Numbers 31 - Ohiatonhseratokénti

Ne Ateriʼioseratokénti Tsi Nòkwah Ne Midan

¹ Ne Roiá꞉ner wahawénhase ne Mahís,

² “Seréwat ne Midianró꞉nons ne tsi nisakotiʼieràse nonhkweshón꞉as NʼIsraerʼró꞉nonke. Nónen etnénhsehre, enshí꞉heie.”

³ Káti ne Mahís washakewénhase nonkweshón꞉ás, “Sewathateweienénhtan nahí꞉sewaterí꞉io, né káti nahónton iahietsihiatiatónti ne Midianró꞉nons tánon ietsiréwat tsi nihonwaieráse ne Roiá꞉ner.

⁴ Né sotiʼtiokwáʼtshons NÍsraerʼronónke iahitshihiaté꞉niet enskatewenhniawehetseráhsen niháti nahonterihiósehra.”

⁵ Káti enskatewenhniawehetserásen niháti wahonwahiʼiataráko ne sohthitiokwáʼtshons, né tiokwékʼtons tekeni-iawénhre niwenhniawehʼetsheráhsens niháti wahontaʼteweienénhtaʼne nahonteriʼiósera.

⁶ Ne Mahís iashakoténiete nahonteriʼiósehra né꞉ne Phinehas né roiénha ne Eleazar ne ratsihénstatsi íken ne enteshaʼkoniarotároke, rahónha roterihóntaʼkwe ne iotokéntis nahoténsons tánon ne kahonrawatskówa ensakónaʼne nó꞉nenh enwatewenhnóten.

⁷ Iakonwatiatónti ne Midianró꞉non, kwáh kíʼ tsi nihonáʼon ne Roiá꞉ner ne Mahís, tánon ratikwékon wahonwatinonhwariákon ne ronhnónhkwe,

⁸ thóh ratihiátare ne wísk nihatinonhtihiotsheráke ne Midianrónons: né꞉ne Evi, Rekem, Zur, Hur, tánon ne Reba. Wahonwaʼnonhwariákon nònhne ne Balaam ne roiénha ne Beor.

⁹ Nonhkweshón꞉ʼas NÍsraerʼró꞉nonke waʼkonhwatiʼiéna ne Midianró꞉nons konhnónkwe tánon ne ratiksahokónhas, iakonhwatiʼhiaténhawe ne tsionónskwarons tánon ne rahotitshenenʼókons, wahatinenskwenháton ne rahonatʼtshokowátsheras,

¹⁰ tánon wahontenonhkwatekʼtánion ne rahotinatowanensónhas tánon tsi ronatatosehró꞉tons.

¹¹ Akwékon iahatíhawe ne kanenskwenháton né ronatienawáston, et ratihiátare ne ratinótonhkwe tánon ne kontiʼtshénens,

¹² tánon Mahís tánon Eleazar tsítnes niahatíhawe ó꞉ni ne ienákere NÍsraerʼronónke, né roʼnónha tsi tsohentakwénhrare nènhne ne Moab nónhwe thohnatatóserote íh꞉se nòkwah ne Jordan tánon ne Jericho.

Né Ronhterí꞉ios Sahónhnewe

¹³ Mahís tánon ne Eleazar, tánon ratikwékon ne sakotihenténhse ne ienákere iahatihiákenhne ne tsi ronatatosehróton niatahonwaná꞉terahte ne ronhterí꞉ios.

¹⁴ Ne Mahís kwáh íken tsi washakonákwahse ne ronaterihóntons, ne ratisenhnowánens ne rahotitsiókwahs ne ronhterí꞉ios tánon ne ratikwekonháties, né꞉ne sahón꞉newe tsi waterí꞉io nathontahón꞉ne.

¹⁵ Washakoriwanónhtonhse, “Onh nontiéren tsi konhtikwékon ne tsonathonwísen tsi wahetsiríhon nakonhnónhnheke?

¹⁶ Sewé꞉hiare ken tsi tsionatʼthonwísen onhnón꞉ha konhtísehrene ne Balaam rahorihonhnienhnítsheras tánon né Peor nónhwe wahakotihenténhse nonhkweshón꞉ás ne iáh thahiakorihwatokénhake rahonháke ne Roiá꞉ner. Né kíʼ aoríhwa thakáhawe ne kannrhaʼtarihnétsera rononháke ne Roiá꞉ner rahonkwetashón꞉ʼs.

