Proverbs 15 - Ohiatonhseratokénti

¹ Tókaʼ skenén꞉ʼa tsi tenhserihwaʼserá꞉ko shakʼthenwá꞉ton ne kanaʼkhwénhtshera, nok ne kanaʼkhwenhsherá꞉kon nowén꞉na sénha eniakonaʼkón꞉ni.

² Nó꞉nen ne ronttokhahtsherí꞉io nón꞉kwe enthontá꞉ti, entisaʼnikonhratihéntho tsi nahò꞉ten ronaterién꞉tare. Nok ne iáh tehonttókha nek ne thontà꞉tis nahò꞉ten iáh orí꞉wa té꞉ken.

³ Roiá꞉ner tehaká꞉nere tsi niiá꞉wenʼs tsik nón꞉we, tetehshonkwaká꞉nere tsi nitewatiéhrha tókaʼ kenh tkariwaié꞉ri tókaʼ ó꞉ni tewarihwanérakʼs.

⁴ Kawenní꞉ioʼs tkáhas natónhnhets, nok ne iotewennatská꞉rat nek nen né꞉ʼe naiakoʼnikonhrakaré꞉wahte.

⁵ Teiotenonhwarorí꞉tonte ne tóhsa ahshié꞉na nahò꞉ten ne iesaién꞉ʼa iesarihonnién꞉ni, wattokhatsherí꞉io nahshié꞉na nahò꞉ten eniesarihwakwaríhshien.

⁶ Nón꞉kwe thotirihwaié꞉ri enhatihá꞉wake raonatshokowáhtshera, nok ne iáh tethotirihwaié꞉ri enhonáhtonʼse nó꞉nen éntewe kaʼnikonhrharáhtshera.

⁷ Nón꞉kwe tehotiʼnikonhráthe, attokháhtshera tehonrenià꞉tha, iáh kiʼ nen né꞉ʼe ne rotinonhwaró꞉ri.

⁸ Roiá꞉ner rotonhnháhere nó꞉nen tionkweʼtaié꞉ri ronaterén꞉naien, nok ráhswens ne thatíhas karihwiioseʼokón꞉ʼa ne rotirihwanéren.

⁹ Roiá꞉ner ráhswens tsi nihotiianerenhserò꞉ten ne rononkweʼtáksen, nok shakonorónhkhwa nónhka tierihwaié꞉rits.

¹⁰ Tókaʼ tho nénhshiere tsi nahò꞉ten iáh tetkariwaié꞉ri, kwáh í꞉ken tsi ensatré꞉wahte; enhsíheie tókaʼ iáh thaʼsatateríhon ne ahserihwakwaríhsi.

¹¹ Ók ó꞉ni ne ronenhé꞉ion tsi nón꞉we thón꞉nes akwé꞉kon Roiá꞉ner niehoterién꞉tare tsi ní꞉tiot; oh ká꞉ti naiá꞉wenʼne ahtshitewatahséhten tsi nahò꞉ten onkwerià꞉ne í꞉wa?

¹² Nón꞉kwe rontatkweniénhstha iáh tehatinón꞉weʼs nónhka tahonwatiwénneʼke; iáh nonwén꞉ton thahshakotiriʼwanón꞉tonhse ahonwatiʼnikòn꞉ron ne tehotiʼnikonhráthe.

¹³ Nó꞉nen nón꞉kwe ronatonhnháhere, rotikonhsaiéhshon, nó꞉nen rotiʼnikonhráksenʼs enthotiʼnikòn꞉renʼne.

¹⁴ Nón꞉kwe ne tehotiʼnikonhráthe tehonatonhwentsó꞉ni sénha wé꞉so nahatiweienté꞉taʼne, nok ne iáh thaʼtehotiʼnikonhráhthe shaʼtehatinón꞉weʼs tsi iáh tekarihonnién꞉ni.

¹⁵ Tsi ronnónhnhe rotí꞉ten tió꞉konteʼ tehotihniotátie, nón꞉kwe iakotonhnháhere tió꞉konteʼ ne ionʼwé꞉sen tsi ronnónhnhe.

¹⁶ Ne sénha ioiánere naiesenténhton tánon atshetshaníhsheke ne Roiá꞉ner tsi niʼiot ne aiesakwatshéhake tánon taiesaʼnikonhrhá꞉rake.

¹⁷ Ne sénha ioiánere aseʼshón꞉ʼa aʼésewake nón꞉kwe shenorónhkhwa tsi niʼiot ne skátne taiesewá꞉tonte ne kwáh tkaʼwahrí꞉io tókaʼ tesewatátswens.

