Proverbs 29 - Ohiatonhseratokénti

¹ Tókaʼ sénha enhsatenontsistahní꞉rate tsi ní꞉kon ónhka aiesarihwakwaríhshion, éntewe nenhnísera akwáh tokén꞉ʼen ensateraʼswáksenʼne tánon iáh nonwén꞉ton thaonsahsatonhnhakwatá꞉ko.

² Takenaʼtón꞉hahs thorihwaié꞉ri ne rakorahseraʼkweʼní꞉io tánon enkonnaʼtón꞉hahse ronatonhnháhere nón꞉kwe. Takenaʼtón꞉hahs ne iáh tetionkweʼtaié꞉ri ne rakorahseraʼkweʼní꞉io enkonnaʼtón꞉hahse nón꞉kwe ne iáh tehonatonhnháhere.

³ Tókaʼ tehserénhsarons ne attokháhtshera enhninaiéhake ne iesaién꞉ʼa ní꞉se sarihwà꞉ke. Teiotenonhwarorí꞉tonte ahsathwistatié꞉sahte ne waʼthonwisenʼtsheráksenʼs akontirihón꞉ni.

⁴ Nó꞉nen ronontí꞉io tehotateʼnikónhrhare naterihwakwarihshiónhtshera aorihwà꞉ke, enkaʼshátsteke ne kanakeráhsera, nok tókaʼ ohwísta khók tehoʼnikónhrhare enhentáksaʼte tsi ranákere.

⁵ Tókaʼ tenhsherenhsarónnion ne sewatenroʼshón꞉ʼa, tánon ne saʼnikòn꞉rakon iáh thoʼté꞉ioht í꞉se ienhsatatiató꞉roke tsi waterístaien.

⁶ Nón꞉kwe ionkweʼtahétken raotirihwanerenʼáktshera ienhotiià꞉tenhte tsi waterístaien, ók ne tionkweʼtaié꞉ri ronatonhnháhere tánon rontatewenní꞉io.

⁷ Ne tiakorihwaié꞉ri iakoterién꞉tare tsi nihotiianerenhserò꞉ten ne rotí꞉ten, nok ne iáh tetionkweʼtaié꞉ri iáh nen né꞉ʼe tehotiʼnikonhraién꞉taʼs kí꞉ken nikarihò꞉tenʼs.

⁸ Nón꞉kwe ne iáh oʼthé꞉nen tehshakonón꞉ni nakohrèn꞉shon enwá꞉ton kanatakwé꞉kon tsi tenhonniʼtónniaʼte. Nok ne ronteʼnikonhrattókha skén꞉nen ronnón꞉nis.

⁹ Nó꞉nen ónhka teiakoʼnikonhráthe tsi teieiaʼtorehtáhkhwa enhonwahiatónhseron ne tehotenonhwarorí꞉tonte, nek ne roiéshon tánon iorakaré꞉ni tsi ni꞉iot tsi enhatonkweʼtáksaʼte.

¹⁰ Nón꞉kwe ne ronteriiohseranón꞉we shakotíhswenhs nónhka iakorihwakwaríhshion, nok ne tionkweʼtaié꞉ri enhshakotiiaʼtanónhstate ne iakorihwakwaríhshion.

¹¹ Nón꞉kwe ne iáh thaʼtehotiʼnikonhráthe iáh tehonhséhtha ne raotinaʼkhwénhsera, nok ne ronttokhahtsherí꞉io rotiʼnikonhrí꞉io enhatikwé꞉ni nahontatié꞉na.

¹² Tókaʼ ne rakó꞉ra enhatahónhsatate ne orihwaʼshón꞉ʼa wanowénhton akwé꞉kon ki enhotinowénhake ne ronwaióʼtenhse.

¹³ Iakó꞉ten tánon ne shakotenʼtestén꞉ni ne shá꞉ka, tetsà꞉ron Roiá꞉ner tehshakó꞉wi nokà꞉ra nahiatkáhtho.

