Proverbs 1 - Ohiatonhseratokénti

Shaʼtékena Ne Karihonnienníhtshera

¹ Ne kí꞉ken shaʼtékena ionkwarihonnién꞉nis ne Solomon, thotá꞉ti. Ronontí꞉io ne Israel, Táwit roién꞉ʼa.

² Kí꞉ken karihonnienníhtshera ensaiaʼtakéhnha nahshientéhrhaʼne ne attokháhtshera tánon kwáh tokén꞉ʼen aiesaʼnikonhraièn꞉taʼne tsi nahò꞉ten kén꞉ton.

³ Ensarihónnien tsi ní꞉ioht tsi ahsónhnheke ne tkaié꞉ri, aontesarihwaié꞉rike tánon aiesarihwakwarihshiónhake.

⁴ Enkakwé꞉ni aiakorihónnion nónhka iáh teiakoterién꞉tare teniakohswathé꞉ten tánon eniakorihónnien ne kenʼnithotiién꞉sa nahotiʼnikonhrowanénhake.

⁵ Kí꞉ken karihonnienníhtshera enká꞉nahne attokháhtshera sénha enhotiʼnikonhrowáhnha ne rotiʼnikonhrowá꞉nenʼs enhshakotiʼnikòn꞉ron ne ronateweiénhston.

⁶ Ne ká꞉ti nahotiʼnikonhraién꞉taʼne tsi nahò꞉ten wahsehtánion kén꞉ton ne karihonnienníhtshera nahonnéhsake tsi nahò꞉ten enhatirihwà꞉ren ne wentó꞉reʼs ne rotiʼnikonhrowá꞉nenʼs.

Iakorihonnién꞉nis Kenʼnithotiién꞉sa

⁷ Tókaʼ íhsehre aiesaʼnikonhrowanénhake teiotonhwentsóhon atskweniénhsthake ne Roiá꞉ner. Kí꞉ken ronátiaʼke tehonatenonhwarorí꞉tonte tánon iáh tehatikweniénhstha ne raottokháhtshera tánon iáh tehonthón꞉tats nahontéweienhste.

⁸ Konién꞉ʼa satahónhsatat tsi nahò꞉ten eniesahró꞉ri ne iaʼníha tánon saʼnisténha.

⁹ Tsi ká꞉ti nahò꞉ten eniesarihónnien ne sénha ioiánere tsi nenhsonkweʼtoʼténhake tsi shí꞉ken ní꞉ioht ne tiokʼnitioiánere teiontenonhwarahnhákstha tókaʼ niʼ ionnihtiákstha sénha watkahthohtsherí꞉io naiesá꞉ken.

¹⁰ Konién꞉ʼa, nó꞉nen ne rotirihwanerenʼákskon enhonteʼnién꞉ten naiesaʼnikonhrotá꞉ko tóhsa sathón꞉tat.

¹¹ Tókaʼ shí꞉ken ahonní꞉ron, “Kenh nontá꞉se; tánon tewé꞉sak ónhka aiethinonwarhiakhon! Káton eniethiié꞉na ne iáh oʼthé꞉nen tehotirì꞉waien kwáh nek ne tsi niionʼwé꞉sen!

¹² Tókaʼ ronnónhnhe tánon ronataʼkarí꞉te nó꞉nen eniethiiaʼtatshén꞉ri, akwé꞉kon enhonenhé꞉ion nó꞉nen eniethiiatstáhsi!

¹³ Niaʼté꞉kon entewatshén꞉ri ne kakwahtshéhsera tánon tentitewá꞉rahte nonkwanonhskónhshon nahoʼtén꞉shon entewanenhskohá꞉ton!

¹⁴ Káts takwanenhraiéhsten tánon akwé꞉kon tentewaiá꞉khon tsi nahò꞉ten entewanénhsko.”

¹⁵ Konién꞉ʼa, tóhsa ísewe kí꞉ken niionkweʼtò꞉tenʼs. Satatiaʼtohtáhrho.

¹⁶ Iáh thahatikwé꞉ni nahontehrhá꞉rate nahò꞉ten ahontéronʼonhte. Tió꞉konteʼ ronatateweienentá꞉on nahshakotinonhwarhiakon.

