Psalms 1 - Ohiatonhseratokénti

Tiotʼhiatonhseratserénton Tkaroron Ne Teharihwaʼkwáhtha (Teharihwaʼkwáhtha 1—41) Né꞉ne Teiontenonweratónkwah Kaiatónhsera

¹ Iakotáskat tsi nihiákon iáh né tehiésehre tsi nishakonatenikonráhwis ne ronhnonkwetahétkens, khés né꞉ne ahiontʼthaítha né rotirihwáneren raonaháha, khés ó꞉ni nahonwanahtiatárahse tsi nihiákon ne kaierónhsera ronhiónhnis ne Rawenni꞉io.

² Khèʼkok, ronhnerientiʼióstha nahontewénhnarahkwe ne Roiá꞉ner raohianerénsera, kwáh tsiókonhte tsi rotiwenhnanóte ó꞉ni rononthonhniónkwas nahorihonhnienhnítshera niaʼtwenhniseráke tánon niaʼtehiokaraʼtseráke.

³ Né theshontiérens ne karonhtasónhas ne karonhthaientʼthósehron ákta tsi kahionhatátie, enwahianihiónten tsi niekáhes, tánon nahonerahtasónhas iáh tewastátʼthens. Kwáh tsi nenhóntiere tsi rotihianerasthénhnis.

⁴ Ók ne rotirihwáneren iáh né èhʼthoh tèhiot, né꞉ne teshontiéren tsi ní꞉ioht nahiónsehwe tsi iahó꞉te ieká꞉has.

⁵ Éhʼthoh ká꞉ti ne ronhnonkwetahétkens kwáh enhonwatiréwate nónenh ienkáhewe nahonwatiríhwenhte ne rotirihwánerenh kwáh iáh thaotinatʼtaiéntake tsi nón꞉we nihónhnes ne tionkwetaiéris.

⁶ Asèken ne Roiá꞉ner ranikonrahrá꞉tsies tsi rotihatátse ne tionkwetaiéris, ók ne tsi rotihatátsie ne hionkwetahétʼken thóh né nón꞉we nieiawéhnon tsi iohatátsie natkaronhniátshera.