Proverbs 10 - Ohiatonhseratokénti

Solomon Raorihonnienníhtshera

¹ Ne ká꞉ti kí꞉ken Solomon raorihonnienníhtshera: Shakotiienʼokón꞉ʼa ne ronttokhahtsherí꞉io enhshakotikwénienhste ne shakotiʼnihó꞉kon; ronwatiienʼokón꞉ʼa ne rotinonhwaró꞉ri eniotiʼnikonhráksen kiʼ né꞉ʼe shakotiʼnistenʼó꞉kon.

² Kakwahtshéhtshera enhshié꞉na tsi nonkwá ne iáh teioterihwakwaríhshion iáh shaʼtékena té꞉ken, nok ne karihwakwarihshiónhtshera ensaʼniá꞉kenhte tsi sónhnhe.

³ Roiá꞉ner iáh thahathón꞉tate ne tiakorihwaié꞉ri aiontonhkáriaʼke, nok ne ionkweʼtaksenʼokón꞉ʼa iáh thahatiié꞉na nahò꞉ten tehonatonhontsó꞉ni.

⁴ Awentoráhsera ensentenhstéhten, nok ne ioioʼtenhserahní꞉ron enhsakwahtshéhsten.

⁵ Ónhka ieʼnikonhraweiénhon iakoteʼnikonhríson enieró꞉roke kaienthóhsera nó꞉nen iotateweiennentá꞉on; iotéha aiakotá꞉sheke tsi nikahá꞉wi ieienthókwas.

⁶ Tiakorihwaié꞉ri enieié꞉na kaiaʼtateríhtshera. Ne rotirihwanerenʼákskon raotiwennaʼókon ronhséhtha tsi ronteriiohseranón꞉we tsi nihonnonhnhò꞉ten.

⁷ Enhonwenehiá꞉rake ne thotirihwaié꞉ri tsi né꞉ʼe ní꞉ioht ne kaiaʼtateríhtshera, nok ne iáh tetionkweʼtaié꞉ri iohsnó꞉re enhshonwatiiaʼtaʼnikónhrhen.

⁸ Ón꞉kwe ne iakoʼnikonhrí꞉io enieié꞉na nahò꞉ten ne tkariwaié꞉ri eniontathró꞉ri. Ón꞉kwe ne teiotenonhwarorí꞉tonte tsi rontà꞉tis enhontatkarón꞉ni.

⁹ Ón꞉kwe tiakorihwaié꞉ri skén꞉nen tsi ronnonhtónnions tánon enhotiiaʼtahnirónhake nok ne iáh tethotirihwaié꞉ri enhatiiaʼtató꞉kenʼne.

¹⁰ Ónhka nenieriʼwáhsehte ne karihwakwarihshiónhtshera ne tkáhas ne taionʼnikonhrhá꞉ren, nok ne ónhka ne orihwí꞉io ionthró꞉ris ne né꞉ʼe iakoióʼte ne skén꞉nen.

¹¹ Tiakorihwaié꞉ri akowennaʼshón꞉ʼa tho ní꞉ioht tsi ni ne tiohné꞉kote ionhnheʼón꞉we, nok ne iáh tetionkweʼtaié꞉ri akowennaʼshón꞉ʼa ionhséhtha tsi ionteriiohseraʼnón꞉we tsi niiakonhnhò꞉ten.

¹² Kahswènhtshera nek tkáhas kaʼnikonhrharáhtshera, nok kanoronhkhwáhtshera tsoʼnikónhrhens akwé꞉kon nahò꞉ten iakoʼnikonhraksá꞉tha.

¹³ Ón꞉kwe ne iakoʼnikonhrowá꞉nen karihwí꞉ioʼs tsi enhontá꞉ti, nok ne iáh tehotiʼnikonhraientátskon teiotonhwentsóhon nahonwatihré꞉wahte.

¹⁴ Ne ronttókha akwé꞉kon enhatiié꞉na ne karihonnienníhtshera tsi ní꞉kon enhatikwé꞉ni, nok ne rotinonhwaró꞉ri nó꞉nen enthontá꞉ti, kaʼnikonhrharáhtshera iáh í꞉non téteweʼs.

¹⁵ Atshoʼkowáhtshera iakoiaʼtanónhstats ne rotikwáhtshe; kententéhtshera ehtà꞉ke iakaón꞉nis ne iakó꞉ten.

