Proverbs 24 - Ohiatonhseratokénti

-19-

¹ Tóhsa sheiahská꞉nek ne rotirihwanerenʼákskon, tóhsa sateʼnién꞉ten nahsheiatenroʼserónnien.

² Nek ronnonhtónnionkwa nahò꞉ten tahshakonaʼnikonhrhá꞉ren, tánon ónhkaʼk ahshakotikarón꞉ni tsi nahò꞉ten enthontá꞉ti.

-20-

³ Attokháhtshera tánon kaʼnikonhraientáhtshera énhsatste nahsatenonhsón꞉ni ne entehsatenonhkónniaʼte.

⁴ Tsi nón꞉we niká꞉ien ne kaʼnikonhraientáhtshera thó꞉non kaké꞉ron ne kanónhskon iohskatsténion tánon kanoròn꞉shon.

-21-

⁵ Ne sénha ioiánere ne aionttókhake tsi ní꞉ioht ne aieʼshátsteke; hen, teiakoʼnikonhráthe sénha tkaiaʼtakweʼní꞉io tsi ní꞉ioht ne kaʼshatsténhsera.

⁶ Tsi nikarihó꞉ten, teiotonhwentsóhon ohén꞉ton ahsateʼnikonhrísa ohén꞉ton tsi niió꞉re ahsateriióhshera, tánon sénha wé꞉so karihwí꞉io aiesaʼnikón꞉ron eʼthó kiʼ néntewe nahsatkwé꞉ni.

-22-

⁷ Owennaʼshón꞉ʼa ne wattokhahtsherí꞉io iáh thahotiʼnikonhraién꞉taʼne ne iáh thaʼtehotiʼnikonhráthe iáh oʼthé꞉nen tehotí꞉ien nahò꞉ten ahonní꞉ron nó꞉nen iorihowá꞉nen nahò꞉ten tekatharáhkwen.

-23-

⁸ Tókaʼ tiótkon sateʼnikonhrón꞉ni ne karihwahétken ne kiʼ tenhsatén꞉tsha enhtshennowáhnha tsi nek sarí꞉waien nahsenenhráksaʼte.

⁹ Nahò꞉ten enhateweiennón꞉ni ne tehotenonhwarorí꞉tonte nek ne karihwáksen. Ón꞉kwe shakotíhswenhs nónhka thihshakoié꞉ron, tánon enhshakotiaʼtontákwahse.

-24-

¹⁰ Tókaʼ satsiʼió꞉ha nó꞉nen nahò꞉ten tekaʼnikónhrhare, kwáh í꞉ken kiʼ tsi satsiʼió꞉ha.

-25-

¹¹ Tóhsa sateʼrahià꞉tak ónhka ahsheʼniá꞉kenhte ne ronwarióhsere tókaʼ oniʼ ronwahsehtá꞉ne ne iáh oʼthé꞉nen tehoʼnhí꞉kon.

¹² Enwá꞉ton enhsì꞉ron iáh oʼthé꞉nen tesarihwà꞉ke, nok Rawenni꞉io roterién꞉tare tánon tenhiaiaʼtó꞉rehte oh niiotié꞉ren tsi tho nihshiéhrha. Iaʼnikón꞉rare; roterién꞉tare. Tánon tenhiarihwaʼserákwahse, ne ki tkawenní꞉io tsi nihsatieránions.

-26-

¹³ Konién꞉ʼa otsiʼnahkontahkwá꞉ne ótsikheta í꞉sek, iawékon. Enwathró꞉ri senʼnahsà꞉ke tsi naʼteiotsikhé꞉tare.

¹⁴ Orihwí꞉io ón꞉we ne attokháhtshera tsi tió꞉wis atónhnhets ne ioiánere. Saièn꞉taʼn nattokháhtshera tánon ensaièn꞉taʼne tenhsaswathé꞉ten tsi satonhnhahtentionhátie.

-27-

¹⁵ Tóhsa tho nenhshiaʼtoʼténhake tsi ní꞉ioht ne iáh tetionkweʼtaié꞉ri ronteʼnikonhrón꞉ni nahshakotinénhsko ne thotirihwaié꞉ri tókaʼ ó꞉ni iahatíhawe raotinonhsaʼshón꞉ʼa.

¹⁶ Iáh oʼthé꞉nen tewatsterístha tho niiotká꞉te ne thonnonkweʼtaié꞉ri tahatiʼnióhskenʼne, tiótkon tenhshatí꞉taʼne; nok ne iáh tethotirihwaié꞉ri enhontkarón꞉ni tókaʼ ó꞉ni enhontatáhtonʼte.

