Proverbs 14 - Ohiatonhseratokénti

¹ Tsi nón꞉we nihatì꞉teron ne ionhniaton ne konteʼnikonhrattókha konhnonkwe, ók ne kariwahthonton noʼnonhwaro꞉rita.

² Sarihwakwarihshiónhak tánon wé꞉ne són꞉ni tsi tsherihwakweniénhstha Roiá꞉ner; tókaʼ iáh tesarihwakwaríhshion wé꞉ne són꞉nis tsi iáh tetsherihwakweniénhstha.

³ Ratiná꞉ie tehonatenonhwarorí꞉tonte só꞉tsi wé꞉so rontà꞉tis; raotiwennaʼshón꞉ʼa ne ronttókha ne enhotiiaʼtanónhstate.

⁴ Tókaʼ iáh tehsanáhskwaien ne tiohnhónskwaron rá꞉tsiʼn ne aontahatihéntho ieʼtarakahrhathóhstha iáh kiʼ thé꞉nen thakaién꞉take tsi senekeraientáhkhwa, tókaʼ sanáhskwaien tentká꞉rake ne onahtsa.

⁵ Nónhka sheniahé꞉sen naierihwahní꞉rate iáh ki thaionnó꞉wenhte, nónhka ne iáh tehsheniahé꞉sen nek nen né꞉ʼe enionnowenhtánion.

⁶ Nón꞉kwe ne iontatkweniénhstha iáh nonwén꞉ton thaʼtaiakoʼnikonhrátheʼne, nónhka ionteʼnikonhrattókha watié꞉sen naieweientéhtaʼne.

⁷ É꞉ren í꞉set tsi nón꞉we nihón꞉neʼs ne tehonatenonhwarorí꞉tonte iáh oʼthé꞉nen tehotí꞉ien nahò꞉ten aiesarihónnien.

⁸ Oh nontié꞉ren ne rattókha tsi teiakoʼnikonhráthe? Ne tsi roterién꞉tare tsi nihatiéhrha. Oh nontié꞉ren ne iáh thaʼtehoʼnikonhráthe tsi tehotenonhwarorí꞉tonte? Ne tsi í꞉rehre raonhá꞉ʼak roterién꞉tare.

⁹ Nón꞉kwe tehonatenonhwarorí꞉tonte iáh oʼthé꞉nen tehontsterístha nahatirihwanérake, nok ne tionkweʼtaié꞉ri tehonatonhwentsó꞉ni naonhsahonwatiʼnikónhrhenʼse.

¹⁰ Satonhnharáhtshera í꞉se khók sá꞉wen; nahò꞉ten ne iotskà꞉ra í꞉se khók sá꞉wen. Iáh ónhka thaʼtaieseniié꞉na.

¹¹ Nón꞉kwe tiakorihwaié꞉ri akonónhsa shé꞉kon enkà꞉take nok ne iakorihwanerenʼákskon ó꞉nen nen né꞉ʼe teniakotenonhsarenién꞉ni.

¹² Tsi nahò꞉ten sanonhtónnions íhsehre tkariwaié꞉ri tsi non nisathahitáhkhe tókaʼ nón꞉wa thó꞉non niensaiaʼténhawe tsi nón꞉we ne kenheiá꞉tne.

¹³ Kasteristathera tókaʼ nón꞉wa enwá꞉sehte ne kaʼnikonhraksénhtshera. Nó꞉nen enhwatóhetste ne atonhnharáhtshera nek ne iaʼtentsotá꞉tenre naiesaʼnikonhráksen.

¹⁴ Nón꞉kwe ne iáh tetiakorihwaié꞉ri enieié꞉na tsi nahò꞉ten teiakotèn꞉tshon. Nok ne tionkweʼtaié꞉ri teniakoterihwaʼserákwahse tsi nahò꞉ten iakoioʼtén꞉ʼen.

¹⁵ Rononhwaró꞉ri tsik nahò꞉ten entréhtahkwe; nok ne tehotiʼnikonhráthe ratiʼnikón꞉rare tsi niahonenonhátie.

¹⁶ Nón꞉kwe tehotiʼnikonhráthe ratiʼnikón꞉rare tóhsa tahatiʼnióhskenʼne, nok ne iáh thaʼtehotiʼnikonhráthe iáh tshiaʼtehonnonhtónnions só꞉tsi tehotihskenhniase.

¹⁷ Nón꞉kwe ne ratinaʼkhwahseró꞉henʼs teiotenonhwarorí꞉tonte tsi nenhontieránion; ók ne tehotiʼnikonhráthe thaʼtehonató꞉te.

