Numbers 3 - Ohiatonhseratokénti

Ne Aaron Rahonekenhteronʼtsheraʼshónhas

¹ Né kí꞉ken ne Aaron raowátsires tánon ne Mahís ehʼshiʼkaháwi ne Roiá꞉ner wahothárase ne Mahís ne tsi ionónhte ne Sinai.

² Ne Aaron kaiéri nihonekenteronhʼtsheraiénhtahkwe: né꞉ne Nadab, ne thokʼsténhaʼkwe, né꞉ne Abihu, Eleazar, tánon ne Ithamar.

³ Né ronhwatiʼhiatarákwen tánon ronhwatiʼrihwaniráti tsi ratiʼtsihénsthatsis íken,

⁴ ók kíʼ ne Nadab tánon ne Abihu ronhwatiʼnonhwariákon nónen né hianíthate ne iáh tehiotokénti ótsire rahohénton ne Roiá꞉ner né꞉ne iahonwentsaʼthènke ne Sinai nónhwe. Iáh thènen tehotiʼwiraiénthaʼkwe, káti ne Eleazar tánon ne Ithamar né wahiatsiʼhenstónhni tsi nikaríhwes ne Aaron rónhnhekwe.

Ne Levites Né Ronhwatiʼhiatarákwen Tahonwatiʼrihwásnieʼse Ne Ratiʼtsihénsthatsis

⁵ Ne Roiá꞉ner wahawénhase ne Mahís,

⁶ “Thaʼsehiaténhaf ne rahotiʼtiókwas ne Levites tánon sèhnhan né ronhwaʼhiótens ne Aaron ratsiʼhénsthatsi.

⁷ Né enhotiʼhióten tsi niwaterihwaʼnónhtons natohsehrákon tsi nónhwe nikíteron tánon né ronhterihwaténtsiat tsi nateʼhiotonhontsóhon nahonwatiʼhiótenhse ne ratiʼtsihénsthatsis tánon ne kanakeraseraʼkwénhkon.

⁸ Né enhonʼtenhnikonhráren akwékon tsi niwatsthaʼshónhas natóhsera tánon né ronhterihwaténtsiat tsi naʼtehioʼtonhotsóhon ne roʼnátsiakes NʼIsraerʼró꞉nons.

⁹ Thotʼkhók níkon ronaterihwaiénhni ne Levites né꞉ne Aaron tánon ne sakohiohʼokónhas ahonwatiʼhiótenhse.

¹⁰ Níse ónenk tsi Aaron entshiataráko tánon ne sakohiohoʼkónhas nahotiʼhióten tsi nihonaʼterihwaiénhni ne ratiʼtsihénstatsis; nónhka nakóren ahionteʼniénten né naiéhiere ónenk kíʼ tsi enhiontaʼtenonhwariákon.”

¹¹ Né Roiá꞉ner wahawénhase ne Mahís,

^12-13 “Né Levites ónenh kíʼ Í꞉i akonhkwéta wahónton. Nó꞉nen shaʼkhenonhwariákonh ratiʼkwékon ne tahontiérenhte wahonhnákerate ne Egyptró꞉nons, wahiʼhiatatoʼkéntiste tsi shí꞉ken ní꞉ioht ne kwáh Í꞉i riʼiénha íken né thakowánen ne skawatsiʼráʼtshons enhotiʼwiraiénhtaʼne NʼIsraerʼró꞉nons kawátsires tánon nenhtewatiérenhte enhonnákerate ne katshénens. Nónhwa, khèʼkok nenhtewatiérenhte enhotiwiraiénthaʼne NʼIsraerʼró꞉nons tsi ní꞉ioht Ní꞉i riʼiénha akénhake, Levites kíʼ khehiaʼtienawáston; roʼnónha kíʼ nakonhkwetaʼshón꞉ʼas enhónton. Í꞉i ne Watiá꞉ner.”

Tsi Wahonwatiʼsenhnaʼrónhnion Ne Levites

¹⁴ Thóh ne tsi iahonwenhtsaʼthènken ne Sinai ne Roiá꞉ner wahoriʼhónten ne Mahís

¹⁵ nashaʼkosenhnarónhnion ne Levites né꞉ne tsi nihotiʼtaró꞉tens ó꞉ni tsi nihatiʼwatsiró꞉tens, shaʼkosénhnaren ne iatekakʼshá꞉thake né sewenhnítha nahontahó꞉hionke khès ne sénha ahontaʼhóʼionhke,

¹⁶ tánon ne Mahís thóh kíʼnaháiere.

