - Ohiatonhseratokénti

Ne Iáh Othé꞉nen Teiotishatstenserá꞉ien Kaiatónhnis tánon ne tsi Nateotenonhianì꞉ton ne Rawenni꞉io

¹ Iáh nontionháke, Ó Saiá꞉ner, iáh nontionháke, ók sahsénhna táhson ne kaiatanerakwáhtshera, asèken ne aorihónhniat ne sáwenk iorihwaʼtóken kanoronhkwáhtshera tánon ne sarihwaʼtokentítshera.

² Nontié꞉ren nonkweshón꞉has tsi iónhton, “Kaníres ne Raotiní꞉io í꞉ken?”

³ Nón꞉kwah Ní꞉io karonhiáke nón꞉we thénteron; thóh nihaiéra kwáh tsi nenhthanón꞉wehne.

⁴ Né raotihiatonnhisónhas kawistaráken tánon owistanórons í꞉ken, ónhkwe akosnón꞉sa ióshon.

⁵ Ratisahkáronʼte, ók iáh kí tehontátis; tehatikarathárons, ók iáh kiʼ tehatíken.

⁶ Tehonhontakarónhtons, ók iáh kíʼ tehonát꞉thonhte; ratinionshónhton, ók iáh kíʼ othènen tehotíswas.

⁷ Tehontsanónhtons, ók iáh kí othènen tehontʼthó꞉kas; tehonshitónhtons, ók iáh tehonthéntses; iáh othènen tehontʼtsarokwáhʼtha ne ratiniakwákes.

⁸ Tsi nihiákon né ronhnón꞉ha ronhatsiaʼtonhniseríhson kwáh kíʼ né teshontsérens; ó꞉ni tsi niʼiákon né꞉ne ronhwaʼtiniahésen.

⁹ Ó Israel, thatsetakwénhak ne Roiá꞉ner! Rahónha ne sakoiénawase tánon rahónha né raonáwenk í꞉ken ne teionatastákwah.

¹⁰ Ó tsi sanónshoʼte Aaron, tatsetakwénhak ne Roiá꞉ner! Rahónha ne sakoiénawaʼse tánon rahónha né raonáwenk í꞉ken ne teioniatastákwah.

¹¹ Í꞉se ne tsi sewaʼkweniénstha ne Roiá꞉ner, tatsisewetakwénhak! Rahónha ne sakoiénawase tánon rahónha né raonáwenk í꞉ken ne teioniatastákwah.

¹² Né Roiá꞉ner kwáh seh shonkweiáre; kwáh enshonkwahiatatérisʼte; kwáh ensakohiatateriste nʼIsraerʼró꞉nons; tánon ratikwékon ne Rawenni꞉io raotsihenstatsishónhas;

¹³ kwáh ensakohiatatériste tsi niʼiákon ronhwaʼkweniénstha ne Roiá꞉ner, tetsarónh꞉kwen í꞉ken ken naiákasʼke khés naiekowaʼnénhke.

¹⁴ Aiáwens ne Roiá꞉ner aientsiokowáʼnaste, tesehnitsáron í꞉se tánon ne seiohokónha.

¹⁵ Aiáwens ahiaiatatériste ne Roiá꞉ner, né꞉ne róshon tsi karonhiáte ó꞉ni tsi ionhontsáte.

¹⁶ Né tsi karonhiáte né꞉ne Roiá꞉ner raówenk í꞉ken ne tsi karonhiátes, ók ne tsi ionhontsáte ónhkwe nenhné꞉e tesakówi.

¹⁷ Né iakawenhéion iáh nenhné꞉e tatehonwanonwerátons ne Roiá꞉ner, khés tsi niʼiákon iehiakotsnénhton ne tsi tsohóntsaien ne kenhéion.

¹⁸ Ók tsi nítsion ne shé꞉kon tionnhétie tenhtsitewaʼnonweráton ne Roiá꞉ner kénhen ienwaʼtásahwen tánon né꞉ne tsi nénhwe enkénhake. Tehonwaʼnonweráton ne Roiá꞉ner!