Proverbs 21 - Ohiatonhseratokénti

¹ Roiá꞉ner tho niwatié꞉sen tsi thoʼniaro꞉taro ne ronontí꞉io raoʼnikòn꞉ra tsi kiʼ niwatié꞉sen tsi nithoniaro꞉taro nohnekaʼshón꞉ʼa.

² Íhsehreʼk tókaʼ akwé꞉kon tsi nihsatiéhrha tkariwaié꞉ri nok sehià꞉rak tsi Roiá꞉ner tenhiaiaʼtó꞉rehte serià꞉ne tsi nihsatieránions.

³ Tho ná꞉tsehr tsi nahò꞉ten ne tkariwaié꞉ri, ne sénha enhawerienʼtí꞉io ne Roiá꞉ner ne aontahtshawíhten ne karihwiioseʼokón꞉ʼa naterennaientatsherá꞉kon.

⁴ Nón꞉kwe iakorihwanerenʼákskon ne iakoniarawá꞉kon tsi iontatkweniénhstha tánon iontatón꞉ni ne ká꞉ti kí꞉ken karihwáksen.

⁵ Ioiánere tsi ni꞉iot tsi sateʼnikonhrón꞉ni tánon wé꞉so ensaièn꞉take, tókaʼ só꞉tsi iohsnó꞉re tsi nahsátiere, iáh kiʼ nonwén꞉ton tshiaʼtaiesaié꞉rihseʼ.

⁶ Ne iáh teioterihwakwaríhshion tsi enhshié꞉na ne kakwahtshéhsera iohsnó꞉re tsi entsisáhtonʼse, ne entkarihón꞉ni tsi kenheiá꞉tne niensaiaʼténhawe.

⁷ Ne rotirihwaneraʼákskon enhontetsí꞉rahte ne tsi ronteriiohseranón꞉we, iáh thaʼhonthón꞉tate tho nahatí꞉iere tsi nahò꞉ten tkariwaié꞉ri.

⁸ Nón꞉kwe ne rotihnhí꞉kon iotʼhahakwá꞉ton tsi rón꞉nes; ne iáh tehotihnhí꞉kon eʼthó nen né꞉ʼe nenhatí꞉iere tsi nahò꞉ten tkariwaié꞉ri.

⁹ Ne sénha ioiánere karonhkweʼnà꞉ke ahenteròn꞉take tsi ni꞉iot ne kanónhskon ró꞉ne skátne ahniteròn꞉take, tókaʼ tió꞉konteʼ iontewennaién꞉tons.

¹⁰ Nón꞉kwe rotirihwaneraʼákskon tiótkon ronesakonhátieʼs ne karihwanéren; iáh ónhka tehshakotitèn꞉rahs.

¹¹ Nó꞉nen ónhka ratatkweniénhstha enhathré꞉wahte, nok ó꞉ni nón꞉kwe ne iáh teiakononhtonnionhtsherá꞉ien enieweientéhtaʼne. Tsi nahò꞉ten enhonwarihónnien ne tehoʼnikonhráthe enhaweientéhtaʼne.

¹² Rawenni꞉io, ne kwáh thorihwaié꞉ri roterién꞉tare tsi nihontiéhrha raotinonhskónhshon ne iáh tetionkweʼtaié꞉ri, enhshakóhtkaʼwe tánon akwé꞉kon enhonáhtonʼse nahò꞉ten rotí꞉en.

¹³ Tókaʼ iáh thahsatahónhsatate ne rotí꞉ten tsi iesaʼnekèn꞉ni, nó꞉nen ní꞉se enhsheʼné꞉ken aiesaiaʼtakéhnha iáh ónhka taiakothón꞉teʼne.

¹⁴ Tókaʼ ónhka iesanakhwá꞉se ahtasehtón꞉ke, tiok nahò꞉ten èntshon ne enkakwé꞉ni iaʼtenhshanaʼkwaieʼwèn꞉taʼne.

¹⁵ Nó꞉nen enkarí꞉wenʼne naterihwakwarihshiónhtshera, enhontonhnhá꞉ren ne tionkweʼtaié꞉ri, nok ne ronnonkweʼtáksenʼs enthatiʼnikòn꞉renʼne.