¹⁸ Ne ienaʼkwahseró꞉hen tkáhas ne taieriʼwakéhnha, nok ne iakoʼnikonhrí꞉io tkáhas ne skén꞉nen.

¹⁹ Tókaʼ sentóhrha, tsik nienhénhse akwé꞉kon nienwentó꞉reke, tókaʼ sarihwakwaríhshion iáh kiʼ oʼthé꞉nen thaʼtahsaʼnikonhrhá꞉ren.

²⁰ Ratiksaʼokón꞉ʼa ne ronttokhahtsherí꞉io shakonatonhnhahrá꞉ni ne ronwatiʼníha. Nek ne rotinonhwaró꞉ri shakotíhswenhs ne shakotiʼnisténha.

²¹ Nón꞉kwe ne iáh thaʼteiakoʼnikonhráthe ronatonhnháhere tsi rotinonhwaró꞉ri, nok ne ronttokhahtsherí꞉io eʼthó nihatiiérha tsi nahò꞉ten tkariwaié꞉ri.

²² Tsé꞉na akwé꞉kon ne kaʼnikonhrí꞉io tsi naiesatenʼnikón꞉ron tánon ensaianeráhsten; tókaʼ iáh tho tháhshiere ensarihwanó꞉ronʼse kiʼ.

²³ Iotonhnhá꞉raht nó꞉nen enhsetshén꞉ri ne kwáh tkawennaié꞉ri tsi nahò꞉ten saterihwahtentiá꞉ton!

²⁴ Nón꞉kwe ne teiakoʼnikonhráthe ne enionthahíta ne iónhnhe ne è꞉neken nieiawé꞉non, iáh ki tsi niiohahó꞉ten ne ehtà꞉ke ne nieiawé꞉non kenhé꞉ion.

²⁵ Roiá꞉ner enhsakononhsaríhshien ne rontatón꞉ni, nek tsi enhanónhstate tsi nahò꞉ten iakó꞉ien ne iakotehré꞉ʼonʼs.

²⁶ Roiá꞉ner ráhswens ne iáh tewanonhtonnionhtsherí꞉io, nok rawerienʼtí꞉ios nowennaʼshón꞉ʼa ne watenroʼserí꞉io.

²⁷ Tókaʼ enhsateʼnién꞉ten ne iáh tetkarihwaié꞉ri tahsnaʼnéta tsi tahsatèn꞉tsha, ienhsheiaʼtenhá꞉wihte ne sahwá꞉tsire tsi tensewaʼnikonhrhá꞉ren. Tóhsa oʼthé꞉nen tsé꞉na nahò꞉ten iáh tetkarihwaié꞉ri aiesatkáriaʼkse nothé꞉nen tánon karí꞉wes enhshónhnheke.

²⁸ Nón꞉kwe tiakorihwaié꞉ri enionnonhtonnión꞉ko ohén꞉ton tsi niió꞉re tenierihwaʼserá꞉ko. Nón꞉kwe ne ionkweʼtáksenʼs iohsnó꞉re tenhatirihwaʼserá꞉ko, sók entkáhawe kaʼnikonhrharáhtshera.

²⁹ Nó꞉nen nón꞉kwe tiakorihwaié꞉ri enionterén꞉naien, Roiá꞉ner rotahónhsate, nónhka iáh tetiakorihwaié꞉ri iáh thahshakotahónhsatate.

³⁰ Iakokonhsaieshónnion entkáhawe nahsatonhnhá꞉ren. Nó꞉nen enhserihwá꞉ronke karihwí꞉ioʼs sénha enhsonhnhí꞉ioʼne.

³¹ Tókaʼ kwáh tokén꞉ʼen enhsatahónhsatate nónhka naiesarihwakwaríhshien, tesaʼnikonhráthe kiʼ.

³² Tókaʼ iáh thahsatahónhsatate nahshié꞉na nahò꞉ten naiesaweientéhten í꞉se kiʼ enhsatatkarón꞉ni. Tókaʼ enhshié꞉na ne aiesatakwaríhshien tensaʼnikonhrátheʼne kiʼ.

³³ Ahtskweniénhsthake Roiá꞉ner ensarihónnien ne taiesaʼnikonhrátheʼne. Ó꞉nenk tsi enhsaní꞉tenhte nohén꞉ton nenhskwé꞉ni nahshié꞉na kakwenienhstáhtshera.