Proverbs 5 - Ohiatonhseratokénti

Wathró꞉ris Tsi Iáh Tetkariwaié꞉ri Ne Aienahkwénhawe

¹ Konién꞉ʼa, satahonhsí꞉iohst tánon satahónhsatat nakwattokháhtshera tánon iekakaʼeniónhon.

² Thó꞉ne ó꞉nen ensató꞉kenhse tsi ní꞉ioht tsi ahsatoriahnerón꞉ko ne tkariwaié꞉ri, tánon ne sawén꞉na enwathró꞉ri tsi nisaʼnikonhrowá꞉nen.

³ Tókaʼ nakó꞉ren ró꞉ne tahshakonoronhkhwánion tókaʼ nón꞉wa thóh naʼteiotsikhé꞉tare tsi ní꞉ioht ne óshes tánon tenhonwanoronhkhwánion thóh ní꞉ioht né꞉ʼe naʼteiotsikhé꞉tare,

⁴ nok kiʼ nó꞉nen enwateweienén꞉taʼne nek kiʼ iaʼteniotátere ne iotskà꞉ra tánon ne karonhiakénhsera.

⁵ Thóh nón꞉we iensaiaʼténhawe tsi nón꞉we tionhwentsà꞉te ne kenhé꞉ion; Thóh nón꞉we niiothahitáhkhe tsi nón꞉we ne kenheiá꞉tne.

⁶ Iáh thóh nón꞉we teiothahitáhkhe tsi nón꞉we ne ionhnheʼón꞉we; wathaharákwas, tánon iáh teioterién꞉tare oh niiawenʼenhátie.

⁷ Sewatahónhsatat kwaienʼokón꞉ʼa tóhsa nonwén꞉ton sewaʼnikónhrhen tsi nahò꞉ten ká꞉ton.

⁸ É꞉ren íseweht kí꞉ken nikaiaʼtò꞉ten! Tóhsa nonwén꞉ton tsi kèn꞉teron niahà꞉sewe!

⁹ Tókaʼ thóh nienhénsewe, akó꞉ren ientséhawe ne kakwenienhstáhtshera ne í꞉se sewawenʼkénhen, ó꞉ni ne kenʼnitisewaion꞉ʼa tsi ensewénheie ne enhatirihón꞉ni né꞉ʼe iáh tehshakotitèn꞉rahs nón꞉kwe.

¹⁰ Hen, thiionkwè꞉tate ienhatíhawe satshoʼkowáhtshera, tsi nahò꞉ten saioʼtén꞉ʼen akó꞉ren akó꞉wen enskénhake.

¹¹ Sanaktà꞉ke enhshiaʼtión꞉nike saronhiá꞉ken tsi nishihé꞉ions, saʼwá꞉ron tánon shaierón꞉ta akwé꞉kon enwatekhwísa,

¹² tánon enhsí꞉ron, “Oh niiotié꞉ren tsi iáh nonwén꞉ton tshiakeweientéhtaʼne? Oh niiotié꞉ren tsi iáh nonwén꞉ton tewakathontá꞉ton nónhka aiontianakwaríhsi?

¹³ Iáh tewakatahonhsatá꞉ton ne ionkerihonnién꞉ni. Iáh oʼthé꞉nen karí꞉wa tekheión꞉ni.

¹⁴ Thontaiawénhstsi waʼkáttoke tsi kanén꞉rakon waʼkatatéhaʼte.”

¹⁵ Shekweniénhsthak ne tesenì꞉teron tánon ne sanoronhkhwáhtshera akaonhá꞉ʼa khók tashé꞉ion.

¹⁶ Nónhka akó꞉ren iakón꞉kwe shewirá꞉wi iáh kiʼ ní꞉se thé꞉nen thaʼshatshennonniátahkwe.

¹⁷ Ioterihwíson sheienʼokón꞉ʼa nó꞉nen enhontehiá꞉ron ne aiesaiaʼtakéhnha, iáh nakó꞉ren nón꞉kwe ne iáh tesheienté꞉ri.

¹⁸ Satshennonní꞉hak ká꞉ti tsi saniá꞉kon tánon enhsetshén꞉ri atonhnharáhtshera tsi kí꞉ken iakón꞉kwe seniniá꞉kon—

¹⁹ iakonkweʼtí꞉io tánon iakoiaʼtáhskats tsi ní꞉ioht ne ohskenón꞉ton, nó꞉nen iotoriahnerónkwas. Sheríhon nakowén꞉na aonté꞉son atshennónnia; tsheríio ká꞉ti ne taiesahwaʼná꞉ke nakonoronhkhwáhtshera.

²⁰ Konién꞉ʼa oh niiontié꞉ren nakó꞉ren iakón꞉kwe aontahshé꞉ion sanoronhkhwáhtshera? Oh niiontié꞉ren tsi ne sénha ahserá꞉ko ne ieieronʼtí꞉io nakó꞉ren ró꞉ne?

²¹ Roiá꞉ner akwé꞉kon tehaká꞉nere tsi nihsatiéhrha. Tsi nón꞉we nienhén꞉se, iaʼnikón꞉rare.

²² Rotirihwanéren raotiioʼténhsera tho ní꞉ioht tsi ní꞉ioht ne waterístaien. Ne iohontiá꞉tenhke tsi rotirihwanéren.

²³ Enhonníheie ne tsi iáh thahatikwé꞉ni nahontatié꞉na. Tsi niió꞉re tsi rotinonhwahró꞉ri ne ká꞉ti iohsnó꞉re enhonthahíta tsi iontatiaʼtataʼáhstha.