¹⁷ Káti ónenh nónhwa kwáh niatekaksátaʼke tánon kwáh konhtikwékon ne konnónhkwe tsi ietshinonwariákon né kén niehiotiʼiéren ne kaniák꞉tshera,

¹⁸ ók kíʼ í꞉se sewatatiénhras ietsiríhon nakonhnónhnheke konhtikwékon ne konhtiksahokónhas ó꞉ni ne konhnónhkwe ne iáh arèko tekonhtinakwahientéri.

¹⁹ Ónen kíʼ tsi ní꞉tson ne onhkák ietʼtsinonhwariákon khès ne kén iesehwaiéren nohierónhtha ónenk kíʼ tsi áhtste natosehrákon ensewenhterón꞉take né꞉ne tsáta nónhta nikaríhwes.

²⁰ Ónenk ó꞉ni tsi kwáh akwékon entshisewenhseratáko ne sewatʼtsherónhnia ó꞉ni tsi nahoténsons ne oná ionhniáton, ne kaiatákeras ononhwé꞉ron, khès nóienhte.”

²¹ Ne Eleazar ne ratsihénstatsi íken washakawénhase ne ronhnónh꞉kwe né sóh꞉ti ne tsi waterí꞉io nathethonénon, “Né kí꞉ken ne kaianerénhsheras ne Roiá꞉ner thó꞉wi ne Mahís.

^22-23 Norihwakwéhkons tsi nahoténsons ne iáh thahóntsha, tsi ní꞉ioht ne owistanóron, kawistaráken, teiotwístaron notsínekwar, karístatis, owá꞉sa, khès ne oristakàte, ónenk tsi enkaristanirátonke tsi otsiràke enkonhtó꞉hetste. Orihwakwékon noiáshon nahorihoténshon né nènhne enkanoharétonhke nonékanos tsi entsohiánerenhne.

²⁴ Né tsatákhaton nenhwenhniserakéhaton ónenk tsi entsisewanó꞉hare ne sewatʼtsherónhnia; ethòne kíʼ kwáh entsisewatkwenienstónhake tánon entshetsiríhon niahonsehʼsewatáwehiate ne tsi sewaná꞉taien.”

Waʼthatihiakhónnion Ne Kanenskwenháton

²⁵ Ne Roiá꞉ner wahawénhase ne Mahís,

²⁶ “Í꞉se tánon ne Eleazar, skát꞉ke ne roná꞉tsiakes sakotihenténhse ne ienákere, ensehwasehtánion orihwakwékons tsi nahoténsons ne rotiʼienáhon thóh ratihiátare ne ratinó꞉tons ó꞉ni ne khontiʼtshénens.

²⁷ Tesehwahiakhónhnion tsi nahó꞉ten ne tkahá꞉seron tánon tehioríhwake kwáh né sáka tsi kénhak, énska né꞉ne ratisó꞉tar rahonákwenk tánon ne kenhiotiéton né nènhʼne ne ienákere akó꞉wenk.

²⁸ Tsi nahoténsons ne ratisó꞉tar rahonáwenk, sehwatié꞉nawast né꞉ne ahiokaraiéntane ne Roiá꞉ner rahorihwáke né꞉ne tsonkwéta ne wísk tewenhniáʼwe niháti ratinó꞉tons tánon kwáh satehiotónhak ne khontitshéʼnenhs, né tewahóntes, teiotinakarontónʼa, tánon ne kaiatákeras.

²⁹ Eleazar tatshíʼtson ne ratsihénstatsi né꞉ne katokénston ahón꞉hion ne Roiá꞉ner.

³⁰ Né tsi nikáien ne kenhiotiéton nonhkweshón꞉ʼas akówenk, Saiáta ne wísk-niwásenh niháti ratinó꞉tens tsisewahiató꞉tshion tánon kwáh èthon nasehwáien tsi nókwah ne tsionónskwahrons, ne tewahóntes, teiotinakaronhtónʼa, ó꞉ni ne kaiatákeras. Levites né tahieʼtshí꞉hion tsi roʼnónha ronaterihwatsʼteríston ne Roiá꞉ner rahotóhsehra.”

³¹ Ne Mahís tánon ne Eleazar thóh kíʼ naíhʼiehre tsi níʼ nisakoríhonte ne Roiá꞉ner.

