Proverbs 4 - Ohiatonhseratokénti

Iakoiaʼtakéhnhas Attokháhtshera

¹ Kwaienʼokón꞉ʼa sewatahónhsatat tsi nahò꞉ten ne iaʼníha enhiarihónnien. Sewatahonhsí꞉iohst thó꞉ne ensewaʼnikonhraièn꞉taʼne.

² Tsi nahò꞉ten kwarihonnién꞉ni ioiánere, sewehià꞉rak ká꞉ti akwé꞉kon.

³ Né꞉ne shikeksá꞉ʼa í꞉ʼi khók rohskenʼrakéhte rotiwiraièn꞉tahkwe.

⁴ Rakeʼníha rakerihonnién꞉ni, wahèn꞉ron: “Sehià꞉rak tsi nahò꞉ten enkí꞉ron tánon tóhsa nonwén꞉ton sasaʼnikónhrhen. Tho ná꞉tsehr nahò꞉ten enkonhró꞉ri tánon enhshónhnheke.

⁵ Saièn꞉taʼn ne attokháhtshera tánon iekakaʼeniónhon! Tóhsa sasaʼnikónhrhen tókaʼ ó꞉ni é꞉ren ahshá꞉wihte tsi nahò꞉ten waʼkì꞉ron.

⁶ Tóhsa satewén꞉teht ne attokháhtshera eniesaiaʼtakéhnha; shenorónhkhwak tánon eniesanónhstate.

⁷ Naiesaién꞉taʼne ne attokháhtshera né꞉ʼe aonhá꞉ʼa tiorihowá꞉nen tsi nénhshiere. Tókaʼ ó꞉ia nahò꞉ten aiesaién꞉taʼne, ne kiʼ saièn꞉taʼn ne iekakaʼeniónhon.

⁸ Senó꞉ronhk attokháhtshera, né꞉ʼe ensahsennó꞉wanahte. Tsé꞉na tánon entí꞉son kakwenienhstáhtshera.

⁹ Í꞉se enhshié꞉na ne kaiaʼtanehrakwáhtshera.”

¹⁰ Satahónhsatat, konién꞉ʼa. Kwáh tokén꞉ʼen tsé꞉na tsi nahò꞉ten konhró꞉ris, karí꞉wes enhshónhnheke.

¹¹ Waʼkonrihónnien ne attokháhtshera tánon tkaié꞉rik tsi ní꞉ioht tsi ahsónhnheke.

¹² Iáh oʼthé꞉nen thaiesatrenhóhsten tsi sathahí꞉ne tókaʼ sarihwakwaríhshion, tánon iáh thaʼontesahsí꞉tiaʼke nó꞉nen tenhsaráhtate.

¹³ Tiótkon sehià꞉rak tsi nahò꞉ten wahseweientéhtaʼne. Kaweientehtáhtshera né꞉ʼe ensonhnhéhkwen—senónhstat ká꞉ti.

¹⁴ Tóhsa thóh nón꞉we iahá꞉se tsi nón꞉we iehonnéhtha ne rotirihwanerenʼákskon. Tóhsa ne shéhsehr tsi nihatiweiennò꞉ten ne iáh tethotirihwaié꞉ri.

¹⁵ Tóhsa thóh ná꞉tsehr! Satatiaʼtohtáhrho tsi nón꞉we iáh tetkariwaié꞉ri! Tóhsa tsé꞉na ne ioʼtáksen! Kwáh nek ne tesatháhak.

¹⁶ Rotirihwanerenʼákskon iáh thahatikwé꞉ni nahotí꞉taʼwe tsik thé꞉nen nenhóntiere ne iáh tetkariwaié꞉ri. Ratiiaʼtión꞉ni tánon iáh tehotí꞉taʼs ne tsi iáh ónhka tehshakotikarewáhton.

¹⁷ Rón꞉nehre karihwaksénhtshera tánon ateriiohseraʼón꞉we né꞉ʼe shá꞉ka ne kákhwa tánon nahò꞉ten ahatihnekí꞉ra.

¹⁸ Kí꞉ken oháha ronthahí꞉ne thotirihwaié꞉ri thóh ní꞉ioht tsi shí꞉ken takarahkwínekenʼne, sénha teioswatheʼonhátie tsi niió꞉re entiehkè꞉ne én꞉wawe.

¹⁹ Né꞉ʼe raotiháha né꞉ʼe rotirihwanéren thóh naʼtetió꞉karas tsi ní꞉ioht nahsonthén꞉ne né꞉ʼe tenhatihraʼkwénhtaraʼne ne tsi iáh thahóntkahtho nahò꞉ten tahonahsì꞉tiaʼke.

²⁰ Konién꞉ʼa satahonhsí꞉iohst tsi nahò꞉ten enkí꞉ron. Satahónhsatat nakewennaʼshón꞉ʼa.

²¹ Tóhsa nonwén꞉ton sasaʼnikónhrhen. Sehià꞉rak tánon serià꞉ne sateweién꞉ton.

²² Akewennaʼshón꞉ʼa entkáhawe natónhnhets tánon ataʼkaritéhtshera ne ónhka eniakoʼnikonhraién꞉taʼne.

²³ Seʼnikón꞉rarak tsi ní꞉ioht tsi sanonhtónnion; tsi sónhnhe ne kaieronnítstha tsi ní꞉ioht tsi sanonhtonniónkwahs.

²⁴ Tóhsa nonwén꞉ton tsì꞉ron nahò꞉ten iáh tó꞉kenhske té꞉ken, tóhsa thé꞉nen satsté꞉rihst nahò꞉ten ne onó꞉wen tánon ne owennaʼshón꞉ʼa naiesathaharákwahte.

²⁵ Énska tsi nón꞉we iaʼsatkáhtho saʼnikonhrahnirónhak tsi sarihwakwaríhshion; tóhsa tasatenià꞉renht nahsatéhen.

²⁶ Ioianeréhak tsi ní꞉ioht tsi enhsateʼnikonhrísa tánon tsi nenhsátiere akwé꞉kon entkaié꞉rine.

²⁷ Satatiaʼtohtáhrho ne karihwanéren tánon iottakwarihshiónhak tsi sahtén꞉ti. Tóhsa ó꞉ni ne tsoʼkháha ákte nahsahtén꞉ti tsi nón꞉we niiohahí꞉io.