Numbers 5 - Ohiatonhseratokénti

Ne Iahʼtehiakotkwéniens Onhkweshón꞉ʼa

¹ Ne Roiá꞉ner wahawénhase ne Mahís,

² “Sehró꞉ri nonhkweshón꞉ʼas NÍsraerʼró꞉nonke nahionhtaʼtsiatí꞉nekenhwe ne tsi watená꞉taien onhkweʼtakwékon ne iotennrákteron nakonhéhonkne hiakónh꞉rare—tánon onhkweʼtakwékon nónhka ne iáh tehiakotʼkwéniens né꞉ne iehiakoiénen naʼwenhehiónhta.

³ Ratiʼkwékon ietsihiatínekenf kí꞉ken ne shiʼhiorihwakáion tehiaʼkohiatátshons, né káti ne tó꞉sa thaʼhatítsionhte tsi watenáthaʼien, tsi nónhwe ne skát꞉ke iakwaná꞉kere nakonhkwetashón꞉ʼas.”

⁴ NʼIsraerʼró꞉nons wahontewénhnarakwe tánon washaʼkotihiatínekenhwe ne tsi watená꞉taien.

Nahonsaʼkakaʼriákon Nahó꞉ten Ne Tewaterientaʼwenhréhon

⁵ Ne Roiá꞉ner tahá꞉wen ne Mahís

⁶ ne tehioterihwasonhterónhnions karihonhniennítsheras né nonhkweshón꞉ʼas NÍsraerʼró꞉nonhke akorihwàke. Nó꞉nen nónhkak tsi nítsion ne iáh tahisewarihwatokénhake rahonháke ne Roiá꞉ner tánon wahétken tsi nahitsihiaʼtiérase nónhkak akóren,

⁷ ónenk kíʼ tsi ensehwarihwanírate ne sewarihwanerahákʼtsheras tánon kwáh enkanáʼnonhke tsi entsiʼsewaká꞉riake, tánon ne 20 iosénhtsheroʼte, né꞉ne tsi nikáien wahitsikarónhni.

⁸ Ók tó꞉ka nètho ónhkwe waʼahʼéheie tánon iáh ónhka tehontáʼtenonhkwe né꞉ne roʼnónha ahonsahonwatiʼkáriakʼse, ónenk kíʼ tsi Roiá꞉ner entʼthónhion né꞉ne ratiʼtsihénsthatsis enhontiénawaste.

⁹ Káti ó꞉ni kwáh tsi níkon ne katoʼkensthánions tshiaʼkoiesthánion né Israerʼró꞉nons thonwáwi ne Roiá꞉ner ratiʼtsihénstatsis káti rahonawenhkʼónhwe tsi roʼnónha kíʼ ronhwaná꞉wi.

¹⁰ Shaʼtihiatáʼtshons kíʼ ne ratiʼtsihénstatsis enhontewenhiénton ne roʼnónha ronhwanáwi.

Né Iotiʼniáʼkhons Tsi Tekonhwatiʼnikonhráʼras Ne Rothiniát꞉kons

¹¹ Ne Roiá꞉ner wahó꞉rori ne Mahís

^12-14 nahontaʼshakáwen NʼIsraerʼró꞉nons ne tehioteriwaʼsonhterónhnions karihonhnienʼnítsheras. Ahónton né naiáwenhne né rónhkwe wateshaʼkotenikonhráraʼne ne ró꞉ne tsi iáh tehiaʼkorihwató꞉ken ne rahonhàke tánon watsionhthaʼtsiatáʼtsonste tsi skát꞉ke wahiá꞉rate nó꞉ia rónhkwe. Ók kíʼ ne teníteron iáh kwáh orihwí꞉io terónhnis, asèken ne shaʼkoksténha nonhtiérek ahiakorihwaséhtonke—iáh ónhka teierihwaní꞉rats, tánon iáh ónhka tehiontatʼtharáse. Khès ó꞉ni thóh nahiáwenhne ne roʼniákhon wateshaʼkotenikonhráraʼne ne ró꞉ne, iawerohátsien tsi iakorihwató꞉ken íken.

¹⁵ Ne kwáh tsit nahiotónhake ne rónhkwe ónenk tsi ratsiʼhenstatsíʼne niensakohiaténhaʼwe ne ró꞉ne. Ónenk tsi ienháhawe tsi niwaterihwanónhtons ne iahióntkaʼwe tekakonhtshérake tehiotikonhstónres othèsera, ók iáh kíʼ thènen tahonthahoʼienónhti ne iakeniewá꞉tha kènie khès ne kanetanó꞉ron, tsioríhwa tsi ne ienwatkaʼwénhke tsi natehatenikónhraras ne roniákon, ne naʼrónhni ne orihwihioʼónwe ahoʼtóhkenhse.

