Obadiah 1 - Ohiatonhseratokénti

¹ Ne kí꞉ken tsi niehorí꞉waken ne Obadiah—tsi nahó꞉ten Natiá꞉nehr Akení꞉io shakawèn꞉ni tsi nokwá nonkwehshón꞉ʼahs ne Edom. Ne Roiá꞉ner iehoteniéhton ne rorihwakarenién꞉nis kwáh onhwentsiakwé꞉kon naontá꞉rehte, Ionkwarihwahrón꞉ken tsi nihothró꞉ri ne Roiá꞉ner tánon ne rarihwakarénieʼs: “Ánion tewateriióhsera ietshitewatiaʼtón꞉ti ne Edom!”

² Orihwiioʼón꞉we tsi kwáh ne enkoniónniaʼte ne kwáh kenʼk naontahsáhska tsi nokwá nonkwehshón꞉ʼahs; kwáh kenʼk ienwatáhsawen tsi teiotenonhianíhton tsi neniesakèn꞉ron.

³ Tsi niwatatón꞉ni ne sè꞉ri ne wesaʼnikonhráta. Ne ne kwáh onontakèn꞉iate nón꞉we nisanónhsote, é꞉neken tiótteʼs tsi nón꞉we nihsatatíʼteron, tánon katíʼ satathró꞉ris, “Ónhka ohontsà꞉ke aontaiontià꞉tenhte?”

⁴ É꞉tho sá꞉ne tsi niió꞉re tsi é꞉neken tsítieʼs kwáh ne ne á꞉kweʼks, é꞉tho sá꞉ne ne satsinà꞉kwa tho iekontikwé꞉kon ne tsi tiotsistohkwarónnionʼs, tho nón꞉we kwáh tentkonià꞉tenhte, rá꞉ton ne Roiá꞉ner.

⁵ Tó꞉ka ne ratinènhskwas eniesanonhsó꞉renʼne, tó꞉ka eniesanenhskwenhá꞉ton noʼkarahsnéha —ne iesáhswenhs kwáh kiʼ eniesáhtonʼte!— iáh kenh thaesanenhskwenhá꞉ton nek khok ne ronnonhá꞉ʼa khok iaʼtahotiié꞉rihse? Tó꞉ka ne ratinenʼhará꞉kwahs aiesanonhsó꞉renʼne, iáh ónhte kenh ostón꞉ha thahó꞉nenre?

⁶ Tsi niió꞉re tsi wahatinenhskwenhá꞉ton ne raotshoʼkowáhtsheraʼs ne Esau, wahonnéhsake ne raotshoʼkowáhtsheraʼs!

⁷ Ne sewatenroʼshón꞉ʼahs iaesaiaʼténhawe ne tsi tkaristatátie waesaʼnikonhrá꞉ten; ne tisewatenrohón꞉ne waesaʼshatstenhserakén꞉ni; Tsi nihá꞉ti ne rotinaʼtará꞉kon ne sanà꞉taro waesaterístaien; iesèn꞉nis, “Nétho iáh oh thé꞉nen teioʼnikonhraièn꞉tat?”

⁸ Kwáh iáh ónhte kenh nétho entewenhniserá꞉teke, rá꞉ton ne Roiá꞉ner, enkheʼhiatonte ne ronteʼnikonhrattókhaʼs tsi nithonnétha ne tsi ionón꞉te ne Edom nón꞉we, kwáh ne enkheiónniaʼte nahotiʼnikónhrhen akwé꞉kon ne raonattokháhtshera.

⁹ Ne ronterí꞉ios ne Teman nón꞉we kwáh enthatiʼnikòn꞉renʼne, tánon kwáh ratikwé꞉kon ne ronterí꞉ios ne tsi ionón꞉te ne Esau nón꞉we tsi enhonwanaʼwéntho tsi enhonwennónhnhiaʼke.

¹⁰ Asè꞉ken tsi iáh oh thé꞉nen tekaianerenhserá꞉ien tsi nihonwaierá꞉se ne tsatateʼkén꞉ʼa Jacob, kwáh kiʼ atehènhsera entisaró꞉roke, tánon kwáh kiʼ eniesónhnhiaʼke.

¹¹ Ne siwenhniserá꞉tehkwe ákta waʼtéhstaʼne ne siwenhniserá꞉tehkwe nétho thihatí꞉te ahatíhawe ne raotshoʼkowáhtshera, tánon ne thihonnonhontsá꞉te iahontáweiaʼte ne tsi roteʼenhraká꞉ronte tánon wahatiʼwahstóhtshi thóh nón꞉we Jerusalem, ní꞉se kwáh ne ne ronnonha í꞉ken.

