Psalms 101 - Ohiatonhseratokénti

Tsi Nihoraráts꞉ton Ne Ronnontí꞉io ne Ioriwató꞉ken ó꞉ni Tkariwaié꞉ri

Né꞉ne Táwit raorénhna.

¹ Kwáh ne thenkeríhwaʼkwe ne karihwaʼtokentítshera tánon ne karihwaʼkwarihshióntshera; tánon kwáh í꞉se khók tsi tenhkonrihwákwaʼse, Ó Saiá꞉ner.

² Kwáh né enkatéweienste nát꞉sehre ne tkarihwaʼiéri tsi ní꞉ioht tsi akónnheke. Kátke entése nastiénawaʼse? Kwáh thóh karihwaʼkwahrishionhtsherákon nón꞉we nenhkathénhti nakenónskon;

³ iáh thakatʼtónhtate nakatiátaren nahó꞉ten ne iáh tetkarihwaiéri ó꞉ni tsi nahóten ne iáh othènen tekariwástha. Khéshons tsi nihiákon ne iáh teiakorihwató꞉ken rahonháke ne Rawenni꞉io; kwáh enkheiaʼtsiatonhtákwahse.

⁴ Ne iáh tehioterhiasatʼkwéniens aí꞉non entkénhake nakonháke; iáh tatewaʼkatonhontsóni nakerihwaʼientéraʼne ne karihwaʼhetkénhsera.

⁵ Ónhka ne ataséhtonhke sakonikonhrakarewáʼtha ne tehonnonsanéken kwáh kí enhiʼiátonhte. Kwáh iáh taʼihiatáktsthaʼte ne rónhkwe ne ratatónhni ó꞉ni ratatkowáʼnen.

⁶ Kwáh enkherihwaʼníratʼtse tsi nihiákon ne iakorihwaʼtóken rahonháke ne Rawenni꞉io, ne káti nahónton skát꞉ne ahiakwenhterónhtake; ónhka thóh nón꞉we nenhiontahí꞉ta tsi ioháte ne tkarihwaʼiéri kwáh né enhiontióthenhse.

⁷ Iáh ónka ne rónkwe ne ranikonhrá꞉tha tahenterónhtake nakenónskon; iáh ónka ne ronó꞉wenhs thahontáre nakʼkénhton.

⁸ Kwáh niaʼtehioronhkhetseráke tsi enkhehiátonhte ratikwékon ne rotirihwáʼneren ne tsi ionhwenhtsáte, kwáh ratikwékon éhʼren enkhehiathenháwiʼte ne karihwaʼhetʼkénsera rotihióthens ne raonátakon ne Roiá꞉ner.