¹⁶ Ne ratsihénstatsi ohénton nienshaʼkohiaténhawe ne iakónhkwe tánon enshaʼkahónhnien ohénton thaʼiétanne ne ietsienharákwahke.

¹⁷ Kwáh ionekatokénhti enhanékaren ne ionaʼwasthakarí꞉io kákʼsakon tánon ostónha tenhakénhrakwe noswenhkaráke káien tsi nónhwe niwatóhsehrothe ne tsi rénhteronh ne Roiá꞉ner tánon onekanóske ienhó꞉ti né꞉ne akanekákshaʼte.

¹⁸ Ethòne enshaʼkhononkwiseranerénhsi ne iakónhkwe tánon ne iewatkáwen nothésera hionhtsaná꞉ke enhá꞉weron. Ratsanáke ne ratsihénstatsi enhatʼtháwa ne akèra né kanèkare ne kaʼnekátksen né꞉ne tká꞉has karewatá꞉tshera.

¹⁹ Ethòne ne ratsihénstatsi enshaʼkahónhnien ne iakónhkwe naierihwanónhwene naierihwanírate tsi nenhénron ne ratsihénstatsi: “Tó꞉ka iáh teshaʼtenakwahiesáton, iáh kíʼ tahishaʼkarónhniate ne karewatá꞉tshera tsi nitʼkáhas kí꞉ken onékanos.

²⁰ Ók tó꞉ka shaʼtenakwaieʼshá꞉ton,

²¹ aiáwenhs ne Roiá꞉ner ahiasenhnáksate tsi nòkwah ne shonkwetaʼshónhas. Aiáwens né senhitsháke nahonktóhkerihke tánon ne senekwenhtáke aonthó꞉we.

²² Aiáwens kí꞉ken onékanos senekwénhtakon niáwe tánon ne akarihónhni naʼsatenekwénto tánon ne sheniʼtshake nahonkʼtóhkerihke.” Ne iónhkwe tsi tenhkarihwasehráko, “Waʼkerihwanónhwene; aiáwenhs ne Roiá꞉ner thóh nihá꞉ier.”

²³ Ethòne ó꞉nen ne ratsihénstatsi kahiatonhseráke enhaʼhiáton kí꞉ken karewatáhtshera tánon thóh kák꞉sakon enhanóhare ne kaʼnekáksen nahonsonhterá꞉kewe ne kahiáton.

²⁴ Nohénton narónhnien ne iónkwe nakanekíhra nonèkanos, né tsi nonhtiérek ne enkarihónhni kwáh íken tsi enhionhnonhwaʼtáten,

²⁵ ne ratsihénstatsi ónenk tsi enshá꞉kwa ne iónhkwe ne iewát꞉kawen nothésera, ienhá꞉thate tsi enhahiaʼtatériste rahohénton ne Roiá꞉ner, tánon thóh ietsienhará꞉kwahke ienhá꞉ren.

²⁶ Ethòne kwáh sewatsá꞉na nothèsera ienhát꞉kawe né꞉ne iakheʼhiarastákwah enrónhniate tánon thóh enháʼtshahʼáhte ne ientsienharákwahke. Noʼnakènhkha, ónenk tsi enrónhnien ne iónhkwe nakanékeri nonékanos.

²⁷ Tó꞉ka iotenaʼkwahiesháton, noné꞉kanos kwáh íken tsi tehiotenonhianíton tsi enhioronhiá꞉kenthe; né kanekwenhtáke kwáh enwató꞉we tánon ne kaʼnitʼtshákes enwaʼtókerihke. Naosénhna enkarewáthonke tsi nòkwah nahonkwetashón꞉ʼas.

²⁸ Ók tó꞉ka iáh tehionhí꞉kon, iáh kíʼ othènen thaʼhiohiátawen tánon kíʼ enwáton nahiowiraiéntaʼne.

^29-30 Né kí꞉ken ne kaianerénhsera tsi nihiáwenhs nó꞉nen ne rónhkwe roʼtekéfʼfen tánon tenshaʼkotenikonhrárahne ne shaʼkoksténha tsi iakotenaʼkwahiesháton. Ne iónhkwe enkhonhiónhnien ohènton takáthane ne tsi ientsienharakwáhke, tánon ne ratsihénstatsi né enhaʼterihwaténhtsiaʼte ne orihwakáion kaianerénhsera.

³¹ Ne shaʼkoksténha kwáh kíʼ enshaʼtiatotaríhsi tsi nahonhí꞉konhke, ók ne iónhkwe, tó꞉ka hioʼnhí꞉kon, ónenk kíʼ tsi enkaronhiáken tsi nienhiáwenhne.