^17-20 Ne Levi áhsen nihonekenteronhʼtsheraiéntakwe: né꞉ne Gershon, Kohath, tánon ne Merari, né꞉ne sakotiʼsotʼthonkonhkènʼen ne rahotiʼtáras thóh nihotiʼsenhnótenhne. Ne Gershon tèkeni tehonekenteronhtsheraʼiénthaʼkwe: né꞉ne Libni tánon ne Shimei; ne Kohath kaiéri nènhne niʼhonekenteronhtsheraʼiéntaʼkwe: né꞉ne Amram, Izhar, Hebron, tánon ne Uzziel; ók ne Merari tèkeni né tehonekenteronhtseraʼiéntaʼkwe: né꞉ne Mahli, tánon ne Mushi. Né꞉ne sakotiʼsotʼthonkonkénʼen kawatsíres né ronhwatí꞉iatskwe.

²¹ Ne rahotiʼtáras ne Gershon né iekaʼkwéktons ne rahotiʼwátsires ne Libni tánon ne Shimei.

²² Naʼkwékon tkaʼkwékton ne rotiskenhrakétes né sewenhníta khés ne sénha ahontahotíʼhionhke né ronhwatiʼsenhnarónhnion né꞉ne 7,500 niháti.

²³ Kí꞉ken ratiʼtáraien thóh ahonaʼnathaiénthake né꞉ne tsi iatewatʼséntʼthos nokwáhti né noʼnàken ne tsi watóhsehrote,

²⁴ skát꞉ke ne Eliasaph né roʼní꞉ha né꞉ne Lael né ranenhrakweʼní꞉io tsi ratiʼtáraien.

²⁵ Né ronateriʼhóntaʼkwe tsi nòkwah natóhsehra, né kanónskon tsi nahiotónhake tsi ioteró꞉ron, ó꞉ni náhtste nòkwah tsi ní꞉ioht tsi ioteró꞉ron, tsi ioharénhton ne tsi iehionthaʼwehiaʼtákwa,

²⁶ ne iohaʼrenhtónnions natenhénhrakon tsi naʼtehiokwahthaʼséhton tsi nónhwe niwatósehrote tánon ne ietsienharákwa, tánon ne ioniathaʼrénhton ne tsi ieʼionhtahwehiaʼtáhkwa naʼtenhénrakon. Ronónha ronaterihwaiénhniʼne nahonterihwatsʼtériste tsi watsʼthánions kí꞉kens.

²⁷ Ne rahotiʼtáras ne Kohath ne iekaʼkwéktons ne rahotiʼwátsires ne Amram, Izhar, Hebron, tánon ne Uzziel.

²⁸ Ne tiokwéktons ne rotiskenrakétes ne sehwenhníta nithohtíhions khès ne sénha ahonthaʼhotíhionke ne ronhwatiʼsenhnarónhnions né꞉ne 8,600 niháti.

²⁹ Kí꞉ken raʼtitáraien thóh nónhwe nahonhnátaien né꞉ne entiéne nokwáhti tsi watóhsehrote,

³⁰ skát꞉ke ne Elizaphan né roʼní꞉ha né꞉ne Uzziel ne renhtaraʼkweʼní꞉io.

³¹ Né nènhne ronaterihwaʼiénhniʼne Nahonterihwatsʼtériste Naterihwaʼseronhniátshera Onerókwah, natekwáhra, ne waʼthasehroʼharáhkwa, ne ieʼtsienharákwas, tsi nihonsthaʼsónhas ne ratiʼtsihénstaʼtsis ne tsi Iotokénti Nónhwe, tánon ne ioniatarénhton ne tsi iehionhtawehiatáhkwa ne tsi nónhwe ne Kwáh Tiotoʼkénti íken. Ronhnónha akwékon ronaterihwaiénhniʼne nahonterihwatsʼtériste tsi niwatsʼthánions kí꞉kens.

³² Ne ranenhraʼkwení꞉io ne Levites né꞉ne Eleazar né roʼní꞉ha né꞉ne Aaron né ratsihénsʼtatsi íken. Rahónha roterihónhthaʼkwe nashaʼkotenhnikónhraren tsi niháti ronateríhonte tsi nónhwe ne Iotokénti íken.

³³ Ne rahotiʼtáras ne Merari ne tkaʼkwéktons tsi ratiwaʼtsíraiens ne Mahli tánon ne Mushi.

³⁴ Ne iekaʼkwéktons ne rotiskenhrakétes né sewenhníta khès ne sénha thoʼtíhions né ronhwatiʼsenhnarónhnions né꞉ne 6,200 niháti.

³⁵ Kí꞉ken kentára né꞉ne othoʼréke nòkwahti enhonhnátaien ne tsi watóhsehrote, skát꞉ke ne Zuriel ne roʼní꞉ha né꞉ne Abihail né renhtarakweʼní꞉io.

³⁶ Né ronhwatiʼhiatharaʼkwáhton nahonterihwatsʼtériste nahoʼnikonharaʼshónhas natóhsehra, ne tewatʼrenhwákwas, kanawahʼathaʼshónhas, tsi kárate, tánon tsi niwatsʼthasónhas. Roʼnónha ronaterihwaiénhni ne tahatʼirihwásnieʼne nahonterihwatsʼtériste tsi niwatsʼthasónhas kí꞉kens.

