Proverbs 13 - Ohiatonhseratokénti

¹ Ratsa꞉ʼa ne raʼteʼnikonhrattókha enhotahónhsatate ne roʼniha nó꞉nen enhotakwahrisi, ók ne ratiʼnikonhráksen iáh nonhwénhton tahontró꞉ri nahò꞉ten ne iáh tetkariwaié꞉ri tsi nihontiéhrha.

² Nón꞉kwe ne tiakorihwaié꞉ri teniakoterihwaʼserákwahse tsi nahò꞉ten entiewennínekenʼne, sók ne shakotiʼnikonhrhaʼtén꞉nis ne khók rontonhkariá꞉ktha ne thahshakotiʼnikonhrhá꞉ren.

³ Seʼnikón꞉rarak tsi nahò꞉ten enhsí꞉ron tánon enhsenónhstate tsi sónhnhe. Nónhka iáh tehaʼnikón꞉rare tsi nahò꞉ten thatá꞉tis enhoiatá꞉tonte.

⁴ Iáh oʼthé꞉nen tekáhstha nahò꞉ten tehotonhwentsó꞉ni ne rentóhrha, iáh kiʼ nonwén꞉ton tshiahaié꞉na. Ne rotshá꞉ni akwé꞉kon nen né꞉ʼe enhaié꞉na tsi nahò꞉ten tehotonhwentsó꞉ni.

⁵ Nón꞉kwe tionkweʼtaié꞉ri iéswenhs ne onó꞉wen, nok ne raotiwennaʼshón꞉ʼa ne iáh tetionkweʼtaié꞉ri iotéha tánon iáh teiotkwénienʼs.

⁶ Tkarihwaié꞉ri iakoiaʼtanónhstats ne iáh oʼthé꞉nen teiakohnhí꞉kon; karihwanéren ne ieniakoià꞉tenhte ne rotirihwanerenʼákskon.

⁷ Ótiaʼke nón꞉kwe í꞉ienhre iakokwáhtshe, nok iáh oʼthé꞉nen teiakó꞉ien, ótiaʼke í꞉ienhre iakó꞉ten nok wé꞉so kakwahtshéhsera iakó꞉ien.

⁸ Ne rotikwáhtshe ó꞉nenk tsi raotihwísta énhontste nahatiʼniá꞉kenhte tsi ronnónhnhe, nok ne rotí꞉ten iáh ne ónhka thaʼón꞉ton nahonwatihterónhkwen.

⁹ Ne tionkweʼtaié꞉ri tsi shí꞉ken ní꞉ioht ne kwáh teiohahseráthe tsi teioswáthe; nok ne rotirihwanerenʼákskon kwáh nen né꞉ʼe tsi shí꞉ken ní꞉ioht ne tewaniʼtonhkwaríkhons ó꞉nen thó꞉ha aón꞉swa ne kaháhsera.

¹⁰ Ne wanonhthonnionhtsheráksen nek tkáhas taionʼnikonhrhá꞉ren. Ne sénha wattokhahtsherí꞉io nahseriʼwanón꞉ton naiesaʼnikón꞉ron.

¹¹ Tókaʼ só꞉tsi watié꞉sen tsi enhsakwáhtsheʼne sénha iohsnó꞉re entsisà꞉ti. Tókaʼ sénha wentó꞉re tahsatèn꞉tsha sénha ki wé꞉so ensaièn꞉take.

¹² Nó꞉nen ahskanéktshera tewaskwaʼseronhkwen, awé꞉ri ki ó꞉ni enwaʼnikonhró꞉kten, nok nahskanéktshera eʼthó naiá꞉wenʼne thentká꞉raʼne natonhnharáhtshera.

¹³ Tókaʼ iáh thahshié꞉na ne kaʼnikonhrí꞉io, seriʼwanóntha kiʼ né꞉ʼe kaʼnikonhrharáhtshera; íhtshehr kaʼnikonhrí꞉io ne ensaʼniá꞉kenhte.

¹⁴ Tsi nahò꞉ten eniesarihónnien ne rotiʼnikonhrowá꞉nenʼs tsi shí꞉ken ní꞉ioht ne iohnáwerote ne tsi sónhnhe entkáhawe natónhnhets. Eniesaiaʼtakéhnha nahseʼniá꞉kenʼne nó꞉nen iótteron tá꞉we tsi sónhnhe.

¹⁵ Iakoʼnikonhrowanáhtha tenwatén꞉tsha ne kakwénienhstatsera, nok nónhka iáh thaʼón꞉ton naiontateniáhese tho kiʼ non nihonathahitáhkhe tsi nón꞉we nahontkarón꞉ni.

¹⁶ Nón꞉kwe ne ronateʼnikonhríson tiótkon enhonnonhtonnión꞉ko nohén꞉ton thé꞉nen kenʼ niahatí꞉iere, nok ne iáh thaʼtehotiʼnikonhráthe tehonterihwareniá꞉tha nen né꞉ʼe tsi iáh tehonteʼnikonhrattókha.

¹⁷ Nónhka ratirihwenhá꞉wi ne iáh tehsheniahé꞉sen, nek entkáhawe ne kaʼnikonhrharáhtshera, nok ne ónhka sheniahé꞉sen entkáhawe ne skén꞉nen.

¹⁸ Nónhka ne kwáh iáh thaʼtehonatonhontsó꞉ni nahatiweientéhtaʼne eniahkoténhton tánon eniontatéhate. Nónhka eniontahónhsatate ne aiakorihwakwarihshiónhake eniontatkwénienhste kiʼ.

¹⁹ Ionʼwé꞉sen nahshié꞉na nahò꞉ten sahská꞉neks! Nón꞉kwe ne tehonatenonhwarorí꞉tonte iáh tehonthón꞉tats é꞉ren ahón꞉nehte ne karihwanerenʼèn꞉ke.

²⁰ Skátne sewé꞉shek ne ronttókha í꞉se ó꞉ni ensattókhaʼne. Tókaʼ enhsatenroʼserón꞉ni ne iáh tehonteʼnikonhrattókha eniesakarón꞉ni.

²¹ Kaʼnikonhrharáhtshera rotíhnonhteratseʼs ne rotirihwanéren tsik nón꞉we nienhón꞉ne, nok ne thotirihwaié꞉ri tenhonaterihwaʼserákwahse tsi nahò꞉ten ioianeré꞉shon.

²² Thonnonkweʼtaié꞉ri nó꞉nen enhonníheie né꞉ne shakonatereʼokón꞉ʼa enhatiié꞉na ne raonatshokowáhtshera, nok ne iáh tetionkweʼtaié꞉ri nó꞉nen enhonníheie ne raonatshokowáhtshera nen né꞉ne enhatiié꞉na ne tionkweʼtaié꞉ri.

²³ Kahéhta ne iáh tewáhtston wé꞉so aontaió꞉ha ne atenná꞉tshera raotirihwà꞉ke ne rotitenhténion, nok kí꞉ken iáh tethotirihwaié꞉ri ratíhnhes nahatiiéntho.

²⁴ Tókaʼ iáh thahsheré꞉wahte sheienʼokón꞉ʼa, iáh kiʼ tehshenorónhkhwa. Tókaʼ shenorónhkhwa enhsherihwakwaríhshien kiʼ.

²⁵ Ne thotirihwaié꞉ri tiótkon rotí꞉ien nahò꞉ten ahón꞉neke, nok ne iáh tethotirihwaié꞉ri tiótkon rontonhkáriaʼks.