Numbers 29 - Ohiatonhseratokénti

Né Tkaiesthánion Nosehráse Tehiontenonhweratóntha

¹ Nenhtewatenhniseratiérenhte ne tsatákhaton niwenhnítare ensehwatiataróhroʼke naisewaterénhnaien, tánon kwáh iáh othènen takahioténhʼen. Né wenhniseráte ne iehonrawátstha enhonterenhnóten.

² Né sehwaterihwaténtiat natsisewateskóntʼthase ne Roiá꞉ner, nahonséhra né rawerientiʼiostákwa: saiáta nithohiónha teró, saiáta teiotinakaronhtónʼa rátsinn, tánon tsáta niháti nénska tehonoserihiákon teiotinakarontónʼa ratítsinn owíra, ratikwékon ne kwáh iáh othènen thahotitsihiótarake.

³ Iasehwát꞉kaf né tkarihwaiéri onátsia aorihwáke né nothésehra tekaiéston ne iakeniewátha kénhie: iáʼiak nikakonhtseráke né saiáta teró, 4 nikakonhtseráke ne saiáta teiotinakaronhtónʼa rátsinn,

⁴ tánon tekakonhtseráke ne satihiatáʼtshons teiotinakaronhtónʼa owíra.

⁵ Tánon ó꞉ni saiáta kaiatákeras rátsinn iatsisewát꞉kaf né꞉ne karihwáneren aorihwáke, tánon thóh kíʼ ní꞉ioht tsi sewaterihwaténtiat norihwakáhion tsonhtonhnakanonhnitákwah nonkweshón꞉ʼa akorihwáke.

⁶ Né kíʼ iasehwát꞉kaf ne iohiowènhtek ne tiókonhte ionhteskónhtha aorihwáke nenhtewenhniseratiérenhte nenhsewenhnítarane skát꞉ke nonátsia aorihwáke tánon ne onenharatasehontserákeri aorihwáke. Kí꞉ken ká꞉khwas nahónhsera né rawerienhtiʼiostáhkwa ne Roiá꞉ner.

Ne Tkaiéstons Ne Wenhniseráte Nenhtsonhtateriwiʼiósten

⁷ Sewatiatarórok nahisewaterénhnaien noieríhaton niwenhniserakéhaton né tsatákhaton niwenhnithakéhaton; tó꞉sa othènen tesewatskáhon tó꞉sa ó꞉ni thènen sewahióten.

⁸ Tsi sewateskónhtʼthas ne Roiá꞉ner, nahón꞉sera né rawerienhtiʼióstha: saiáta nithohiónha teró, saiáta teiotinakarontónʼa rátsinn, tánon tsáta niháti nénska tehonosehrihiákon teiotinakarontónʼa ratítsinn owíra, ratikwékon ne kwáh iáh othènen tehotitsihiótare.

⁹ Iasehwát꞉kaf ne tkarihwaiéri nonátsia aorihwáke nothésera ne takaiestónhak ne iakeniewátha-kénhie: iáʼiak nikakonhtseráke né saiáta teró, 4 nikakonhtseráke ne saiáta teiotinakaronhtónʼa rátsinn,

¹⁰ tánon tekakontseráke ne satihiatáʼtshons teiotinakarontónʼa owíra.

¹¹ Tánon ó꞉ni saiáta kaiatákeras iatsisewát꞉kaf né nènhne ne karihwáneren aorihwáke, né iohiowénhtek ne kaiatákeras iesewatkáwen né norihwakahionhnéha tsonhtonnakanonhnitákwa nonhkweshón꞉ʼas akorihwáke, tánon skát꞉ke ne niatewenhniseráke ionhteskóntʼtha skát꞉ke nonátsias aorihwáke tánon ne onenharatasehontserákeri aorihwáke.

Ne Tkaiestánion Nó꞉nen Tenhiontenonhweráton Ne Tsi Waskwakarénre

¹² Sewatiatarórok naisewaterénhnaien ne wísk-khaton niwenhniserakéhaton ne tsatákhaton niwenhnitakéhaton. Sewatenikonhró꞉ri kí꞉ken kakhwáhere né nahonwakwéniensthe ne Roiá꞉ner né꞉ne tsáta nónhta nikaríhwes tánon tó꞉sa othènen sewahióten.

¹³ Nentewenhtenhniseratiérente tsi sewakhwahéras ne Roiá꞉ner, nahón꞉sera ne rawerienhtiʼiostákwa: áhsenh-iawénhre niháti teró nithotihiónha, tenihiáse teiotinakarontónʼa tenítsinn, tánon kaiéri-iawénhre niháti nènska tehonoserihiákons teiotinakarontónʼas ratítsinn, né꞉ne kwáh iáh othènen tehotiʼtsihiótares.

¹⁴ Tasewá꞉iests ne tkarihwaiéri nonátsia aorihwáke nothésehra ne tekaiestónhak ne iakenhiewátha-kénhie: iáʼiak nikakonhtseráke nothésera ne saiáta teró, 4 nikakonhtseráke ne shatihiatáʼtshons teiotinakarontónʼa ratítsinn.

¹⁵ Tánon tekakontsherakehá꞉ties ne satihiatáʼtshons teiotinakarontónʼa owíra, skát꞉ke tsi nenhwaterihwanónhton ne onenharatasehontserákeri.