³⁷ Roʼnónha ó꞉ni ronaterihwaiénhni tsi nòkwah nonawahʼathasónhas, tsitʼkárate, nowasʼthasónhas, tánon nasehríhies nátste natenhénrakon watsʼthákwas.

³⁸ Ne Mahís tánon ne Aaron ó꞉ni ne sakotiʼhioʼokónhas ohénton ne tsi watóhsehrote né nónhwe nenhontenáʼtaien né꞉ne tsitʼkarakwínekens nòkwahti. Né nènhne roʼnaterihwaiénhni nahonterihwatsʼtériste tsi niʼhioterihwaʼtiéren tsi nónhwe ne Iotokénhti íken né nonhkweshón꞉ʼas NÍsraerʼró꞉nonke akorihwáke. Nónhka akóren nahionʼteniénten né nahiéiere kwáh kíʼ enhionhthaʼtenonhwariákon.

³⁹ Ne tiokwékton tsi niháti ne Levites rotiskenrakéte né sewenhníta khés ne sénha thoʼtíhions nètho Mahís sakosenhnarónhnions ne sotiʼtaráʼtshons né tsi nihoʼnáhon ne Róiá꞉ner, né꞉ne 22,000 niháti.

Ne Levites Né Tonhsahonʼwatiʼnaktáhkwen Ne Thoʼnatierénhton Ronaʼnakeráton Roʼtiskenhrakéte Iakowiraʼientáhon

^40-41 Ne Roiá꞉ner wahoró꞉ri ne Mahís, “Ratiʼkwékon ne thoʼnatierénhton rotiskenrakéte rotiwiraientáhon NʼIsraerʼró꞉nons Í꞉i akonhkweʼtashón꞉ʼas íken. Káti sheʼsenhnarónhnion ratiʼkwékon ne thoʼnatierénhton roʼnanakeráton NʼIsraerʼró꞉nons, né sewenhníta khès ne sénha thoʼtí꞉ions. Ók tsi ní꞉ioht ne roʼnónha akénhake katʼróris ratiʼkwékon ne Levites tsi Í꞉i akonkwetaʼshon꞉ʼas íken! Í꞉i ne Watiá꞉ner! Tánon katró꞉ris ó꞉ni ne konhtiʼtshénens ne tionatierénhton ionanakerátons ne Levites rahotitʼtsheʼnenhókons né tonhsaʼkonhwatinakʼtáhkwen konhtiʼkwékon ne tsionatierénhton ionanakerátons ne konhtiʼtshénens.”

⁴² Ne Mahís wahaʼtewénhnarakwe, tánon washaʼkosenhnarónhnion ne thoʼnatierénhton roʼnanakerátons roʼtiskenrakéte

⁴³ ne sewenhníta khès ne sénha thoʼtíhions, ne tiokwéktons né꞉ne 22,273 nihátiʼkwe.

⁴⁴ Ne Roiá꞉ner wahoró꞉ri ne Mahís,

⁴⁵ “Ó꞉nen sehiatatérist ne Levites tsi Í꞉i akonhkwetaʼshón꞉ás í꞉ken tsi ní꞉ioht ne thoʼnatierénton ne Israerʼró꞉nons rahotiʼnekenteronhtsheraʼsónhas, tánon sehiataʼtériste ne Levites rahotiʼtshenenhókons né꞉ne tahonsahonwatiʼnakthákwen ne thoʼnatierénhton roʼnanakeráton ne Israerʼró꞉nons rahotiʼtshenenhó꞉kons.

⁴⁶ Ne thoʼnatierénhtons roʼnanakerátons ne Isaerʼró꞉nons rahotiʼnekenteronhtsheraʼsónhas tsi ronhwatiʼtiokwahkénhnion ne Levites né꞉ne 273, nikaksáthake tsi ní꞉ioht tsi ronhwatiʼtiokwahkénhnion, ónenk kíʼ tsi ensheʼsetsataninónhnion ne iehotiʼhiathakéh꞉toʼte rahotiʼnekenteronhtseraʼsónhas.

⁴⁷ Ne shatiʼhiatáʼtshons wísk-nikawístakes kawistarákens enskáriake, enhtsohianénhawe tsi nikanó꞉rons,

⁴⁸ tánon kí꞉ken owísta Aaron tánon sakohiohʼokónhas tahséhion.”

⁴⁹ Ne Mahís wahaʼtewénhnarakwe tánon iaháhawe

⁵⁰ ne 1,365 níʼ kawístakes kawistarákens

⁵¹ tánon Aaron tánon ne sakohiohʼokónhas tahshaʼkáwen.