Numbers 9 - Ohiatonhseratokénti

Ne Tekeníhaton Éhneken Watohetstákwah

¹ Ne Roiá꞉ner wahotháraʼse ne Mahís né iahonwenhtsaʼthènke ne Sinai nónhwe né꞉ne tsiotenhniʼtatierénhton né tehiosehrakéhaton nó꞉nen nonhkweshón꞉ʼas NÍsraerʼró꞉nonke shaʼtethonaténhtion ne Egypt. Wahénron,

^2-3 “Ne kaiéri-iawénhre senská꞉rake nónhwa wenhnítare, né꞉ne tsi niaʼtenhwatʼsènhtho entewatásawen, nonhkweshón꞉ʼas NÍsraerʼró꞉nonke tsi enhonnenhtanó꞉ronsthe ne èhnekenh watohetstáhkwah ne entsiohianénhaʼwe akwékon tsi nikahianerenhseró꞉tens tánon tsi nikarihoténhsons nètho.”

⁴ Káti ne Mahís washaʼkokoriánion nonkweshʼon꞉ʼas nahonnenhtanó꞉ronste ne èhnekenh watohetstákwah,

⁵ tánon nokarasné꞉ha ne kaiéri-iawenhréhaton shiʼwenhniseráte ne tsiotenhnitatieʼrénhton né wahonterihwaténhtiaʼte thóh nónhwe ne Sinai iahonwenhtsaʼthènhke. Nonhkweshón꞉ʼas orihwaʼkwékon thóh nahatíiere tsi kíʼ ní꞉ioht ne Roiá꞉ner tsi rohró꞉ri ne Mahís.

⁶ Ók thó꞉ka kíʼ niháti ne kwáh shiʼhioriwakáion iáh tehonatʼkwénienskwe tsioríhwa tsi kèn niehotiʼiéren naweheiónhtha, tánon káti iáh tehiotónhon né꞉ne ahonaterihwahtentiáʼtonke ne èhnekenh watohetstákwah né꞉ne wenhniseráteʼkwe. Mahís tánon Aaron tsítʼnes niahónhne

⁷ tánon wahonníron, “Iáh tehionkwatʼkwéniens tsioríhwa tsi kenʼniehionhkwaiéren nawenhehiónhtha, ók onhkáti nènhne nahó꞉ten aoríhwa tsi iáh thaʼhónton nahiakhiʼhiatiatáraʼse ne ronátiakes NʼIsraerʼró꞉nons ne thènen iahionhkwáʼienhke rahohénton ne Roiá꞉ner?”

⁸ Ne Mahís wateshaʼkorihwasehrákwahse, “Sehwateráhrat tsi nióre ne thènen entʼtákon noríhwa ne Roiá꞉ner.”

⁹ Ne Roiá꞉ner wahoró꞉ri ne Mahís

¹⁰ nashaʼkoróhri nonhkweshón꞉ʼas NÍsraerʼró꞉nonke, “Nó꞉nen nónhkak tsi nítsion khès tsi niensewatʼwatsírihne ne tsi iáh tesewatʼkwéniens né tsi iesewaʼiénen noierónhta khès naínonh nióre niesehwénon tsi tesewatʼthahákwen, ók shé꞉kon kíʼ í꞉shewere nahiseʼwenhtanó꞉ronsʼte ne èhneken watohetstákwah,

¹¹ wahitsiríhonh kíʼ nahisewenhtanó꞉ronsthe sehwenhníta kíʼ onakènhke, né nokarasné꞉ha ne kaiéri-iawénhre nenhwenhniserakéhaton né tekeníhaton enwenhnítarake. Ne sehwentaʼnorónhstak ne iáh tewatʼthenkwáhton kanátaro tánon ne tehionhontahiótsis.

¹² Tó꞉sa othènen naʼisewatátere ne ká꞉khwa tsi nióre nó꞉ia ientsórenhne tánon tó꞉sa tehietshiʼstsiéntsiak ne katshénens. Sehwenhtanó꞉ronst ne èhneken watohetstáhkwa akwékon tsohianénhaf tsi kíʼ nikahianerenhseró꞉tens.