¹⁶ Tánon ó꞉ni saiáta kaiatákeras né nènhne ne kariwáneren ahorihwáke. Taʼsewahiestánion kí꞉ken iehiowéntek ne niatewenhniseráke hionhteskóntʼtha skát꞉ke nonátsias aorihwáke tánon ne onenharatasehontserákeri.

¹⁷ Ne tewenhniserakéhaton tékeniʼiawénhre niháti nithoʼtihiónhas teró, tenihiáse teiotinakarontónʼa tenítsinn, tánon kaiéri-iawénre niháti nénska tehonoserihiákons teiotinakarontónʼas owíra, né꞉ne ratikwékon ne kwáh iáh othènen tehotiʼtsihiótare.

^18-19 Né skát꞉ke akwékon tsi taʼsewáiest né oiáshon tkaʼiesthánion ne tiotierénhton wenhniserátekwe.

²⁰ Nahsénhaton nenwenhniseráteke tá꞉tiest énska-iawénhre niháti teró, tánon kaiéri-iawénhre niháti nénska tehonoserihiákons teiotinakaronhtónʼa owíra, ratikwékon né꞉ne kwáh iáh othènen tehotitsihiótare.

^21-22 Né iateietʼtshí꞉iest noiáshon tisewaiesthánion tsi nihioterihwanónhton ne tiotierénhton wenhniserátekwe.

²³ Né kaieríhaton enwenhniseráteke né tasewá꞉iest oiéri niháti teró nithoʼtihiónsas, tenihiáse teiotinakaronhtónʼa tenítsinn, tánon kaiéri-iawénhre niháti nénska tehonosehrihiákon teiotinakarontónʼa owíra, né꞉ne kwáh iáh othènen tehothitsihiótare.

^24-25 Né iateietʼtshíʼiest noiáshon tisewaiéstston tsi nihioterihwanónhton ne tiotierénton wenhniserátekwe.

²⁶ Né wískʼkháton enwenhniseráteke né tasehwáiest tióton niháti teró, tenihiáse teiotinakarontónʼa tenítsinn, tánon kaiéri-iawénhre niháti nénska tehonosehrihiákons teiotinakaronhtónʼa owíra, né꞉ne ratikwékon né kwáh iáh othènen tehotitsihiótare.

^27-28 Né iateietʼtshíʼiests noiáshon tisewaiéstʼton tsi nihioterihwanónhton ne tiotierénton wenhniserátekwe.

²⁹ Né iaʼiák-kháton enwenhniseráteke né tasewáiest shatékon niháti teró nithotihiónsa, tenihiáse teiotinakaronhtónʼa tenítsinn, tánon kaiéri-iawénhre niháti nénska tehonosehrihiákons teiotinakarontónʼa owíra, né꞉ne ratikwékon né kwáh iáh othènen tehothitsihiótare.

^30-31 Né iateietʼtsíʼiest ratikwékon noiáshon tsi nithisewaiestʼtánion tsi nihioterihwanónhton ne tiotierénhton wenhniserátekwe.

³² Né tsáta-kháton enwenhniseráteke né tasewáiest ne tsáta niháti teró nithotihiónsas, tenihiáse teiotinakaronhtónʼa tenítsinn, tánon kaiérih-iawénhre niháti nénska tehonosehrihiákon teiotinakaronhtónʼa owíra, né꞉ne kwáh ratikwékon né iáh othènen tehotitsihiótare.

^33-34 Né iateietʼtsí꞉iest tsi nitisewaiestʼtánion tsi nihioterihwanónhton ne tiotierénhton wenhnisehrátekwe.

³⁵ Né shateʼkonháton enwenhnisehráteke sehwatiatarórok nahisewaterénhnaien tánon tó꞉sa othènen sewathatiótenst.

³⁶ Né tasehwáiest ne nahisehwateskónhten né ká꞉khwa aorihwáke rahohénton ne Roiá꞉ner, nahón꞉sehra ne rawerienhtiʼiostákwa: saiáta nithohiónha teró, saiáta teiotinakaronhtónʼa rátsinn, tánon tsáta niháti nénska tehonosehrihiákon teiotinakarontónʼa owíra, né꞉ne ratikwékon né kwáh iáh othènen tehotitsihiótare.

^37-38 Né iateietʼtsí꞉iest noiáshon tsi nitisewaiestʼtánion tsi nihioterihwanónhton ne tsiotsierénton wenhnisehrátekwe.

³⁹ Né kí꞉ken tsi nikaianerenhseró꞉tens tsi ní꞉ioht nahionteskónhten, nonátsias aorihwáke, nonenharatasehontserákeri aorihwáke, tánon ne skaríhwa aorihwáke íken thóh nenhsewáiere rahohénton ne Roiá꞉ner tsi nisewenhnisehraʼráhkwen tsi nisewatenikonhró꞉ris. Né kí꞉ken ne iehiowenhté꞉nions tsi entisehwá꞉iestʼte nienhsewát꞉kawe nakanánonhke tsi nisewararátston khès né kwáh ètho nisehwanikonhró꞉ten tsi tisehwaiéstʼton.

⁴⁰ Káti ne Mahís orihwakwékon kíʼ washaʼkoró꞉ri nonhkweshón꞉ʼas NÍsraerʼró꞉nonke tsi kíʼ nihoríhonhte ne Roiá꞉ner.