Proverbs 8 - Ohiatonhseratokénti

Tekonwarénsarons Ne Attokháhtshera

¹ Satahónhsatat! Attokháhtshera tiakó꞉nonks. Ne tiorí꞉wa oh naiá꞉wenʼne naiesahronká꞉ten.

² Onontoharà꞉ke ákta tsi tiohá꞉te tánon tsi teiohahó꞉ken eʼthó ítkate.

³ Tsi ieiontaweiá꞉tha tsi tkaná꞉taien, tsi tioteʼenhrakahrón꞉ton tiakó꞉nonks:

⁴ “Kwaʼnekén꞉nis sewakwé꞉kon tkwén꞉nonks ne onhwentsaʼkehró꞉non.

⁵ Áreʼkok kenh tshiekaié꞉ri tsi nisateʼnikonhríson? Satéweienhst ahsateʼnikonhrísa. Tesatenonhwarorí꞉tonte kenh? Satéweienhst ne aiesaʼnikón꞉rote.

⁶ Satahónhsatat ne kwáh ionehrákwa akewennaʼshón꞉ʼa; tsi nahò꞉ten enkonhró꞉ri né꞉ne tkariwaié꞉ri.

⁷ Tsi nahò꞉ten ká꞉ton né꞉ne tó꞉kenhske; íkswenhs ne onó꞉wen.

⁸ Akwé꞉kon tsi nahò꞉ten entkatá꞉ti tó꞉kenhske; iáh tekaʼnikonhrhá꞉ton iáh oni thaʼiakoianáksaʼte.

⁹ Nónhka í꞉non iaʼteieká꞉nere akwé꞉kon kiʼ iakoʼnikonhraién꞉taʼs; nónhka akwé꞉kon iakoterién꞉tare akwé꞉kon tshiewé꞉ne.

¹⁰ Né꞉ʼe será꞉ko nahò꞉ten enkonrihónnien né꞉ne iá꞉we kahwistarà꞉ken; ne será꞉ko ne karihonnienníhtshera tsi ní꞉ioht ne kwáh tioiánere ohwistanó꞉ron.

¹¹ Í꞉ʼi ne Attokháhtshera, Í꞉ʼi sénha watiánere tsi ní꞉ioht ne ohwistanoronʼshón꞉ʼa; iáh oʼthé꞉nen thaʼtesatonhontsó꞉ni ne taionkhí꞉ren.

¹² Í꞉ʼi ne Attokháhtshera wakkaʼenionhtsherí꞉io; wátien ne karihonnienníhtshera tánon tetiaʼtorehthaʼtsherí꞉io.

¹³ Nó꞉nen entskwénienhsteʼ ne Roiá꞉ner, énhtswen kiʼ ne karihwáksen; íhkswens naʼkatkáhtho tsi nihatiweiennò꞉ten nónhka iontatón꞉ni, ó꞉ni ne karihwanéren tánon ne owennaʼshón꞉ʼa ne kaʼnikonhrhá꞉ton.

¹⁴ Eʼthó nitiéhrha tsi nahò꞉ten kateʼnikonhrón꞉nis. Wakeʼnikonhraientátskon tánon keʼshátste.

¹⁵ Kheiaʼtakéhnhahs rotinontiió꞉shon nahonterihwahténtiaʼte ne raotikoráhsera tánon ne ratikó꞉ra kaianerenhserí꞉io ahatiianerenhserón꞉ni.

¹⁶ Akwé꞉kon ne ratikorá꞉shon tsi ionhwentsá꞉te né꞉ʼe ronterihwahtentiá꞉tha ne raotinakerahserá꞉kon, akwé꞉kon tkatká꞉waʼs kaiaʼtakehnháhtshera, ók ó꞉ni ne ronaterihón꞉ton.

¹⁷ Khenorónhkhwa ónhka ionkenorónhkhwa; ne ónhka iontiaʼtíhsaks eniontiaʼtatshén꞉ri.

¹⁸ Kakwahtshéhtshera tánon kakwenienhstáhtshera, ataʼkaritéhtshera tánon kaianerehstáhtshera wátien naontakáhtkaʼwe.