^32-35 Ne tehioterihwasónhteres né꞉ne kahiatónhnions tsi nahoténsons ne rotiʼienáhon ne ratisóh꞉tar, né꞉ne iehiowenhténions tsi nahoténsons ne iatehatihiáti ronatienawáston: 675,000 nihá꞉ti teiotinakaronhtónʼa tánon ne kaiatákeras, 72,000 nikónhti tsionónskwahrons, 61,000 niháti tewahóntes, tánon 32,000 nikónhti ne iáh tekonhtinakwahientéris.

^36-40 Nasénhnon tsi nihonáwenk ne ratisóhtar né꞉ne 337,500 niháti teiotinakaronhtónʼas tánon ne kaiatákeras, né꞉ne 675 niháti né꞉ne enkakarhiákʼthonke ne Roiá꞉ner rahorihwáke; 36,000 nikónhti tsionónskwahrons né꞉ne ratisóhtar rahonákwenk, né꞉ne 72 niháti enkakarhiákʼthonke ne Roiá꞉ner rahorihwáke; 30,500 niháti tewahóntes né꞉ne ratisóhtar rahonáwenk, né꞉ne 61 niháti ne enkakariákthonke ne Roiá꞉ner rahorihwáke; tánon 16,000 nikónhti ne iáh tekonhtinakwaientéris né꞉ne ratisóhtar rahotirihwáke, né꞉ne 32 nikónhti ne enkakariákthonke ne Roiá꞉ner raorihwàke.

⁴¹ Káti ne Mahís tahá꞉wen ne Eleazar né kakarhiákʼton ne katokénston entʼthónhion ne Roiá꞉ner, tsi nihorihwíson ne Roiá꞉ner.

^42-46 Tsi nihonáwenk ne ratinákere kwáh kíʼ nʼe satèhiot tsi kíʼ nihotiienáhon ne ratisóhtar; 337,500 niháti teiotikakaronhtónʼas tánon kaiatákeras, 36,000 nikónhti tsionónskwahrons, 30,500 niháti tewahóntes, tánon 16,000 nikónhti ne iáh tekonhtinakwahientéris (tsonatʼthonwisen).

⁴⁷ Káti tsi nikonháties kí꞉ken ne Mahís saiáta wahohiatótshion ne wísk-niwásen niháti ratinó꞉tons tánon ne konhtiʼtshénhnens, tánon kíʼ tsi nihorihwatáton ne Roiá꞉ner, tánon káti Levites thasakáwen tsi roʼnónha ronaterihwatsteríston ne Roiá꞉ner rahotóhsehra.

⁴⁸ Ethòne kíʼ ne ratisenhnowánens tsi niká꞉ien ne rowatiríhonte ne ronhterí꞉ios Mahís tsítres niahónʼne

⁴⁹ tánon hiahonwaróri, “Shénshion, wahakhiʼhiásehte ne ratisóh꞉tar tsi í꞉i tsiakiniarotáronhne tánon iáh ne saiáta tetiothonʼkwétokʼte.

⁵⁰ Káti tahiakwáhawe ne owistanórons karasestánion, tehiontenenhtshanáktas, atenenhtshánas, anisnón꞉sawis, atewá꞉shares, tánon ne hionhnitiákʼthas né꞉ne tiakwahiatátshons tsonhkwaháseron. Né ienhiakwátʼkhawe rahonhàke ne Roiá꞉ner né꞉ne ahiakwahkáriakʼte ne tsi iationʼónhne, né káti nahónton nahontashónkwahne.”

⁵¹ Ne Mahís tánon ne Eleazar waniʼiéna ne owistanó꞉ron, akwékon né꞉ne karaséston íken.

⁵² Ne tiokwéktons ne rotikariákʼtons ne ratisenhnowánens í꞉siʼnónhwe ne kaiéri tewenhniáwe nikakonhtseràke nihiókste.

⁵³ Tsi niháti ne iáh ratisenhnowánens tehonatenatónkwen wahontiénawasthe ne rotinenskwenháton.

⁵⁴ Káti ne Mahís tánon ne Eleazar atohserákon nianihá꞉we nowistanó꞉rons, né káti ne Roiá꞉ner nahontaʼsakóne nonhkweshón꞉ás NÍsraerʼró꞉nonke.