¹³ Ók tó꞉ka ónhkak tsi nítsion ne shiʼhiorihwakáion satesehwahiatátsion tánon iáh kaʼnèka tshieʼsehwénon tánon iáh tesewenhtanorónstha ne èhneken watohetstáhkwa, iáh kí ónenh né tahonseʼsewatenaʼtónkwen Í꞉i akonhkwetashón꞉ʼas akènhake, tsioríhwa tsi iáh othènen teteskwáhwi ne shiaʼkáhewe. Ónenk kíʼ tsi ensewaronhiáken tsi nienhiáwenhne ne sewarihwaneraháktsheras aorihwáke.

¹⁴ “Tó꞉ka ne thiʼhononhontsátes ne skát꞉ke sewanákere rónhnere nahonhnenhtaʼnóronste ne èhneken watohetstáhkwah, ónenk kíʼ tsi orihwakwékon enhonhnenhtanó꞉ronsthe tsi nikaianerenhseró꞉tens ó꞉ni tsi niʼkarihoténhsons. Onhkwetakwékon né sahaʼkohianerénhseras íken, né꞉ne thóh ratiʼnakerehónhwe khès ne thiʼhononhontsátes.”

Né Iotsikeratékʼkha

^15-16 Né tewenhnisehráteʼkwe natóhsehra ne tsi nónhwe nihénteron ne Roiá꞉ner sontkétsko, otsíkera ónhwe tánon né wakaróhroksʼte. Né shiʼhiokaráhon né tsi iotsíʼkerare thóh niʼiohtónhne tsi ní꞉ioht nó꞉tsire.

¹⁷ Nónen ensewatʼtsikeraʼrónhko, nonhkweshón꞉ás NÍsraerʼró꞉nonke tenhsonhnáthakwe, tánon thóh nónhwe ienshonthatohsehróten tsi nónhwe notsíkera ethàke ienhénwe.

¹⁸ Nonhkweshón꞉ʼas tenhonhnáthaʼkwe nó꞉nen ne Roiá꞉ner enhatróri, tánon tsi nenhsheʼsatró꞉ri ensonhthatohsehróten. Tsi kíʼ nióre notsíkera èhneken íwes tsi nónhwe niwatóhsehrote, skátke kíʼ ratíteronh tsi nónhwe nihonaʼnátaien.

¹⁹ Nó꞉nen notsíkera sóhtsi karíwes thóh èhneken íwes tsi nónhwe niwatóhsehrote, enhonwawénhnarakwe kíʼ ne Roiá꞉ner tánon iáh kíʼ èhren thahonsahónhneʼte.

²⁰ Sehwatiéren notsíkera tokàra khók nónhta thóh èhneken íwes tsi nónhwe niwatóhserote; ók kíʼ tsík nahiotónhake, thóh kíʼ ratíteron khès ne tenhshonʼnátakwe, né entewanónhton tsi nenhshaʼkoróri ne Roiá꞉ner.

²¹ Sehwatiéren notsíkera okarasné꞉ha tsi nióre ne noronhkéhne khók thóh enwésehke, tánon tenhshonʼnáthakwe kwáh kíʼ tsi niʼiostó꞉re notsíkera èhren énsehwete. Né nónen notsíkera èhren énsehwete, èhren kíʼ wahónhnete.

²² Né꞉ne tewenhniseráke khók, khès ne sewenhníta, tsósehra, tó꞉ka ó꞉ni sénha karíhwes, tsi nióre notsíkera thóh èhneken íwes tsi nónhwe niwatóhsehrote, iáh kíʼ thatahonhnáthaʼkwe; ók kíʼ nónenh èhren ènsewete thóh ne kíʼ tenshonʼnáthaʼkwe.

²³ Enhonhnátaien tánon tenhshonʼnáthaʼkwe tsi roʼnatewenhnarakwenhátie tsi kíʼ nihoríhonte ne Roiá꞉ner ne Mahís.