Numbers 27 - Ohiatonhseratokénti

Ne Rahohiataseʼtsherasónhas Ne Zelophehad

¹ Né꞉ne Mahlah, Noah, Hoglah, Milcah, tánon ne Tirzah né sakohiohokónhasʼkwe ne Zelophehad né roʼní꞉ha kenʼne ne Hepher, né roienkénʼen ne Gilead, ne roienkénʼen ne Machir, ne roienkénʼen ne Manasseh, ne roienkénʼen ne Só꞉se.

² Thóh niahónhne tánon rahohénton ne Mahís wathatítaʼne, né꞉ne Eleazar ne ratsiʼhénstatsi íken, ne sakotihenténhse, tánon ne kanakeraserakwékon ne tsi iehiontawehiatáhkwah natohsehrákon tsi nónhwe nihénteron ne Roiá꞉ner tánon wahonníron,

³ “Né sonhkwaníha karakonhkówa nónhwe narénheie né꞉ne kwáh iáh othènen tehonekenteronhtsheraiénthaʼkwe. Iáh nènhneʼe Korah tehononhterátieskwe, tsi nikáien ne rotswatheniénhni ne Roiá꞉ner; ne wakarihónhni warénheie ne tsi nihorihwáneren.

⁴ Né ken akarihónhni tsi iáh othènen tehonekenteronhtsheraiénthakwe, ónhnonhtiéren ne shaʼkwahníha rahosénhna tsi ahónton NÍsraerʼró꞉nonhke? Tástsion ne kaientátsheras thóh nahontáwe ne shakwahníha ronhtátenonhkwes.”

⁵ Né Mahís iahá꞉hawe ne ahotirihwasónhas rahohénton ne Roiá꞉ner,

⁶ tánon ne Roiá꞉ner wahawénhase,

⁷ “Tsi nahoténsons ne rahohiatasetserasónhas ne Zelophehad konhtiʼrihwanónhtons tsi tkarihwaiéri íken; thaʼshéhion ne kaientátsheras ne ronhwaníha ronhtátenonhkwes nónh nahontáwe. Ne rahoienhtatsherakénʼen ohnónha sehiohétstas.

⁸ Sheʼróri nonhkweshón꞉ʼas NÍsraerʼró꞉nonke né nó꞉nen ne rónhkwe enrénheie né iáh othènen tehonekenteronhtsheráien, né kíʼ ne rahohiatasetsherasónhas enhkonhtiʼiéna ne rahoientátsheras.

⁹ Ók tó꞉ka iáh othènen tehohiatasetsheráiens, né kíʼ ne iathatekénʼa enhaiéna ne rahoienhtátsheras.

¹⁰ Tó꞉ka iáh othènen tehotatekénsen, né kíʼ ne roʼní꞉ha iathatekénha enhaiéna ne rahoienhtátshera.

¹¹ Tó꞉ka iáh othènen tehothatekénsen khès iáh ó꞉ni tehóien ne rononhwáha, ethòne kíʼ né꞉ne kwáh ákta ronhtátenonhkwe enhatiʼiéna tánon enhontiénawasʼte tsi enhonawenhkónhweke íken. Nonhkweshón꞉ʼas NIsraerʼró꞉nonke tsi enhatikweʼniénsthake kí꞉ken tsi kaianerénhsera íken, kwáh kíʼ tsi ní꞉ioht tsi Í꞉i, ne Watiá꞉ner íken, tsi wakonhrihónten.”

Joshua Wahonwahiataráko Ne Tahonsahonakthákwen Ne Mahís

¹² Ne Roiá꞉ner wahawénhase ne Mahís, “Wáhs iasehnonhtàranh ne Abarim Ionhnontáhere tánon iaskenhénhion nonhóntsa ne tekhehiawíre Nisraerʼró꞉nons.

¹³ Né nónen ensatkátho, enshí꞉heie, tsi kiʼnihoiéren ne tsatatekénha Aaron,

¹⁴ ne aoríhwa tsi tesehnitsáron wetsatewenhnónhti nakerihwatáʼtsheras ne karakonhkówa ne Zin nónhwe. Nónen ne kanakeraserakwékon sahonkerihwakátaʼtshe ne Meribah nónhwe, iáh tesatʼthontáton nahisehnirihwanirátonke nakeshaststenseratokénti ne rahotihénton.” (Ne Meribah né꞉ne ionawerotehónhwe ne karakonhkówa ne Zin nónhwe.)

¹⁵ Ne Mahís wahaterénhnaien,

¹⁶ “Saiá꞉ner Sewenní꞉io, íse nahoshatsténsehras akwékon ne iónhnhe, tshiataráko, wakaterénhnaien, ne ronhkwékwe nahakwéni nasakohéntenhse nonhkweshón꞉ʼa

¹⁷ tánon nahakwéni nashakorihónten ne tsi waterí꞉io, né káti ne ienákere tó꞉sa thóh nahotihiátawen tsi ní꞉ioht ne teiotinakaronhtónʼa iáh tehiotí꞉ien nakonhwanatenhnikonhráren.”

¹⁸ Ne Roiá꞉ner wahawénhase ne Mahís, “Iatshiaténhaf ne Joshua né roiénha ne Nun, enhakwéni nètho rónhkwe, tánon ranontsíne tetshianisnonsáren.

¹⁹ Tsró꞉ri rahohénton ne Eleazar ne ratsihénstatsi tehá꞉tann tánon ne onhkwetaʼkwékon, tánon thóh akohénton satró꞉ri tsi rahónʼa thonsahianakthákwen.

²⁰ Thá꞉tshon osthónha ne sashatsténsera, né káti nahónton nonhkweshón꞉ʼa ahonwawénhnarakwe.

²¹ Né enhoniahesénhake ne Eleazar ne ratsihénstatsi, rahón꞉ʼa enhorihónhnien tsi niwakenikonhró꞉ten ne énratsʼte ne ionsthaʼsónhas né Urim tánon ne Thummim. Thóh kíʼ ní꞉ioht ne Eleazar tsi enhohéntenhse ne Joshua tánon nonhkwetaʼkwékon ne Israerʼronónke ne orihwakwékon ne rahotirihwasónhas.”

²² Ne Mahís thóh kíʼ nahá꞉iere tsi kíʼ nahorihónhten ne Roiá꞉ner. Thóh wathó꞉taste rahohénton ne Eleazar ne ratsihénstatsi tánon nonhkweshón꞉ʼa.

²³ Kwáh kíʼ tsi nihotenhnáhon ne Roiá꞉ner, ne Mahís ranonhtsíne ne Joshua wathanisnonhsáren tánon wahatróri tsi rahónha thonsahonatʼthákwen.