¹⁷ Iáh oʼthé꞉nen tekariʼwáhsta tahsaréniaʼte á꞉are ne tsítenhas ahshié꞉na tókaʼ saʼnikón꞉rare.

¹⁸ Ne ká꞉ti shá꞉ka né꞉ʼe niionkweʼtò꞉tenʼs nahonterístaien ronnónha enhotiié꞉na tánon tho nón꞉we nenhonníheie.

¹⁹ Ne ónhka ienénhskwas, kenhé꞉ion ieniakoiaʼténhawe—tho kiʼ niiá꞉wenʼs nónhka ionteriiohseraʼnón꞉we.

Attokháhtshera Tiakó꞉nonks

²⁰ Satahónhsatat tsi iontkehrontáhkhwa tánon kanataʼkéhshon tisén꞉nonks attokháhtshera,

²¹ iorakaré꞉ni tsi tisén꞉nonks tsi kaná꞉taien tioteʼenhrakahrón꞉ton tsi nón꞉we nón꞉kwe iontiaʼtarò꞉roks:

²² “Tsón꞉kwe ne tesewatenonhwarorí꞉tonte! To nikarí꞉wes iáh thaiesewaʼnikonhrá꞉take? To nikarí꞉wes entsonʼweskwenní꞉heke thaietshié꞉ron ne kaweientéhtshera, iáh kenh nonwén꞉ton thaiesewaweientéhtaʼne?

²³ Sewatahónhsatat nó꞉nen enkwattéhten; entkwá꞉ion ne karihwí꞉io, entkáhtkaʼwe tsi ní꞉kon wakaterién꞉tare.

²⁴ Tkwanaʼtónnions, kwahonkará꞉wis naontésewe nok iáh kiʼ teskwatahónhsate. Iáh thaʼteskerihwahsnié꞉se.

²⁵ Iáh tesarihwaié꞉na nahò꞉ten waʼkonrihónnien iáh ni tesathontá꞉ton ne akonhró꞉ri nahò꞉ten iáh tetkaié꞉ri tsi nihsatiéhrha.

²⁶ Nó꞉nen ká꞉ti ne oʼthé꞉nen tensaterihwatierónnionʼse, enkonhsté꞉rihste, thenkonié꞉ron nó꞉nen waʼtisáhkwaʼte ne iótteronʼs—

²⁷ nó꞉nen tensáhkwaʼte tahsaʼnikonhrhá꞉ren né shá꞉ka tsi ní꞉ioht ne tenkaweratá꞉se ne kaʼnikonhrharáhtshera, saronhiá꞉ken tánon saʼnikonhrèn꞉ton.

²⁸ Thó꞉ne ó꞉nen entehskená꞉ton attokháhtshera, iáh kiʼ thaʼtakerihwaʼserá꞉ko. Tsik nón꞉we enhstiaʼtí꞉sake iáh kiʼ thahstiaʼtatshén꞉ri.

²⁹ Iáh nonwén꞉ton tesaniaheshá꞉ʼon ne karihonnienníhtshera tánon iáh nonwén꞉ton tesathontá꞉ton ne ahtshewèn꞉narahkwe ne Roiá꞉ner.

³⁰ Iáh nonwén꞉ton thaʼtesatonhontsó꞉ni nahò꞉ten akoniatenʼnikón꞉ron tánon iáh tesatahonhsatá꞉ton tsi waʼkonhró꞉ri iáh tetkaié꞉ri tsi nihsatiéhrha.

³¹ Tho ká꞉ti enhshié꞉na tsi naʼtesatén꞉tshon tánon tsi nihsatieránion né꞉ʼe ensanonhwaktá꞉ten.

³² Ónhka ne iáh tshiekaié꞉ri tsi nihonaterién꞉tare enhonníheie né tsi iáh thahatiié꞉na ne attokháhtshera. Nón꞉kwe ne iáh thaʼteiakoʼnikonhráthe enhontkarón꞉ni né tsi iáh oʼthé꞉nen thaʼtehonaʼnikónhrhare.

³³ Ónhka ká꞉ti enhakwatahónhsatate enhoién꞉take ne enhoiaʼtahníhrha. Skén꞉nen tsi enhanonhtonniónheke iáh oʼthé꞉nen thaʼhatshahníhseke.”