Numbers 26 - Ohiatonhseratokénti

Né Tekeníhaton Sahonwatisénhnaren

¹ Sonhtó꞉hetste tsi kannhrataríhneskwe ne Roiá꞉ner wahawénhase ne Mahís ó꞉ni ne Eleazar né roʼní꞉ha né꞉ne Aaron,

² “Sehsenhnarónhnion skawatsiráʼtshons ne kanakeraserakwékon (nihonhitiokwaróroke) ne Israerʼronónke, ratiʼkwékon ne ronhnónhkwe ne tewáhsen natehonosehrihiákons khès ne sénha thohtí꞉ions né iatekaiéri tsi nihonathakaríhte nahontsotharónhni.”

^3-4 Ne Mahís tánon ne Eleazar wahiatewénhnarakwe tánon wahonwatihiataróroʼke ne ronhnónhkwe né thóh natehonosehrihiákons. Thóh nónhwe nahonhnitiokwahróroʼke tsi kahéntaien ne Moab í꞉se nakaniataráti ne Jordan né꞉ne tehiotiniátara ne Jericho. Né kí꞉ken NʼIsraerʼró꞉nons ne Egypt nateʼthonénon:

⁵ Ne tsi ratiʼtiokwáhien ne Reuben (Reuben ne toksténhakwe ne Jacob roiénha): né tsi ratiʼtáraien ne Hanoch, Pallu,

⁶ Hezron, tánon ne Carmi.

⁷ Tsi nihonatiókwahkwe kí꞉ken kentarasónhas 43,730 nihátikwe.

⁸ Eliab nónhwe nithonatwatsiríhnons né Pallu

⁹ tánon ne rahonekenteronhtsherasónhas né꞉ne Nemuel, Dathan, tánon ne Abiram né nènhne ne ienákere ronwahiatarákwen. Wahonwatiwenhnónhti ne Mahís tánon ne Aaron tánon né iahonwanatiatárahse ne Korah rahotiókwah nó꞉nen sahonwatswaténien ne Roiá꞉ner.

¹⁰ Nonhón꞉tsa hontenonhtónko tánon iahakotiathanékwahne, tánon skát꞉ke wahonhníheie ne Korah tánon ne ronhwanonhterahtiéskwe nónenh nótsire sahakóthonte ne 250 niháti ronhnónhkwe; né wahakothokáten nonhkweshón꞉ʼas.

¹¹ Ók ne Korah rahonekenhteronhtsherasónhas iáh nènhne tehonwatinonhwariákon.)

¹² Tsi ratiʼtiókwahien ne Simeon: tsi ratitáraiens ne Nemuel, Jamin, Jachin,

¹³ Zerah, tánon ne Shaul.

¹⁴ 22,200 nihátikwe kí꞉ken tsi rahtitaraiénthakwe.

¹⁵ Ne raotiʼtiókwa ne Gad: tsi rahtiʼtáraiens ne Zephon, Haggi, Shuni,

¹⁶ Ozni, Eri,

¹⁷ Arod, tánon ne Areli.

¹⁸ Kí꞉ken kentarahsónhas 40,500 nihátikwe ne ronhnónhkwe.

^19-21 Tsi ratiʼtiókwahien ne Judah: ne rahotitáras né꞉ne Shelah, Perez, Zerah, Hezron, tánon ne Hamul. (Né tenihiáse ne Judah rahonekenteronhtsherasónhas, Er tánon ne Onan, tsi tiohóntsaien ne Canaan nónhwe nihawenhéion.)

²² Kí꞉ken kentáras 76,500 nihátikwe ronhnónhkwe.

²³ Ne raotiʼtiókwas ne Issachar: ne rahotitáras né꞉ne Tola, Puah,

²⁴ Jashub, tánon ne Shimron.

²⁵ Kí꞉ken kentáras 64,300 nihátikwe ne ronhnónhkwe.

²⁶ Tsi ratitiókwahien ne Zebulun: né rahotitáras né꞉ne Sered, Elon, tánon ne Jahleel.

²⁷ Kí꞉ken kentáras 60,500 nihátikwe ne ronhnónhkwe.

²⁸ Tsi rathitiókwahien ne Só꞉se, né kanísera kènhne ne tenihiáse rahonekenterasónhas, Manasseh tánon ne Ephraim.

²⁹ Tsi ratitiókwahien ne Manasseh. Machir né roiénha ne Manasseh né nènhne roienkénʼen ne Gilead, tánon ne kén iotsiétons kentáras né thontahioianénhawe ne shaʼkosotʼthonkonhkénʼen ne Gilead:

³⁰ tsi ratiʼtáraiens ne Iezer, Helek,

³¹ Asriel, Shechem,

³² Shemida, tánon ne Hepher

³³ Zelophehad né roʼní꞉ha né꞉ne Hepher iáh nènhne tehonekenhteronhtseraiéntakwe, nék khók ne konhtihiatáses rohiaʼtasetsheraiénthakwe; tsi nihiotisenhnoténsons né꞉ne Mahlah, Noah, Hoglah, Milcah, tánon ne Tirzah.

