Psalms 103 - Ohiatonhseratokénti

Taiontenonhwerá꞉ton Ne Rawenni꞉io tsi niohiánere

Né꞉ne Táwit raorénhna.

¹ Kwáh thenhinonhweráton ne Roiá꞉ner, Ó akwahtón꞉nhets! Tánon kwáh akwatonnhetsheraʼkwékon, tsi thenkatenonhweráton ne raosenhnatokénti!

² Kwáh thenhinonhweráton ne Roiá꞉ner, Ó akwatónhnhets, tánon tiotkonhónhwe sewehiárak tsi nikaiothenhseríhio rohióthens—

³ rahónha sahkenikónhrenhse akwékon nakerihwaʼnerahák꞉tsheras, rahónha sahketsiéntha akwékon ne akekhratarihné꞉tsheras,

⁴ Rahónha sahtiatákwas ne kenheiátʼne, rahónha rakanonhwaʼró꞉roks ne kanoronkwáhtshera ó꞉ni natanithénron,

⁵ rahónha thakatkawénhnis ne ioiáneres kwáh tsi nikaríwes enkónnheke né káti ne tiókonhte ahontonhtionhionháka tánon akesháststeke tsi ní꞉ioht nakweksʼkówa.

⁶ Né Roiá꞉ner tesakówis ne karihwakwahrihshiónhtshera tánon ne kaiánerenh ratikwékon tsi niháti ne iáh tetkarihwaʼiéri tsi nihonwaʼnatséraʼse.

⁷ Ronatónhni ne Mahís tsi nihotenikonhrón꞉ni tsi nenháiere, tánon sakorihwáʼwi nonkweshón꞉has Nisraeronónke nahiontkátho ne tehiotenonhianítons rahohiothénhseras.

⁸ Né Roiá꞉ner rotanithenráts꞉kon tánon torihwaʼiéri, iáh tehanakwahstóre tánon né raiáti ne iorihwaʼtóken kanoronkwáhtshera.

⁹ Iáh kíʼ tiókonhte tasakotewennaientón꞉sehke nonkweshón꞉ha, khés ne iahokontakwénhake tsi nénhwe ahonakwenhénhake.

¹⁰ Shonkwarewáʼtha tsi nihionkwahrihwáʼneren tánon tsi naʼtehionkwahterienhtaweriénhon, ók iáh kíʼ nonwénhton tsi kwáh natahionkwahthéntion.

¹¹ Tsi nitiótʼte ne tsi karonhiáte tsi eʼneken iotohestákwen ne tsi ionwenhtsáte, thóh kí natehiotenonianíton tsi nisakonorónhkwah tsi nihiákon ne ronhwaʼrihwaʼkweniénstha;

¹² kwáh tsi nió꞉re ne tsitkarakwínekens tánon tsi nió꞉re ne tsi iatewatʼtsénhthos, thóh kiʼ nió꞉re tsi éhʼren rohawíton nonkwarihwaʼnerahákʼtseras.

¹³ Tsi kiʼ ní꞉ioht ne kanísera tsi natesakoró꞉tons ne sakoiohokónhas, káti ne Roiá꞉ner thóh kíʼ natesakoró꞉tons tsi nihiákon ne ronwaʼrihwakweniénstha.

¹⁴ Asèken roteriénhtare tsi nahó꞉ten ionkhiʼiatonhniáton; réhiare tsi okènra nitewaʼhiatóten.

¹⁵ Tsi nòkwah ne tión꞉kwe, ne tsi ionkwahtenhniseraténions thóh nitewaʼiatótens kwáh né꞉ne óhonte; kwáh tsi ní꞉ioht ne iotsitsarará꞉kon ne kahentàke;

¹⁶ eʼthóhʼne watʼkáwerakwe tánon waʼkastátʼthaʼte, tánon kakʼtsakáhaʼwe, tánon tsi nón꞉we nikenterónhtakwe iáh othènen teskonwehiáre.

¹⁷ Ók kíʼ ne iorihwaʼtóken raonoronhkwáhtsera ne Roiá꞉ner né꞉nenhné꞉e tsi nénhwe enkénhake thóh nón꞉we nenhkaiénhthake né꞉ne tsi nihiákon ne ronhwarihwakweʼniénstha, tánon ne raorihwaʼkwarihshón꞉tshera kwáh kíʼ enkátake tsi waʼhatinekwenhsátatse ne ratiksaʼokónhas,

¹⁸ né꞉ne tsi nihiákon enhiontsénawasʼte ne raoterihwaʼsehronniátshera tánon nenhiakehiárahke thóh naiéhiere tsi nihorihwaʼtháton.

¹⁹ Né Roiá꞉ner thóh nón꞉we nihoʼtatkwahtakwénhni nakaiéntake ne raonitskwáhra ne karonhiáke nón꞉we, tánon né raonakerásehra kwáh tsikʼnonwéson tsi né tioniaró꞉taron.

²⁰ Tetsisewaʼnonweráton ne Roiá꞉ner, Ó í꞉se ne sewaʼronhiakeró꞉nons, í꞉se ne sewáʼsháststes ne sewaʼtewenhnarákwah tsi nihorihwaʼtáton, nisewaʼtahónsate tsi nahoténhsons ratónhnions.

²¹ Tetsisewaʼnonweráton ne Roiá꞉ner, sewaʼkwékons ne karonhiákes tisewaʼsháststes, í꞉se ne raonhatsheraókons, né thóh nisewaʼiéra tsi nihonikonhró꞉tens.

²² Tetsisewaʼnonweráton ne Roiá꞉ner, kwáh tsi nahoténhshons rosahánion, kwáh tsikʼnonwéshons tsi toniaró꞉taron. Teononweráton ne Roiá꞉ner Ó akwatónnhets.