¹⁶ Kenhé꞉ion iakohrhá꞉re nónhka é꞉ren èn꞉ienhte ne kaʼnikonhrí꞉io.

¹⁷ Tókaʼ ne ensanià꞉ra kakwahtshéhsera, tánon sé꞉kaʼs ioʼkhwaré꞉senʼs tánon otsí꞉tsa ohné꞉ka iáh kiʼ nonwén꞉ton thaiesakwáhtsheʼne.

¹⁸ Nón꞉kwe ne ionkweʼtáksenʼs ronteʼniéntha nahshakotikarón꞉ni ne tionkweʼtaié꞉ri nok kiʼ ronnónha enhshontatkarón꞉ni.

¹⁹ Ne sénha ioiánere iahontsathenke nón꞉we nasenahkereke tsi ni꞉iot ne skátne ahniteròn꞉take ne ro꞉ne tánon ierihwaká꞉tats.

²⁰ Nón꞉kwe ronttokhahtsherí꞉io rotikwáhtshe tánon kakwahtshehserá꞉kon tsi ratì꞉teron, nok ne iáh thaʼtehotiʼnikonhráhthe tsi ni꞉iot ne iohsnó꞉re enhatiié꞉na nohwísta tho ni iohsnó꞉re tsi enhonthwistahní꞉non.

²¹ Tasarihwaié꞉rik tánon sarihwakwarihshiónhak tánon karí꞉wes enhshónhnheke; ronatiaʼké꞉shon eniesakwénienhste tánon entiesarihwaierítsten.

²² Rahsotahrhakweʼní꞉io tókaʼ rattokhahtsherí꞉io enhakwé꞉ni ienhanaténhawe iawerohátien tsi né꞉ne kwáh ratiʼshátste ne rontenatanónhnha, tenhahrihtánion otstèn꞉ra tetewahsonhtó꞉ton né꞉ne kwáh ratiniahesén꞉ne.

²³ Tókaʼ íhsehre tóhsa oʼthé꞉nen taiesaʼnikonhrhá꞉ren, seʼnikón꞉rarak tsi nahò꞉ten enhsí꞉ron.

²⁴ Takenaʼtón꞉hahs ónhka iená꞉ie tánon enkonnaʼtón꞉hahse nónhka iakotkenhronniá꞉tskon, iontatón꞉ni, tánon ronnónha khók rontaté꞉iahre.

²⁵ Nón꞉kwe ronnentóhrha iáh tehonthón꞉tats nahotiióʼten ronnónha enhontatkarón꞉ni;

²⁶ nek ronnonhtonniónkwas tsi nahò꞉ten ronhská꞉neks nahotiién꞉taʼne. Ne tionkweʼtaié꞉ri, enhatikwé꞉ni aontahónhtkaʼwe tánon wé꞉so naontahshakó꞉non.

²⁷ Roiá꞉ner ráhswenhs nó꞉nen iáh tetionkweʼtaié꞉ri aontahonwahawíhten ne karihwiioshokón꞉ʼa naterennaientatsherá꞉kon ne tsi wanonhtonnionhtseráksens tsi ní꞉ioht tsi ronnonhtonniónhkwas.

²⁸ Tsi nahò꞉ten enthatà꞉ti ne ronó꞉wen iáh ónhka thaʼontahonwéhtahkwe, nok nónhka enionnonhtónnionhwe ohén꞉ton naiewennínekenʼne enwá꞉ton naontaiakéhtahkwe.

²⁹ Nón꞉kwe ne tionkweʼtaié꞉ris kwáh tokén꞉ʼen ronaterién꞉tare nó꞉nen tkariwaié꞉ri tsi nihontiéhrha; nok ne iáh tetionkweʼtaié꞉ris shakotininonhwaroriʼtón꞉nis nakorèn꞉shon tsi nihontiéhrha.

³⁰ Nón꞉kwe nakottokháhtshera, tekaʼnikonhrathé꞉tha, tánon kakaʼenionhtsherí꞉io—iáh oʼthé꞉nen thaiesaiaʼtakéhnha tókaʼ ne Roiá꞉ner iáh tethiáhnhes.

³¹ Enhskwé꞉ni nakohsá꞉tens enhsheweienén꞉taʼne nakonteriióhsera, nok kiʼ Roiá꞉ner khók entháhtkaʼwe nahonteʼshén꞉ni.