¹⁴ Tókaʼ ronontí꞉io entehshakóhnhe ne rotí꞉ten ne raotiianerénhsera, karí꞉wes kiʼ enhoterihón꞉take.

¹⁵ Ahsherihwakwaríhshien tánon ahsheháharate ioiánere ne ratiksaʼokón꞉ʼa, raotirihwà꞉ke. Tókaʼ ronnónha enthonnónhton enhshakonatéhaʼte ne shakotiʼnisténha.

¹⁶ Nó꞉nen nón꞉kwe ionkweʼtahétken ronateríhonte, ísiʼ non wahétken tenwathnaʼnéta. Nok ne thotirihwaié꞉ri enhonnónhnheke nahontkáhtho naonsahonwatiià꞉tenhte kí꞉ken niioʼkweʼtò꞉tenʼs.

¹⁷ Sherihwakwaríhshien ne sheienʼokón꞉ʼa tánon tiótkon ensenaiéhake. Iáh nonwén꞉ton thaontaié꞉son nahò꞉ten nahsatéhen.

¹⁸ Kanakeráhsera tókaʼ iáh Rawenni꞉io raottokháhtshera tehatìhsere, tenhonniʼtónniaʼte tsi ratinákere. Iotonhnhá꞉raht nónhka iéhsere ne Rawenni꞉io raoianerénhsera!

¹⁹ Iáh thaʼón꞉ton nahsherihwakwaríhshien ne kahnhá꞉tshera nek ne ahshehtháhrhahse. Tókaʼ nón꞉wa enhotiʼnikonhraién꞉taʼne nok kiʼ iáh oʼthé꞉nen thahontahónhsatate.

²⁰ Ne sénha iohrharahtsherá꞉ien ne tehotenonhwarorí꞉tonte tsi ní꞉iot ne ónhkak iáh thahanonhtonnión꞉ko nahò꞉ten enthawennínekenʼne.

²¹ Tókaʼ akwé꞉kon enteshé꞉ion tsi nahò꞉ten tehonatonhwentsó꞉ni ne sahnhá꞉tshera tsi náhe shihatiksaʼokón꞉ʼa tsi niió꞉re nón꞉wa éntewe nenhnísera akwé꞉kon ienhatíhawe tsi nahò꞉ten sá꞉ien.

²² Nón꞉kwe ienaʼkwahseró꞉hen tkáhas wé꞉so ne taionterihwakén꞉ni ó꞉ni kaʼnikonhrharáhtshera.

²³ Atatkwenienhstáhtshera entkáhawe ehtà꞉ke niensaiaʼténhawe, nok tókaʼ saniténhton, eniesakwénienhste.

²⁴ Ónhka ne thonatenróhon ranénhskwas ráonha tiaonhá꞉ʼa ratátswenhs. Enhonwaré꞉wahte tókaʼ tsi teieiaʼtorehtáhkhwa orihwí꞉io tsi nahò꞉ten enhén꞉ron tánon Rawenni꞉io enhoré꞉wahte tókaʼ iáh thothahá꞉iere.

²⁵ Iótteron tahsatateʼnikonhrhá꞉ren tsi nahò꞉ten ronnonhtónnions nakohrèn꞉shon ní꞉se sarihwà꞉ke, nok kiʼ tókaʼ tsheniahé꞉sen ne Roiá꞉ner skén꞉nen enhsanonhtonniónheke.

²⁶ Akwé꞉kon ne teiakotonhwentsó꞉ni nahonwaʼnikonhraié꞉rite ne rakorahseraʼkweʼní꞉io, nok kiʼ raonhá꞉ʼa Roiá꞉ner énthion ne aterihwakwarihshiónhtshera.

²⁷ Ne rotirihwakwaríhshion shakotíhswenhs ne iáh tetionkweʼtaié꞉ri, tánon ne iáh tetionkweʼtaié꞉ri shakotíhswenhs ne thotirihwaié꞉ri.