¹² Né꞉tho tewenhniserá꞉tehkwe iáh tesaterihwaièn꞉nihkwe naesatkáhthonhke ne tsatateʼkén꞉ʼa tsi nahoteraʼswáksenʼne, khehs iáh tesaterihwaièn꞉nihkwe naesatonhnhá꞉rake tsi naonateraswatsenhne ne sewatatenonkwes ne Judahró꞉nons raonatkaronniáhtshera; khehs naesatatkowanáhton neʼthó wenhniserá꞉tehkwe ne shahatiíehsha.

¹³ Iáh thaʼteiotonhontsohón꞉ne ne iaesataweiá꞉ton ne tsi ronatenʼenraká꞉ronte nakonkweʼtaʼshón꞉ʼa khehs naesatkahtonke tsi nihorihwanoronstén꞉ni, khehs niaesáha ne raotshoʼkowáhtshera ne siwenhniserá꞉tehkwe sahatironhiá꞉ken.

¹⁴ Ní꞉se iáh tesaterihwaièn꞉nihkwe ne taesatá꞉ʼonke ne tsi tetiathahá꞉sere nahsheié꞉na tsi nihá꞉ti ne ronteʼnièntha nahatiʼniá꞉kenʼne. Iáh thaʼteiotonhontsohón꞉ne Í꞉se aesaterihwaièn꞉nike iahsheiatká꞉wen ronnonhá꞉ke ne tehontátswenhs ne wenhniserá꞉tehkwe ne shaʼtkonʼnikonhrhá꞉ren.

¹⁵ Asè꞉ken ne rawenhní꞉sera ne Roiá꞉ner ó꞉nen ákta í꞉weʼs niahonatiaʼtón꞉ti onkweʼtakwé꞉kon. Tsi nihsheierá꞉se, kwáh kiʼ tho nentiesaié꞉raʼse; tsi nihseweiennó꞉ten senontsì꞉ne enská꞉raʼne.

¹⁶ Asè꞉ken tsi nisahnekí꞉ren eʼthó nón꞉we ne akenontatokenhtí꞉ke, katíʼ kwáh nonkwehshón꞉ʼahs enhatihnekí꞉ra ienhatikón꞉tahkwe; kwáh enhatihnekí꞉ra tánon kwáh tshienhatiniaʼkwakwaríhshiaʼte, tánon katíʼ tsi shí꞉ken ní꞉ioht ne iáh ʼeh thaiawèn꞉ʼen.

¹⁷ Ók tsi ionontáhere ne Zion ótiaʼkeʼs enhieʼniá꞉kenʼne, tánon kwáh enionatatokénhtiʼke. Tsi tahawatsiratátie ne Jacob tsi kwáh enhonawenkhón꞉weke nohóntsa.

¹⁸ Ne tsi ronónhsote ne Jacob tho neniohtónhake kwáh ne ne ó꞉tsire, tánon ne tsi ronónhsote ne Só꞉se tho neniohtónhake tsi ní꞉ioht ne noʼtónhkwah; tánon tsi ronónhsote ne Esau kwáh ne ne kahwá꞉ʼe í꞉ken; eniakotiaʼtátshaʼahte tánon eniakóhtonʼte, tánon iáh ónhka tshiaʼtaonsaiakotá꞉tenre tsi ronónhsote ne Esau; asè꞉ken ne Roiá꞉ner rotatí꞉ʼon.

¹⁹ Tsi nihá꞉ti ne Negeb kwáh enhontiénawahste ne tsi ionón꞉te ne Esau, tánon tsi nihá꞉ti ne Shephelah neʼne tsi ronnonhontsá꞉ien ne Philistines; kwáh neʼ enhontiénawahste tsi ronnonhontsá꞉ien ne Ephraim tánon tsi ronnonhontsá꞉ien ne Samaria tánon ne Benjamin ronnónha enhontiénawahste ne Gilead.

²⁰ Tánon naonekenhteronʼtsheraʼshón꞉ʼahs ne Israel Ne ronwananakerakwáhton, kwáh kiʼ enshonatiéhsten ne tsi ionhontsá꞉ien ne Canaanites kwáh tsi niió꞉re ne Zarephath; tánon tsi nihá꞉ti ne ronwananakerakwáhton ne Jerusalem ronnónha ó꞉nen Sepharad iehón꞉neʼs, kwáh enhontiénawahste ne tsi kanatowá꞉nenʼs ne Negeb.

²¹ Tánon tsi niiá꞉kon ne sehshakoʼniakénhton kwáh kiʼ ienhatinontá꞉raʼne tsi Ionón꞉te ne Zion ne ne tahatiiaʼtoréhthake tsi ionón꞉te ne Esau; tánon ne tsi kanakerahserá꞉ien kwáh Roiá꞉ner enhowenkhón꞉weke.