Proverbs 3 - Ohiatonhseratokénti

Iakoʼnikonhrá꞉wis Ne Kenʼnithotiién꞉sa

¹ Konién꞉ʼa tóhsa sasaʼnikónhrhen tsi nahò꞉ten enkonrihónnien. Tiótkon sehià꞉rak thóh náhshiere tsi nahò꞉ten enkonhró꞉ri.

² Tsi nahò꞉ten enkonrihónnien, karí꞉wes enhshónhnheke tánon ensakwáhtsheʼne.

³ Tóhsa nonwén꞉ton sáhtkahf ne ioiánere tsi nihsheiatierá꞉se nonkwehshón꞉ʼa tánon sarihwatokénhak. Swánerenʼk seniarà꞉ke, tánon serià꞉ne shiá꞉ton.

⁴ Tókaʼ tho nénhshiere, Rawenni꞉io tánon nonkwehshón꞉ʼa kwáh í꞉ken tsi enhonerienʼtí꞉io.

⁵ Tsheniáhes Roiá꞉ner akwáh seriahsakwé꞉kon. Tóhsa nonwén꞉ton í꞉se satateniáhes tsi nahò꞉ten íhsehre saterién꞉tare.

⁶ Tshehià꞉rak ne Roiá꞉ner, akwé꞉kon tsi nenhsatieránion tánon enhianaʼtón꞉hahse tsi nahò꞉ten tkariwaié꞉ri.

⁷ Tóhsa nonwén꞉ton sanonhtonniónhak í꞉se kenh sénha sattókha. Kwáh nek ne tahtshéhtak ne Roiá꞉ner, tánon tóhsa sathón꞉tat kenʼniáhshiere nahò꞉ten iáh tetkariwaié꞉ri.

⁸ Tókaʼ tho náhshiere, kwáh né꞉ne toʼk nikanonhkwahtsherí꞉io naonsonnihnón꞉ni tsi sakarewáhton tánon ká꞉ron nenhseronhiá꞉ken.

⁹ Tshisewakweniénhsthak ne Roiá꞉ner aontàhtshon ne kwáh tioiánere tsi nahò꞉ten saienthókwen.

¹⁰ Tókaʼ tho nénhshiere tsi ieientáhkhwa ne ká꞉nen tentká꞉rake tánon só꞉tsi wé꞉so ensahnekaién꞉taʼne otsí꞉tsa sók iáh thaʼón꞉ton akwé꞉kon ahsateweién꞉ton.

¹¹ Konién꞉ʼa nó꞉nen Roiá꞉ner tenhiawénneke satahonhsí꞉iohst tsi wahiaronká꞉ten.

¹² Shakoriʼwakwarihshién꞉nis ne Roiá꞉ner nónhka shakonorónhkhwa ne ká꞉ti shá꞉ka nónhka iakowí꞉raien shakotinorónhkhwa enhshakotirihwakwaríhshien.

¹³ Iakotonhnháhere nónhka aieié꞉na nattokháhtshera, aieié꞉na ó꞉ni kaʼnikonraientáhtshera.

¹⁴ Ne sénha wé꞉so shaʼtékena attokháhtshera tsi ní꞉ioht kahwistarà꞉ken; sénha ne wé꞉so shaʼtékena ní꞉se sarihwà꞉ke tsi ní꞉ioht ne ohwistanó꞉ron.

¹⁵ Attokháhtshera sénha wé꞉so shaʼtékena tsi ní꞉ioht nohwistanoronʼshón꞉ʼa; iáh oʼthé꞉nen thaʼtaiesatonwéntsohse ne táhseren.

¹⁶ Attokháhtshera tiakó꞉wis naiakonhnhé꞉son tánon kakwenienhstáhtshera tánon kakwahtshéhsera.

¹⁷ Attokháhtshera entkáhawe ne ionʼwé꞉sen tsi ahsónhnheke eʼthó niensaiaʼténhawe tsi nón꞉we aiesaiaʼtanónhstate tsi iathenshotʼkawe.

¹⁸ Nónhka aieié꞉na attokháhtshera ronatonhnháhere; attokháhtshera entiaka꞉wen natónhnhets.

¹⁹ Raottokháhtshera ne Roiá꞉ner wahronhwentsísa; né tsi nihoʼnikonhrowá꞉nen waható꞉kenhsteʼ tsi karonhiatátie.

²⁰ Raottokháhtshera takáhawe tsi kaniataratátie tánon ioronhiarátie ohtsiʼkeraʼshón꞉ʼa entkáhawe naiokén꞉nore nonhwentsà꞉ke.

²¹ Konién꞉ʼa saienawaʼkónhak ne sattokháhtshera tánon ne sakaʼeniónhtshera. Tóhsa nonwén꞉ton sá꞉ti.

²² Ne entiesá꞉ion ne satónhnhets naionʼwesénhake tánon aiesatonhnhá꞉rake.

²³ Skén꞉nen tsi nienhense tánon iáh nonwén꞉ton thé꞉nen thaʼtaiesahniotá꞉ko.

²⁴ Iáh thaiesáhteronʼne ne nó꞉nen ensentá꞉fa, tánon ensaserentí꞉ioʼne tsi niwahsón꞉tes ensèn꞉taʼwe.

²⁵ Tóhsa tesatateʼnikonhrhá꞉ren ne thaʼontaiawénhstsi ne atkaronniáhtshera aontá꞉we tsi ní꞉ioht ne takaweratá꞉se ne ahotí꞉raʼne ne rotirihwanerenʼákskon.

²⁶ Roiá꞉ner enhiaiaʼtanónhstate. Iáh thahathón꞉tate ne iahshià꞉tenʼne tsi nón꞉we tewaterístaien.

²⁷ Nó꞉nen ensatehshennaién꞉taʼne sheiaʼtakéhnha nónhka teiotonhwentsóhon.

²⁸ Tóhsa nonwén꞉ton ne tetsanonhsané꞉ken natsro꞉ri “Satehrhá꞉rat tsik enióhrhenʼne,” tókaʼ sakwénion ne óksaʼk ahsheiaʼtakéhnha.

²⁹ Tóhsa oʼthé꞉nen serihwísa nahò꞉ten nahshekaré꞉wahte ne tesewanonhsané꞉ken né tsi iesaniahé꞉sen.

³⁰ Tóhsa ónhka tesewariʼwakéhnha akohrèn꞉shon ne iáh oʼthé꞉nen thiaʼteioríhonte aseʼkénh ní꞉se iáh nonwén꞉ton teiesakaronní꞉ʼon.

³¹ Tóhsa sheiatenʼkéhfahs ne ionkweʼtáksenʼs tókaʼ ó꞉ni ahsateʼnikonhrísa tho náhshiere tsi nihontiéhrha.

³² Ne tsi ne Roiá꞉ner ráhswenhs nónhka iáh tetiakorihwaié꞉ri nok ne tionkweʼtaié꞉ri kwáh otokén꞉ʼen tsi entehshakawéhtahkwe.

³³ Roiá꞉ner enhà꞉ren kahrewahtáhtshera tsi nón꞉we nihatì꞉teron ne rotirihwanerenʼákskon nok enhaiaʼtaté꞉rihste tsi ratì꞉teron ne tionkweʼtaié꞉ri

³⁴ Iáh oʼthé꞉nen tehshakoniahé꞉sen ne iená꞉ie nok shakorihwakweniénhstha nónhka iakoniténhton.

³⁵ Nón꞉kwe ionttokhahtsherí꞉io eniontatshennakará꞉tate nok nónhka iáh teionttókha nek nen né꞉ʼe enhontatshennáksaʼte.