Proverbs 22 - Ohiatonhseratokénti

¹ Kaʼniká꞉ien ahsataterá꞉wase naiesahsenniʼióhake, kaʼton atshoʼkowáhtshera ne kiʼ sataterakwas naesahsenni꞉ióhake.

² Iakokwáhtshe tánon iakó꞉ten ne shá꞉ka tsi ní꞉ioht ne Roiá꞉ner tsi shakoiaʼtíson.

³ Nón꞉kwe ionttokhahtsherí꞉io óksaʼk ienieièn꞉tereʼne tókaʼ tá꞉we ne kaʼnikonhrharáhtshera é꞉ren èn꞉ienhte, nok ónhka iáh tshiaʼtaionnonhtónnionhwe kwáh nen né꞉ʼe tho nienhén꞉ien tsi non tetekaʼnikónhrhare tánon nohnaʼkèn꞉kha entsontateriʼwáhsten.

⁴ Tshewén꞉narak ne Roiá꞉ner, saní꞉tenht, tánon enhshié꞉na kakwahtshéhsera, kakwenienhstáhtshera tánon enhsonhnhé꞉son.

⁵ Tókaʼ shenorónhkhwa tsi sónhnhe, é꞉ren í꞉seht tsi nón꞉we tewaterístaien, iakoié꞉nas ne iakorihwanerenʼákskon.

⁶ Serihónnien ratiksaʼokón꞉ʼa tsi ní꞉ioht tsi ahonnónhnheke, tánon enhonnehiá꞉rake tsi nikarí꞉wes enhonnónhnheke.

⁷ Rotikwahtshénion ronatatehnhaʼtsherón꞉ni ne rotitenhténion. Nónhka eniesahwístani í꞉se kiʼ senhnhá꞉tshera enwá꞉ton.

⁸ Tókaʼ wahétken tsi nenhsheiatié꞉raʼse nonkwehshón꞉ʼa atkarónnia kiʼ ensehshienthó꞉ko, tánon enwató꞉kten ne nónhka akó꞉ren ahsheʼwíshaʼte.

⁹ Tasarihwaié꞉rik tánon tashé꞉ion atenná꞉tshera ne iakotenhténion. Enhshié꞉na kaiaʼtateríhtshera.

¹⁰ É꞉ren sheiaʼtenhá꞉wiht nónhka iontatkweniénhstha, thó꞉ne enwató꞉kten ne taionterihwakén꞉ni, taieriʼwakéhnha, tókaʼ ó꞉ni niaʼté꞉kon taiontaténhahse.

¹¹ Tókaʼ seriahsí꞉io tánon kawenní꞉ioʼs, nahò꞉ten aontahsewennínekenʼne, entsatén꞉roke kiʼ ne ronontí꞉io.

¹² Roiá꞉ner enhanónhstate tsi nahò꞉ten tó꞉kenhske, nok ne iáh thaharihwaié꞉na raotiwén꞉na ne rotinó꞉wenʼs.

¹³ Nón꞉kwe ronnentóhrha tió꞉konteʼ kanónhskon ratì꞉teron; rón꞉ton tókaʼ nón꞉wa kèn꞉reʼks eniakoié꞉na tókaʼ átste nienhón꞉ne.

¹⁴ Atenaʼkwaiesáhtshera waterístaien—iakoié꞉nas ne ká꞉ti kí꞉ken Roiá꞉ner enhonwanaʼkón꞉ni.

¹⁵ Ratiksaʼokón꞉ʼa kwáh nen né꞉ʼe shaʼoié꞉ra tsi ohnonhwarorí꞉ta tánon iáh tehatiʼnikón꞉rare tsi rontoriahnerónkwas, nok tókaʼ enhshehré꞉wahte enhotirihónnien oh ní꞉ioht tsi thaʼtahontó꞉tate.

¹⁶ Tókaʼ enhsón꞉ni nahò꞉ten ahshé꞉ion ne rotikwáhtshe tánon tókaʼ ó꞉ni ehtà꞉ke enhsheión꞉ni ne rotitenhténion, íhsehre eʼthó naontá꞉we aiesakwáhtsheʼne, í꞉se kiʼ ó꞉ni ensenténhtaʼne.

Áhsen Niwáhsen Niiowén꞉nake Nattokháhtshera

¹⁷ Satahónhsatat, tánon enkonrihónnien tsi nahò꞉ten ne rotiʼnikonhrowá꞉nenʼs thonatá꞉ti. Satéweienhst tsi nahò꞉ten shakotirihonnién꞉nis,

¹⁸ tánon enhsatshennón꞉ni tókaʼ enhsehiá꞉rake ne raotiwennaʼshón꞉ʼa tánon enhskwé꞉ni taontahsatnaʼnéta.

¹⁹ Tewakatonhwentsó꞉ni natsheniáhese ne Roiá꞉ner; ne ká꞉ti enkarihón꞉ni ó꞉nen enkonhró꞉ri.

²⁰ Áhsen niwáhsen niiorí꞉wake wakhiá꞉ton ní꞉se sarihwà꞉ke. Ne káhawe attokháhtshera tánon kaʼnikonhrí꞉io,

²¹ tánon ensarihónnien nahò꞉ten kén꞉ton norihwí꞉io. Sók nó꞉nen ieniesaténniehte naserihwisákha, nek tentéhshawe tsi nahò꞉ten tkariwaié꞉ri nowennaʼshón꞉ʼa tenwaterihwaʼserá꞉ko.

-1-

²² Tóhsa ehtà꞉ke sheión꞉ni ne rotí꞉ten só꞉tsi kenh sakwénion; tóhsa ó꞉ni ehtà꞉ke sheión꞉ni ne iáh thahatikwé꞉ni nahontatiaʼtakéhnha tsi tehshakotiiaʼtorehtáhkhwa.

²³ Roiá꞉ner tenhshakoriʼwakéhnhase ne raotirihwà꞉ke tánon enhshakotetshahníhten tsi ronnónhnhe nónhka enhonwanatetshahníhten.

-2-

²⁴ Tóhsa sheiatenroʼserónnien nón꞉kwe ronteriiohseranón꞉we tánon ratinaʼkwahseró꞉hen.

²⁵ Tókaʼ nón꞉wa enhseweientéhtaʼne tsi nihatiweiennò꞉ten tánon iáh thahskwé꞉ni taonsahsatté꞉ni.

-3-

²⁶ Tóhsa í꞉se sehrhá꞉ratst ahskáriaʼke nakó꞉ren iakotká꞉rote.

²⁷ Tókaʼ iáh thahskwé꞉ni nakwé꞉kon naonsahskáriaʼke, ienhatíhawe ók ó꞉ni ne sanákta.

-4-

²⁸ Tóhsa nonwén꞉ton iaʼsóhetst nonhwéntsa tsi non nikaristí꞉seron ne iethihsothokón꞉ʼa rotiieronnítston.

-5-

²⁹ Takenaʼtón꞉hahs nónhka raioʼtenhserí꞉io, tánon enkonnaʼtón꞉hahse ónhka sénha ionkweʼtí꞉io tánon tehotèn꞉tshon skátne ahonné꞉sheke ne rotinontí꞉ios.