¹⁹ Tsi nahò꞉ten entkón꞉ion ne sénha ioiánere tsi ní꞉ioht ne kwáh tioiánere aóskon ohwistanó꞉ron, ók ó꞉ni ne kwáh tioiánere aóskon kahwistarà꞉ken.

²⁰ Tsi tekatekhaháhkhwa né꞉ne tkarihwaié꞉ri; né꞉ʼe wakathahitáhkhe ne aterihwakwarihshionhtsherá꞉kon,

²¹ ahtshoʼkowáhtshera entekhé꞉ion nónhka ionkenorónhkhwa, thentká꞉raʼne raotinónhskon ne kanoròn꞉shon.

Attokháhtshera Shé꞉kon Ióhthare

²² Ne Roiá꞉ner í꞉ʼi ne kwáh tiotierenhtáhkwen ratiaʼtíson, né꞉ʼe tiohén꞉ton ne raoioʼténhseraʼshón꞉ʼa ne wahón꞉nise tkén꞉ne.

²³ Í꞉ʼi tioterénhton ratiaʼtíson tsi ní꞉ioht ne tsi nahoʼtén꞉shon rohsaʼáhnion ne shontontonhwentsatáhsawen.

²⁴ Ó꞉nen shiwakenakerá꞉ton tsi niió꞉re ne kaniataraʼkehkó꞉wa, tánon árehko sikahné꞉ko ne iáh thaʼteiohnekahiò꞉tsis.

²⁵ Ó꞉nen shiwakenakerá꞉ton tsi niió꞉re shiiononténion; ók ó꞉ni ne kenʼnikanontá꞉sa,

²⁶ tánon ohén꞉ton ne Rawenni꞉io shaʼronwentsísa tánon tsi kahentaké꞉ron ók ó꞉ni ne sewahtsà꞉na noʼkèn꞉ra.

²⁷ Eʼthó ié꞉keʼskwe shaható꞉kenhsteʼ tsi karonhiá꞉te, tánon ó꞉ni kaniataraʼshón꞉ʼa waható꞉kenhsteʼ tsi tetiatékhen,

²⁸ wahatokenhstánion tsi ioronhiarátieʼs tsi karonhiá꞉te, tánon wahahnhotón꞉ko ne kaniataraʼkehkó꞉wa tiohnaweró꞉ton ne ohnekaʼshón꞉ʼa,

²⁹ wahshakóhnhaʼne ne ohnekaʼshón꞉ʼa ne kaniataraʼkehkó꞉wa tóhsa sénha aontakahnekakará꞉tate tsik niió꞉re wahshakoríhon. Tho ié꞉keʼskwe ne shahrón꞉ni tsi nón꞉we nontoríshen nonhwéntsa.

³⁰ Skátne iákeneʼskwe, tsi shí꞉ken ní꞉ioht ne Í꞉ʼi akenón꞉wa akénhake, tahí꞉ion niaʼtewenhniserá꞉ke natonhnharáhtshera, tiótkon wakatonhnháhere tsi iákeneʼs—

³¹ Wakatonhnháhere tsi ionhwentsá꞉te tánon wakerienʼtí꞉ios tsi nonkwá꞉ti nonkwehshón꞉ʼa.

Attokháhtshera Shé꞉kon Ióhthare

³² Ó꞉nen ká꞉ti, ne kenʼnitisewaién꞉ʼa takwatahónhsatat, tho naʼsewá꞉iehr nahò꞉ten enkí꞉ron tánon ensewatonhnhá꞉ren.

³³ Sewatahónhsatat tsi nahò꞉ten waʼehtshirihónnien. Sewattókhak tánon tóhsa sewatié꞉saht nahò꞉ten wesewathón꞉teʼne.

³⁴ Nónhka enionkwatahónhsatate tánon— nónhka niaʼtewenhniserá꞉ke ionkehrhá꞉re tsi wakatehnhoká꞉ronte tsi nón꞉we nikì꞉teron eniakotohnhá꞉rake.

³⁵ Nónhka eniontiaʼtatshén꞉ri enietshén꞉ri ne iohnheʼón꞉we, tánon ne Roiá꞉ner enhawerienʼtí꞉io ne raotirihwà꞉ke.

³⁶ Nónhka iáh thaiontiaʼtatshén꞉ri eniontatkarón꞉ni; nónhka iónkswenhs konwanorónhkhwa ne kenhé꞉ion.”