Numbers 30 - Ohiatonhseratokénti

Tsi Niʼkaianerenhseró꞉ten Ne Thènen Ahionráratsʼte

¹ Ne Mahís tashaʼkáwen ne tehioterihwasónhteres karihonhnienhnítsheras ne sakotihenténhse tsi ratitiókwaiens NÍsraerʼró꞉nonke.

² Nónen ne rónhkwe waʼharáratsʼte ne thènen ahontahá꞉wenh ne Roiá꞉ner khès ne waharihwanírate né knahótenk ahateweiénton, iáh kíʼ tehiówenk ne tahonsahá꞉hiake tsi nihorarátston, ók ónenk tsi enhateniénhten orihwakwékon thóh nenháiere tsi kíʼ nihá꞉wen.

³ Nó꞉nen ne kén nitsiohiónha shé꞉kon roʼní꞉ha rahonónskon kénteron honráratsʼte ne thènen ahontahá꞉wenh ne Roiá꞉ner khès honráratsʼte ne thènen ahonteweiénton,

⁴ ónenk kíʼ tsi orihwakwékon thóh nenhkáiere tsi kíʼ nihiorarátsʼton khès roʼní꞉ha waharihwáiake nónen enharihwáronke.

⁵ Ók tó꞉ka roʼní꞉ha waháriste nakarihwaiérite tsi nihiorarátsʼton nó꞉nen sahothóntene, iáh kíʼ thaʼtehiotonhontsóhon nakarihwaiérite. Né Roiá꞉ner enshanikónhrenhse, tsioríhwa tsi roʼní꞉ha iáh tehothontáton ne iatahiokʼten.

⁶ Tó꞉ka shí꞉ken ne kén nitsohiónha honráratsʼte, tó꞉ka thonʼnikonhrónhni khès ne iáh tshiatehiohiatoréton, khès honráratste ne thènen ahonteweiénton, tánon ethóne wahó꞉niake,

⁷ ónenk kíʼ tsi orihwakwékon enwateniénten nakarihwaiérite tsi nihiorarátsʼton nék tó꞉ka kén ne tení꞉teron aharihwásten nónen sahothóntene.

⁸ Ók tó꞉ka ne tení꞉teron enhá꞉nese nakarihwaiérite ne iorarátsʼton nónen saharihwáronhke, iáh kíʼ tehioterihwaiénhni niatahiókʼten. Ne Roiá꞉ner enshanikónhrenhse.

⁹ Ne ioteré꞉hons khès ne tehiotetʼkháshion ónenk kíʼ tsi orihwakwékon enkarihwaiérite tsi nihiorarátston tánon orihwakwékon tsi nahó꞉ten ahonteweiénton.

¹⁰ Tó꞉ka ne ioniákon enwaráratsʼte khès né knahótenk ahonteweʼiénton,

¹¹ ónenk kíʼ tsi orihwakwékon thóh kenhkáiere tsi nihiorahrátston tánon tsi ahonteweʼiénton nék khók tó꞉ka kén ne teníteron aharihwásten nónen enhothóntene.

¹² Ók tó꞉ka ne teníteron enhánese nakánane tsi nihiorahrátston nó꞉nen enhothóntene, iáh kíʼ thaʼtehiothonhontsóhon nakarihwaiérite tsi nihiorahrátston. Né Roiá꞉ner enshaʼnikónhrenhse, tsioríhwa ne teníteron tsi wathátaste nakarihwaiérihte tsi nihiorahrátsʼton.

¹³ Né teníteron rohianerenhseráien ne tahontaharíhsi tsi nahó꞉ten hiorahrátston khès nahonteweiénton tsi nahó꞉ten hiorahrátston.

¹⁴ Ók nék khók, ne tsi oiatsorènhʼen waharihwáronhke tsi nihiorahrátston, iáh kíʼ ne thènen taharihwásten, akwékon kíʼ thóh nenhkáiere tsi kíʼ nihiorahrátston ó꞉ni nahó꞉ten nahonteweiénton. Wahariwanírahte tsi nihiorahrátston né tsi iáh teharihwakwénhni ne wenhniserátekwe sahothóntene.

¹⁵ Ók tó꞉ka onakènhke thontaharíhshion ne warahrátston, ónenk kíʼ tsi enharonhiáken tsi nenhiáwenhne tsi wahorihwanóron tsi nihiorahrátston.

¹⁶ Né kí꞉ken ne kaianerénhseras nètho Roiá꞉ner thó꞉wi ne Mahís tsi nókwah ne hiorahratsʼthánion ne iáh tehioniákon ne skát꞉ke níteron ne roʼní꞉ha khès ne hioniákon.