¹⁸ Nón꞉kwe ne iáh tekarihonnién꞉ni ononhwaroriʼtó꞉kon tehontawénrieʼs tehonatèn꞉tson tsi nahò꞉ten enhatiié꞉na, nok ne ronttókha tenhonaterihwaʼserákwahse ne karihonnienníhtshera.

¹⁹ Nón꞉kwe ne iáh tethotirihwaié꞉ri tenhontshá꞉kete raotihén꞉ton ne thotirihwaié꞉ri tánon enhonwatiʼné꞉ken ne nahonwatiiaʼtakéhnha.

²⁰ Iáh ónhka tehonwatiʼnón꞉weʼs ne rotí꞉ten iáh ó꞉ni ne tehonnonhsané꞉ken, nok ne rotikwáhtshe ronatenroʼseraká꞉te.

²¹ Tókaʼ tesatonhwentsó꞉ni naiesatonhnhá꞉rake, shé꞉tenhr ne iakó꞉ten; karihwáksen nónhka ahshekèn꞉ron.

²² Tenhsatén꞉tsha ne aiesaniáhese tánon aiesakwénienhste nakorèn꞉shon tókaʼ ne ensaióʼten ne tkarihwaié꞉ri. Tókaʼ ne ensaióʼten ne ioʼtáksen, kwáh tokén꞉ʼen tenhsaterienʼtawénrie.

²³ Saióʼten tánon tenhsatén꞉tsha nahshonhnhéhkwen; tókaʼ nek ne enhsitskó꞉take nek ne sáhthare ensenténhton kiʼ.

²⁴ Nón꞉kwe ne ionteʼnikonhrattókha kakwahtshéhsera teniakoterihwaʼserákwahse, nok ne rotinonhwaró꞉ri tho ní꞉ioht tsi ronwatiienté꞉ri tsi tehonatenonhwarorí꞉tonte.

²⁵ Nónhka naierihwaié꞉rite naionthró꞉ri norihwí꞉io enienónhstate natónhnhets; nó꞉nen enionnó꞉wenhte enhshakonatenhní꞉non nón꞉kwe.

²⁶ Nahonwakwénienhste ne Roiá꞉ner tkáhas ne rón꞉kwe skén꞉nen ahanonhtonniónheke ók ó꞉ni raohwá꞉tsire.

²⁷ Tesatonhwentsó꞉ni kenh aseniá꞉kenʼne ne kenhé꞉ion? Ehtskweniénhstak ne Roiá꞉ner aseʼkénh ne thatká꞉waʼs natónhnhets.

²⁸ Ronontí꞉io raoʼshatsténhsera ne tkawenní꞉io to niiá꞉kon nón꞉kwe shakohá꞉wi; tókaʼ iáh káneka nón꞉kwe iáh ki oʼthé꞉nen tehariʼwáhstha.

²⁹ Tókaʼ saʼnikonhrí꞉io, tesaʼnikonhráthe kiʼ, tókaʼ senaʼkwahseró꞉hen, nek ne enhshenaʼtón꞉hahse tsi tehsatenonhwarorí꞉tonte.

³⁰ Nanonhtonniónhtshera skén꞉nen tkáhas naesataʼkarí꞉teke, nok ne ateʼkefáhtshera ne shá꞉ka ne takwaʼáhsen.

³¹ Tókaʼ enhshetenhstéhten ne iakotenhténion, enhtsheʼnikonhrakaré꞉wahte Rawenni꞉io ne shakoiaʼtíson; tókaʼ tenhsheiahrhó꞉ton ne iakó꞉ten Rawenni꞉io enhtshennó꞉wanahte.

³² Nón꞉kwe ne rotirihwanerenʼákskon ronónha enhontatenòn꞉waien ne tsi karihwáksen tsi nihontiéhrha, nok ne tionkweʼtaié꞉ri enhotiiaʼtanónhstate ne tsi ronatonkweʼtakwaríhshion.

³³ Attokháhtshera eʼthó í꞉wa raotiʼnikòn꞉rakon ne tehotiʼnikonhráthe nok ne tehonatenonhwarorí꞉tonte iáh oʼthé꞉nen tehonaterién꞉tare nahò꞉ten nen né꞉ʼe nattokháhtshera.

³⁴ Nón꞉kwe tiakorihwaié꞉ri ne ión꞉nis ne kanakerahserá꞉kon enkanakerahseriióhake kiʼ; karihwanéren tkáhas atehénhsera ne kanakerahserá꞉kon.

³⁵ Rotinontí꞉ios ronatshennón꞉ni nó꞉nen ne ronateríhonte thatiié꞉rits tsi nihontiéhrha, nok ne iáh tethatiié꞉rits enhshakotihré꞉wahte.