Proverbs 11 - Ohiatonhseratokénti

¹ Roiá꞉ner ráhswens nónhka ieʼnikonhrhá꞉tha naiehkonʼtsherihá꞉ren. Rotonhnháhere nónhka tkaié꞉ri tsi ni tsi iekonʼtsheriháhrha.

² Nón꞉kwe nónhka iontatkweniénhstha iohsnó꞉re eniontéhen, ne ká꞉ti sénha ioiánere ne tóhsa ahsatatkwénienhste. Ne wattokhahtsherí꞉io.

³ Tókaʼ tehsonkweʼtaié꞉ri ne kiʼ ensaianénhawe ne tkarihwaié꞉ri. Nón꞉kwe ne iáh thaʼón꞉ton nahsheniáhese ronnónha kiʼ enhontatáhtonʼte tsi iáh tehotirihwakwaríhshion.

⁴ Kakwahtshéhsera iáh oʼthé꞉nen thaiehsaiaʼtakéhnha nó꞉nen entewenhniserá꞉teke tensáhkwaʼte kenhé꞉ion, tókaʼ sarihwakwaríhshion ensaʼniá꞉kenhte tsi sónhnhe.

⁵ Aterihwakwarihshiónhtshera ne tionkweʼtaié꞉ri sénha watié꞉sen tiakó꞉wis tsi iakónhnhe, nok ne iáh tetiakorihwaié꞉ri ronnónha kiʼ ienhontatià꞉tenhte.

⁶ Ne kaiánere iakoʼniakénhtha nónhka iakorihwakwaríhshion, nok tókaʼ ónhka iáh thahsheniáhese ronnónha enhontátnerenke ne tsi nihonatétshen.

⁷ Nó꞉nen ne iáh tethotirihwaié꞉ri enhonníheie raonahskanéktshera ó꞉ni enkénheie. Tókaʼ kakwahtshéhsera ahseniáhehse kwáh nen né꞉ʼe iáh oʼthé꞉nen tetkáhas.

⁸ Ne tionkweʼtaié꞉ri iakoiaʼtanónhstats ne oʼthé꞉nen taionʼnikonhrhá꞉ren, nok ne enhatiié꞉na kaʼnikonhrharáhtshera ne iáh tethotirihwaié꞉ri.

⁹ Enwá꞉ton eniesakarón꞉ni tsi rotíhthare ne iáh tehotiʼniiohserá꞉ien nok ne ronteʼnikonhrattókha eniesaʼniá꞉kenhte.

¹⁰ Tsi kaná꞉taien ronatonhnháhere nón꞉kwe ne thotirihwaié꞉ri nó꞉nen tho niiohtonhátie tsi nihotirihò꞉ten, tánon ronatshennón꞉ni nó꞉nen enhonníheie ne iáh tethotirihwaié꞉ri.

¹¹ Tsi kaná꞉taien enkahshennowáhnha ne tionkweʼtaié꞉ris enkonwaiaʼtaté꞉rihste, nok ne enkenʼtáksaʼte raotiwén꞉na ne iáh tethotirihwaié꞉ri.

¹² Teiotenonhwarorí꞉tonte ónhka ahshekenhrenʼserón꞉ni. Tókaʼ tesaʼnikonhráhthe thaʼtensató꞉tate kiʼ.

¹³ Iáh ónhka ne teierihwenhawíhtha thahsheniáhese tsi nahò꞉ten ioterihwahséhton, nok enwá꞉ton ensheniáhese nónhka tiakonkweʼtaié꞉ri.

¹⁴ Tsi kanakerahserá꞉ien enkaiaʼtáhton tókaʼ iáh teká꞉ien nónhka ahatinèn꞉rine. Tókaʼ wé꞉so rotí꞉ien ne thonteʼnikonhratká꞉waʼs ne shakotiʼnikonhrá꞉wis ne kén꞉ton tsi enhotiiaʼtahnirónhake.

¹⁵ Tókaʼ enhserihwanón꞉weʼne nahskáriaʼke ne iáh tehtshienté꞉ri rotká꞉rote, ensehsatateriʼwáhsten. Ne sénha ioiánere sarihwà꞉ke ne tóhsa tahserihwáhshnieʼne.

