Psalms 102 - Ohiatonhseratokénti

Né Nahonwaterennaiéhase ne Tsi Nén꞉we Ronhnonti꞉io Nashakoié꞉nawaʼse

Ne naterén꞉naient tsi niká꞉ien ne iakokarewá꞉ton, nó꞉nen iáh tesheshátste tánon wahonhnithénte rahohénton ne Roiá꞉ner .

¹ Satahónsatat nakaterén꞉naient, O Saiá꞉ner; tánon satʼthóntek tsi tekaséntʼthos né nastsiatakéna.

² Nó꞉nen tewaʼkanikónhrare, tó꞉sa éhʼren í꞉sek tsi nón꞉we níkes! Takwatahónsatat; iostóre teskerihwaʼserákwas nenhwenhniseráteʼke ne ienkonhnáton.

³ Asèken ne tsi niwaʼkathenhniseratenions waʼtohestha tsi ní꞉ioht nahiotsienhkwaronhnike, tánon natierónhta iotékha tsi ní꞉ioht nóʼtsire.

⁴ Thóh ní꞉ioht tsi katʼtókas tsi ní꞉ioht ne iohontát꞉then tánon ónhkat iakoratatséʼson; tánon kwáh iáh teskhekwanónhwats.

⁵ Tsioríhwa tsi nihiorakaréni tsi waʼkonhsèhna nastsienhshónhas kwáh iohnehwanénhtatʼse.

⁶ Kwáh thóh nitsiatóten tsi ní꞉ioht ne kaweró꞉kwaks ne iahonwenhtsiatʼthénhake nón꞉we nihanákere, ó꞉ni tsi ní꞉ioht ne kwareʼróha ne waʼtonhontsatʼsáton nón꞉we nihanákere.

⁷ Iáh tewaʼkítas; thóh nitiatóten tsi ní꞉ioht notsithénha kanonsakéniaʼte raráhte.

⁸ Tiotkonhónwe ne iónksons ionkenikonhratsáta; tsi nihiákon ne tehionkenonhwerátonskwe aksénhna rónstha tsi ronhtewenhnatʼsáta.

⁹ Asèken kahkénhrats tsi ní꞉ioht nahkenatará꞉ke; tánon akʼkáseri tewaʼtsésta tsi entʼnekíra,

¹⁰ né tioríhwa ne sateriatitkónhtsera ó꞉ni ne sanakwáhtshera; waʼtestsiátaʼkwe tánon aí꞉non nió꞉re iastiatónhti tsi ní꞉ioht nónhkak í꞉seh iahiakóti ne watkénston.

¹¹ Ne tsi kónnhe kwáh iostóre ienhwaʼtésa tsi kíʼ ní꞉ioht nokarasné꞉ha tsi waʼtasátara kénk tsénhwe nó꞉nen tahiokáraʼwe; thóh nitiatóthen tsi ní꞉ioht ne iahonhontát꞉then.

¹² Ók ní꞉se, Ó Saiá꞉ner, kwáh ensanontí꞉ioke tsi nénhwe enkénhake; ne sasénhna thenkawisásteʼke tsi waʼkawatsiratátse.

¹³ Kwáh thentéstaʼne tánon enshí꞉thenre ne Zion; ne tsi nikawistáhets ónhwe nashí꞉thenhre; tsi nikanáton ó꞉nenh iakáheʼwe.

¹⁴ Né sanhatsherahókons konhwaʼnorónkwah, iawerohátien tsi konwathónhton konhwénʼthenre iawerohátien tsi iorihwaʼiesáhon.

¹⁵ Né ronhnonhontsakeʼró꞉nons enhatitsaʼnísehke ne raosénhna ne Roiá꞉ner, ratikwékon ne ronhtinontí꞉ios ne tsi ionhontsáte enhatitsanísehke ne raoshaststénhsera.

¹⁶ Nó꞉nenh ne Roiá꞉ner enshatehnatónhni ne Zion nón꞉we; kwáh raoiatanerakwahtsherákon tsi enhathotáshion.

¹⁷ Kwáh ó꞉ni enhakwéniensʼte ne raonaterénhnaient ne tehiontkárhias, tánon iáh thaʼhakénhron ne raonaterénhnaient.

¹⁸ Áʼnion kahiatónhak kí꞉ken ne tsi nihohióthens ne Roiá꞉ner ne raotirihwáʼke ne tsi waʼkawaʼtsirathátse, né ká꞉ti nahónton ne iáh arèko teiakawenhnakeráton nonhkweshón꞉ha tahonwaʼnonhweratónsehke ne Roiá꞉ner:

¹⁹ Etʼtàke tahatkátho né꞉ne tsi nón꞉we thenthénteron né꞉ne kwáh tiót꞉te ít꞉ken, né꞉ne karonhiáke nón꞉we tahatkátho ne tsi iohontsáte,

²⁰ Waʼhothóntene tsi nihononhshéna ne ratinó꞉ton, ne nahonshaʼsakohiatotaʼríhshi tsi nihiákon ne iatehiorihwaʼientáhon nahonwaʼtinonwaʼrhiákon;

²¹ né ká꞉ti né raosénhna ne Roiá꞉ner nahiotʼró꞉rhiaʼte ne Zion nón꞉we, tánon tahonwaʼnonhweratón꞉sehke ne Jerusalem nón꞉we,

²² né nó꞉nen nonkweshón꞉ha skát꞉ne enhontkenhnísa, tánon ne tsi kanakerasehrakéron nahonwaʼsénhnaien ne Roiá꞉ner.

²³ Ákta né kenhéiatʼne niahatiathénhaʼwe; rawenhniserokerihátse nakenhnísera.

²⁴ “O akeNí꞉io,” ká꞉ton, “tó꞉sa iathatiathénhaf tsikʼsénhak shé꞉kon kénk nitewaʼtiónha, í꞉se ne sonhnhehónwe í꞉ken ó꞉ni kwáh tsi waʼhewaʼtsiratátse enkénhake.”

²⁵ Waʼhonhnisekówa tsi ná꞉he thesiskwáhere ne tsi ionhwenhtsáte, tánon kwáh í꞉se shaʼtshanáke sháston tsi nishá꞉shon ne tsi karonhiáte.

²⁶ Né tsi karonhiáte ó꞉ni tsi ionwentsiáte enwatohéstste, ók ní꞉se tsi né nénhwe ensónnheke; kwáh akwékon enwaʼkáionʼne ó꞉ni iahothènhnon tahonsakarihwasthátonhke tsi ní꞉ioht nathakwénia. Thensehténi tsi ní꞉ioht natakwénia, tánon enhontóhestste;

²⁷ Ók ní꞉se tiotkonhónwe ne shashónhna í꞉ken, tánon iáh nonwénhton tsiashatonhnók꞉then.

²⁸ Né sakotiʼiohokónhas ne sanhatsheraʼókons kwáh kíʼ skénnonk tsi enhonhnónnheke; né sakotiʼiohokónhas kwáh kíʼ sanonsthasherákon nón꞉we nenhonathathénhronke.