¹⁶ Tsi eniakónhnheke ne teniakoterihwaʼserákwahse ne kaioʼtenhserí꞉io iakoióʼte, nok ne karihwáksen nek tkáhas sénha wé꞉so karihwáksen.

¹⁷ Ón꞉kwe ne eniontahónhsatate naiontaterihwakwaríhshien eniakónhnheke, nok ónhka iáh thaierihwaié꞉na tsi teienióhskenʼs, iótteron kiʼ ne raotirihwà꞉ke.

¹⁸ Ónhka ionhséhtha atatswénhsera iakonó꞉wen. Ónhka teionterihwarenià꞉tha tánon teierihwenhawíhtha iakononhwaró꞉ri kiʼ.

¹⁹ Sénha wé꞉so enhsatá꞉ti, sénha watié꞉sen nahserihwanéraʼke. Tókaʼ sateʼnikonhrattókha, thaʼtenhsató꞉tate.

²⁰ Ne tiakonkweʼtaié꞉ri, akowennaʼshón꞉ʼa ne shá꞉ka ne aóskon kahwistarà꞉ken; nok ne iakorihwanerenʼákskon tsi ní꞉ioht tsi ronnonhtónnions iáh shaʼtékena té꞉ken.

²¹ Tiakorihwaié꞉ri akowennaʼshón꞉ʼa wé꞉so eniakoiaʼtakéhnha nón꞉kwe, ók ní꞉se enhskwé꞉ni enhsatatenonhwarhiakon tsi nisanonhwaró꞉ri.

²² Roiá꞉ner raoiaʼtateríhtshera enión꞉ni naiesakwáhtsheʼne tánon iáh oʼthé꞉nen teká꞉ien ne aiesaʼnikonhráksaʼte.

²³ Teiotenonhwarorí꞉tonte naiontonhnhá꞉ren ne thé꞉nen naióntiere ne wahétken. Nón꞉kwe rotiʼnikonhrowá꞉nen rononʼwéskwani nahò꞉ten wattokhahtsherí꞉io.

²⁴ Ne tionkweʼtaié꞉ris ratiié꞉nas nahò꞉ten ronhská꞉neks. Nok ne iáh tetionkweʼtaié꞉ris ne enhatiié꞉na nahò꞉ten kwáh aonhá꞉ʼa thatitshá꞉nis.

²⁵ Nó꞉nen tekaweratá꞉ses éntewe, ówera ienhotiʼiaʼténhawe ne iáh tethotirihwaié꞉ri iáh káneka thenshoné꞉sheke, ók ne thotirihwaié꞉ri tiótkon skén꞉nen enhonnónhnheke.

²⁶ Tóhsa nonwén꞉ton rentóhrha ahiaióʼtenhse; tho ní꞉ioht tsi tenhiateriénʼtakáriahte tsi ní꞉ioht tohseráhtha aió꞉raʼne senawirà꞉ke tókaʼ ó꞉ni taiesaièn꞉kwarohse ne skahrà꞉ke.

²⁷ Tshewèn꞉narahkhwa ne Roiá꞉ner, sénha enhsonhnhé꞉son. Ne ionkweʼtáksenʼs ronnihé꞉ions ohén꞉ton tsi niió꞉re ienkáhewe.

²⁸ Nahò꞉ten ne tionkweʼtaié꞉ri ronhská꞉neks eʼthó nón꞉we ieniakoiaʼténhawe tsi nonkwá natonhnharáhtshera, nok ne ionkweʼtáksenʼs iáh oʼthé꞉nen tehotihrharahtsherá꞉ien tsi nahò꞉ten ronhská꞉neks.

²⁹ Roiá꞉ner shakoiaʼtanónhstats ne iakorihwakwaríhshion, nok enshakorihwáhtonʼte nónhka iáh tetierihwaié꞉rits.

³⁰ Nón꞉kwe tiakorihwaié꞉ri tiótkon skén꞉nen tsi ratinákere, nok ne iáh tetiakorihwaié꞉ri iáh kiʼ tho thahatinákereke tsi ionhwentsá꞉te.

³¹ Tiakorihwaié꞉ri nón꞉kwe nek tiontá꞉tis ne karihwí꞉ioʼs, nok ne awenʼnáhson entkawennínekenʼne karihwáksen tenkatáhstonʼ kiʼ.

³² Thotirihwaié꞉ri kawenní꞉ioʼs nahò꞉ten enthatiwennínekenʼne nok ne ronnonkweʼtáksenʼs nek ne thatiwennínekenʼs ne ahshakotiʼnikonhrakaré꞉wahte.