¹⁶ Iakón꞉kwe ne iakotonkweʼtatkwénienhs tánon tiakorihwaié꞉ri enhshekweniénhste kiʼ. Iotéha ne iakón꞉kwe iáh teiakotonkweʼtatkwénienhs. Nónhka iakentóhrha iáh ki nonwén꞉ton thaiakohwistaièn꞉take, nok nón꞉kwe iakohskehnhá꞉se eniakokwáhtsheʼne.

¹⁷ Entehsataterihwaié꞉ritste tókaʼ tisarihwaié꞉ri. Tókaʼ sonkweʼtáksen í꞉se khók enhsatatkaré꞉wahte.

¹⁸ Nónhka ne iáh tetiakorihwaié꞉ri iáh oʼthé꞉nen kwáh thaʼtaiontèn꞉tsha. Nok tókaʼ tho nénhshiere tsi nahò꞉ten tkariwaié꞉ri kwáh ki iorihwí꞉io tsi tensaterihwaʼserákwahse.

¹⁹ Nónhka iakoteʼnikonhríson ne tkariwaié꞉ri eniakónhnheke, nok ne ónhka entiekón꞉tahkwe ne iáh tetkariwaié꞉ri eniaiéheie.

²⁰ Roiá꞉ner ráhswenhs nónhka wahétken ionnonhtónnions, nok shakonorónhkhwa nónhka tierihwaié꞉rits.

²¹ Saterièn꞉tarak ne iáh tetiakorihwaié꞉ri eniontré꞉wahte nok nónhka tiakorihwaié꞉ri enieʼniá꞉kenʼne naiontré꞉wahte.

²² Ión꞉kwe ne ioiaʼtáhskats tánon iáh tewattókha ne aontaionteʼnièn꞉tenhste ohwistanó꞉ron anisnónhsawi kwéskwes kaʼnionhsà꞉ke aieniión꞉ten.

²³ Tiótkon tkáhahs ne ioiánere tsi nahò꞉ten tehonatonhwentsó꞉ni ne thotirihwaié꞉ri; nok ne iáh tethotirihwaié꞉ri oʼthé꞉nen enhatiié꞉na onkweʼtakwé꞉kon eniakoná꞉khwen!

²⁴ Ótiaʼke nón꞉kwe rontiesáhtha raotihwísta tánon shaʼté꞉ioht tsi sénha enhotikwáhtsheʼne. Ronátiaʼke ratiʼnikón꞉rare, tánon shaʼté꞉ioht tsi sénha enhotitén꞉taʼne.

²⁵ Tasarihwaié꞉rik tho néntewe enhsakwáhtsheʼne. Shehshnié꞉non nakohrèn꞉shon tánon í꞉se ó꞉ni eniesahshnié꞉non.

²⁶ Ón꞉kwe enhonwakenhrenʼserón꞉ni nónhka rateweién꞉tons ká꞉nen, rohrhá꞉re ne sénha aonthará꞉tate tsi nikanó꞉ron, nok tenhonwanonhwerá꞉ton nónhka óksaʼk enhahtké꞉ron.

²⁷ Tókaʼ ioiánere tsi nahò꞉ten íhsehre ahsaterihwahténhtiaʼte eniesakwénienhste. Nok tókaʼ ne sesakonhátie tahsheiaʼnikonhrhá꞉ren kaʼnikonhrharáhtshera kiʼ enhshié꞉na.

²⁸ Nónhka ne teieká꞉nere akokwahtshéhsera tho neniá꞉wenʼne tsi ní꞉ioht ne kanennaʼkè꞉ne iotenerahtaténion, nok ne tiakorihwaié꞉ri eniakokwáhtsheʼne tsi ní꞉ioht ne ónerahte ióhskats ne akenhnhà꞉ke.

²⁹ Nónhka tiéhas kahwatsí꞉rakon ne kaʼnikonhrharáhtshera iáh kiʼ oʼthé꞉nen tshiaʼtahonatá꞉tenre. Nónhka iakononhwahró꞉ri tiótkon kahnhá꞉tshera enkénhake ne ronttokhahtsherí꞉io.

³⁰ Tkarihwaié꞉ri tiakó꞉wis natónhnhets, nok ne ateriiohseraʼón꞉we akwé꞉kon ienskáhawe.

³¹ Nónhka tiakorihwaié꞉ri teniakoterihwaʼserákwahse kén꞉ʼen tsi ionhwentsá꞉te, kwáh ká꞉ti orihwí꞉io saterièn꞉tarak nónhka iáh tetiakorihwaié꞉ri tánon iakorihwanéren tsi eniontré꞉wahte.