-28-

¹⁷ Tóhsa satonhnhá꞉ren nó꞉nen ne iesáhswenhs enhotí꞉raʼne nahontkarón꞉ni, tánon tóhsa satshennón꞉ni nó꞉nen tahonahsì꞉tiaʼke.

¹⁸ Roiá꞉ner enháttoke tókaʼ saʼnikòn꞉rakon enhsatonhnhá꞉ren tsi thahsheié꞉ron nónhka taieʼnióhskenʼne iáh kiʼ thahawerienʼtí꞉io, sók tókaʼ nón꞉wa iáh thahshakohré꞉wahte.

-29-

¹⁹ Tóhsa sathón꞉tat ne iáh tetionkweʼtaié꞉ri taiesaʼnikonhrhá꞉ren; tóhsa sheiahská꞉nek tsi nihontiéhrha.

²⁰ Ónhka ne iáh tetiakorihwaié꞉ri iáh oʼthé꞉nen thaiakoièn꞉take tsi niaʼawenonhátie. Iáh oʼthé꞉nen nahò꞉ten tshiaʼtaieká꞉nerake.

-30-

²¹ Konién꞉ʼa, wé꞉so tsi etskweniènhsthak ne Roiá꞉ner, tánon etshennó꞉wanaʼt ne ronontí꞉io. Tóhsa sewatén꞉rok nón꞉kwe ne iáh tehontahónhsatats tsi nihotirihò꞉ten ne Roiá꞉ner tánon ne ronontí꞉io;

²² kí꞉ken niionkweʼtò꞉tenʼs iohsnó꞉re ehtà꞉ke enhontatón꞉ni. Saʼnikonhraién꞉taʼs kenh Rawenni꞉io tókaʼ ó꞉ni ronontí꞉io kakaronniáhtshera entehshakotenniéhten?

Shé꞉kon Attokháhtshera Wathró꞉ris

²³ Ne ronteʼnikonhrattókha ne ó꞉ni kí꞉ken ronathró꞉ri: Iáh tetkaié꞉ri ne tehatiiaʼtoréhtha nahshakotikarenʼráhkwaʼte nón꞉kwe.

²⁴ Tókaʼ enhonní꞉ron iáh teiakohnhí꞉kon tánon iakohnhí꞉kon ne akarihón꞉ni akwé꞉kon enhonwatikenhrenʼserón꞉ni tánon enhonwatíhswen.

²⁵ Tehatiiaʼtoréhtha nónhka rotihnhí꞉kon enhshakotihréhwahte sók né꞉ʼe entkáhawe enhotikwáhtsheʼne tánon enhontatshennahserón꞉ni.

²⁶ Ne tkarihwaié꞉ri tahserihwaʼserá꞉ko, ne kén꞉ton ne kwáh orihwí꞉io tsi watenroʼserí꞉io.

²⁷ Tóhsa satenonhsón꞉ni tánon tserón꞉nits tsi nón꞉we enhsiʼteròn꞉take, tsik saweienentá꞉ʼon tsi nón꞉we tisonhwentsá꞉ien tánon orihwí꞉io tsi enhskwé꞉ni nahsatonhnhíhsake.

²⁸ Tóhsa tasáhtkaf ne karihwahní꞉rats nónhka shéhniote ne iáh tshiaʼteioríhonte tókaʼ ó꞉ni aontahsewennínekenʼne nahò꞉ten iáh teiorihwí꞉io ne ahsheiénhahse.

²⁹ Tóhsa tsì꞉ron, “Tho nenkheié꞉raʼse tsi naʼontié꞉raʼse ní꞉ʼi! Ensekhekáriaʼkse!”

³⁰ Waʼkéhson tsi thothéhtaien ne rentóhrha tánon tehotenonhwarorí꞉tonte tsi nón꞉we thoiénthon ne oʼnénhare.

³¹ Ohí꞉kta tánon kahontáksen tetkáhere, ó꞉ni onén꞉ia tsi atenʼén꞉rote akwé꞉kon tioʼsén꞉seron.

³² Waʼkkaʼén꞉ion kí꞉ken, waʼkanonhtonnión꞉ko, tánon onkerihónnien tsi nahò꞉ten waʼkatkáhtho.

³³ Waʼs ká꞉ti kenʼnikarihwésha sèn꞉taf; tesanihsnonhsá꞉seren satoríshen kenʼnikarihwésha,

³⁴ tsi ká꞉ti nikarí꞉wes sèn꞉taʼs kentenhtéhtshera entisatiaʼtón꞉ti tsi ní꞉ioht ne kwáh ranenhskwahtsherí꞉io.