Proverbs 2 - Ohiatonhseratokénti

Tewaterihwaʼserakwáhtha Attokháhtshera

¹ Konién꞉ʼa, satéweienhst tsi nahò꞉ten enkonrihónnien tánon tóhsa nonwén꞉ton sasaʼnikónhrhen tsi nahò꞉ten enkonhró꞉ri tsi nénhshiere.

² Satahónhsatat tsi nahò꞉ten wattokhahtsherí꞉io tánon sateʼnién꞉ten naiesaʼnikonhraièn꞉taʼne.

³ Hen, tesahtshá꞉riht ne karihonnienníhtshera seʼné꞉ken ne kaʼnikonhraientáhtshera.

⁴ Wé꞉so tsi sé꞉sak tsi shí꞉ken ní꞉ioht tókaʼ kahwistarà꞉ken tókaʼ ni ahsetshén꞉ri ne wahsehtánion atshoʼkowáhtshera.

⁵ Tókaʼ tho nénhshiere, ensaterién꞉taraʼne nahò꞉ten kén꞉ton nahtshetshà꞉nike ne Roiá꞉ner, tánon ensaterihwahténtiaʼse nahtshientéhrhaʼne ne Rawenni꞉io.

⁶ Ne tsi Roiá꞉ner thatká꞉waʼs attokháhtshera ráonha ó꞉ni thatká꞉waʼs karihonnienníhtshera tánon kaʼnikonhraientáhtshera.

⁷ Ráonha thatká꞉waʼs kaiaʼtakehnháhtshera tánon enhshakonónhstate ne ronwarihwakweniénhstha tánon ne tiakorihwaié꞉ri.

⁸ Enhshakonónhstate ne ónhka akó꞉ren enhshekwénienhste tánon entehshakóhnhe ne ónhka ronwarihwanorónhkhwa.

⁹ Tókaʼ enhskwatahónhsatate, ensaterién꞉taraʼne nahò꞉ten tkaié꞉ri shaʼténhshiere tánon ne tkarihwaié꞉ri. Ensaterién꞉taraʼne tsi nénhshiere.

¹⁰ Enhsattókhaʼne tánon karihonnienníhtshera entí꞉son ó꞉ni atonhnharáhtshera.

¹¹ Tsi ní꞉ioht tsi aiesaʼnikonhraién꞉taʼne né꞉ʼe ensanónhstate.

¹² Ensaiaʼtakéhnha ne tóhsa tho náhshiere tsi nahò꞉ten iáh tetkaié꞉ri. Ensaiaʼtohtáhrho tsi nón꞉we nihón꞉nes nón꞉kwe ne ratiritstonhnis tsi nahò꞉ten enhonnì꞉ron—

¹³ né꞉ne ónhka iakohtkà꞉wen ne ioterihwakwaríhshion tho enhatiʼteròn꞉take tsi nón꞉we tetió꞉karas tánon karihwanerenʼèn꞉ke,

¹⁴ nónhka ietshénrieʼs nateʼnikonhroiáhtshera tánon iakaonʼwéskwani nahò꞉ten iáh tetkariwaié꞉ri, iáh oʼthé꞉nen kiʼ tekariʼwáhsta,

¹⁵ tánon iáh thaʼón꞉ton nahsheniáhese nónhka iáh tetionkweʼtaié꞉ri.

¹⁶ Enhskwé꞉ni taseriwihiahse ne ión꞉kwe iorihwanerenʼákskon tsi ní꞉ioht tsi enwatá꞉ti kawennaweiénhon tsi ní꞉ioht tsi aontesaʼnikonhratihéntho, enwateʼnién꞉ten karihwanerenʼèn꞉ke niaʼiesaiaʼténhawe,

¹⁷ roʼnikonhrhaʼtén꞉ni ne ró꞉ne, tánon tsoʼnikónhrhens tsi iorihwahnirá꞉ton shaʼóniake.

¹⁸ Tókaʼ aonónhskon nienhénhse sathahitáhkhe ne kenhé꞉ion. Tókaʼ tho nienhénhse tentisáterahte tsi nón꞉we iehoné꞉non ne ronenhé꞉ion.

¹⁹ Né꞉ʼe ónhka ienkonwanatahré꞉nahse, iáh kiʼ nonwén꞉ton thaʼtaontaiónhkete, iáh nonwén꞉ton tshiaonsá꞉rawe tsi nón꞉we tioháhonte ne ronnónhnhe.

²⁰ Ne ká꞉ti ahsatenonwará꞉ko ne tionkweʼtaié꞉ris nón꞉kwe tho ní꞉ioht tsi ahsónhnheke tsi ní꞉ioht ne rotirihwakwaríhshion.

²¹ Nón꞉kwe ne rotirihwakwaríhshion tánon thotirihwaié꞉ri enhonnónhnheke tsi nón꞉we niionwentsá꞉te nitewanákere.

²² Rawenni꞉io entehshakoiaʼtatihéntho ne ionkweʼtahétken tsi ionhwentsá꞉te tánon ne rotirihwanerenʼákskon tsi ní꞉ioht ne ahʼrhiotsionko né꞉ʼe kahontáksenʼs.