³⁴ Kí꞉ken kentáras 52,700 nihátikwe ne ronhnónhkwe.

³⁵ Tsi ratiʼtiókwaien ne Ephraim: ne kentáras né꞉ne Shuthelah, Becher, tánon ne Tahan.

³⁶ Ne rahotitáras ne Eran né tetsiohianénha tsi nithotwatsiríhnon ne Shuthelah.

³⁷ Kí꞉ken kentáras 32,500 nihátikwe ne ronhnónkwe. Ne kí꞉ken ne kentarasónhas tsi nitsawé꞉non ne Só꞉se.

³⁸ Tsi ratitiókwahien ne Benjamin: ne kentáras ne Bela, Ashbel, Ahiram,

³⁹ Shephupham, tánon ne Hupham.

⁴⁰ Ne rahotitáras ne Ard tánon ne Naaman ne tetsiohianénha tsi rawatsiratátie ne Bela.

⁴¹ Kí꞉ken kentáras 45,600 nihátikwe ne ronhnónhkwe.

⁴² Tsi ratitsiókwahien ne Dan: né꞉ne rahotáras ne Shuham,

⁴³ né꞉ne 64,400 niháti ronhnónhkwe.

⁴⁴ Tsi ratiʼtiókwahien ne Asher: ne rahotitáras né꞉ne Imnah, Ishvi, tánon ne Beriah.

⁴⁵ Ne raotitárasonhas ne Heber oni ne Malchiel né thontahioianénhawe tsi rawatsiratátie ne Beriah.

⁴⁶ Ne Asher rohiatasehtseraiénthakwe Serah hiontátiatskwe.

⁴⁷ Kí꞉ken kentáras 53,400 nihátikwe ne ronhnónhkwe.

⁴⁸ Tsi ratitiókwahien ne Naphtali: ne rahotitáras né꞉ne Jahzeel, Guni,

⁴⁹ Jezer, tánon ne Shillem.

⁵⁰ Kíʼken kentáras 45,400 nihátikwe ne ronhnónhkwe.

⁵¹ Ne tsiokweton tsi nihátikwe NʼIsraerʼró꞉nons ronhnónhkwe né꞉ne 601,730 nihátikwe

⁵² Ne Roiá꞉ner wahawénhase ne Mahís,

⁵³ “Tetsinárit nonhóntsas tsi natehónteres nonhkweshón꞉ʼas, né tewanónhton tsi niháti.

^54-56 Shewasthótshon tsi tetsiná꞉rit nonhóntsas, tánon kowanénhak thaséhion ne ronatiokowáhnen íken tánon kénk ní꞉wa ne kénk nihatíha íken.”

⁵⁷ Ne tsi ratiʼtiókwahien ne Levi né ratikwékon ne kentáras ne Gershon, Kohath, tánon ne Merari.

⁵⁸ Tsi nithonatwatsiríhnons thóh rathihiátare ne ronhnitaranónhne Libni, Hebron, Mahli, Mushi, tánon ne Korah. Ne Kohath né roiénha ne Amram,

⁵⁹ Né꞉ne rotiniákon ne Levi shaʼkoiénha Jochebed, né꞉ne Egypt tsakawenakeráton. Ahónha tánon ne Amram tenihiáse wahotiʼnekenhterontsheraiéntaʼne, né꞉ne Aaron tánon ne Mahís, tánon wahotiʼhiatasetsheraiénhtaʼne, né꞉ne Miriam.

⁶⁰ Ne Aaron kaiéri niháti ronekenteronhtsheraiéntaʼkwe, né꞉ne Nadab, Abihu, Eleazar, tánon ne Ithamar.

⁶¹ Ne Nadab tánon ne Abihu watníheie né nó꞉nen sahonwatáʼtse ne Roiá꞉ner nótsire ne iáh tehiotokénti í꞉ken.

⁶² Ne rotiskenrakétes ne Levites ne sewenhníta nithohtíhions khès ne sénha thohtíhions 23,000 nihátikwe. Kwáh ákte nihatisénhnarakwe tsi ní꞉ioht ne Israerʼró꞉nons, né aoríhwa tsi iáh né othènen tehonwanonhontsáwi NÍsraerʼró꞉nonhke nónhwe.

⁶³ Ratikwékon kí꞉ken kenhtáras né꞉ne Mahís tánon ne Eleazar sakotisenhnarónhnions né nónen sahonwatiʼsenhnarónhnion NʼIsraerʼró꞉nons ne tsi kahéntaien ne Moab nónhwe né tehiotiniátare ne Jordan né꞉ne Jericho nónhwe.

⁶⁴ Kwáh iáh ne saiáta tshiateshotaténronʼne tsi nikáien ne Mahís ó꞉ni ne Aaron sakotisenhnarónhnions ne Sinai Ahonwenhtsa꞉thénhke nónhwe.

⁶⁵ Ne Roiá꞉ner ráwenh tsi kwáh ratikwékon enhonhníheie ne karakonhkówa nónhwe, tánon nék khók ne Caleb ne roiénha ne Jephunneh tánon ne Joshua né꞉ne roʼní꞉ha ne Nun.