Numbers 23 - Ohiatonhseratokénti

¹ Wahawénhase ne Balak, “Tsáta níkonh ietsienharákwa kénʼen takónhnien, tánon tasehiaténhaf tsáta niháti teró tánon tsáta niháti tehotinakaronhtónha ratítsinn.”

² Ne Balak thóh kíʼ nahá꞉iere tsi nahonwaró꞉ri, tánon rahónʼa ó꞉ni ne Balaam hiahonwatihiatharónhnion ne teró ó꞉ni ne teiotinakaronhtónʼa ratítsinn ne ietsienharakwáhke.

³ Ethòne ne Balaam wahawénhase ne Balak, “Kénʼen téstann ákta ne tsi satéskonhte, tsi nikaríhwes enkatʼkenhséra tó꞉ka kén ne Roiá꞉ner tenhiatiaʼtátken khès ne iáh.” Káti rahonháhak khók iahanonhtárane,

⁴ tánon ne Rawenni꞉io wathatátken. Ne Balaam wahawénhase, “Tsáta níkon ietsienharákwah wakonhniánions tánon iekhehiatkáwen satihiatátʼtshons ne teró ó꞉ni ne teiotinakaronhtón꞉as.”

⁵ Ne Roiá꞉ner wahó꞉rori ne Balaam tsi nahó꞉ten ahénron tánon hionhsahoténiete tsítres ne Balak nahonthaháwenhne raoterihwanotátshera.

⁶ Káti thóh sàrethe tánon wahohiatatʼtsénhri ne Balak shé꞉kon thóh írate tsi nónhwe nihotéskonte skát꞉ke rónhnes ne sakotihenténhse ne Moab nónhwe.

⁷ Ne Balaam wahathárakwe kí꞉ken iekaríhwaken: “Balak ronhnonhtí꞉io íken ne Moab nónhwe thaʼtiaténha ne kénʼen Syria tsiotásawe, tsi nióre ne Ná꞉kon nòkwah ne tsi iononhtharónhnions. ‘Káts taktháras,’ wahénron. ‘Seréwat nonhkweshón꞉ʼas NÍsraerʼró꞉nonke.’

⁸ Ónh ní꞉ioht tsi akréwate tsi nahó꞉ten ne Rawenni꞉io iáh teharewáton, khès nakatátiate ne karihwaieshá꞉tshera nónen ne Roiá꞉ner iáh né tehotharákwen?

⁹ Tsi nitsiotenitsténhrate wátons nakhénen; Entkwéni nakhehiatenhnikonhráren ne tsi ionhniarónhnions nónhwe. Né nonhkweshón꞉ʼas thiʼhononhwáhak khók thíʼken tsi ní꞉ioht tsi ronhnónhnhe; Ronateriéntare tsi sènha ronhwatiʼhiatateríston tsi ní꞉ioht nakorénhsons nonhkweshón꞉ʼas.

¹⁰ Tsi nithonatwatsiríhnon NʼIsraerʼró꞉nons kwáh né꞉ne okénra í꞉ken— Sóʼtsi ronatiokowánen nahonwaná꞉sehte. Takeríhon nahontsiáke nakenhnísera tsi ní꞉ioht ne Rawenni꞉io rahonkwéta akénhake; Takeríhon kwáh skénnonk tsi akíheie tsi ní꞉ioht ne tronkwetaiéri íken.”

¹¹ Ethòne ne Balak wahawénhase ne Balaam, “Ónh niskatieráse? Kénʼen takonhiaténhawe naseréwate ne tehiakwahtátʼtshons, ók orihwakwékon thók thá꞉sehre washehiatatéristhe.”

¹² Watharihwasehráko, “Tók tentkwéni nakíron tsi nahó꞉ten ne Roiá꞉ner enhakró꞉ri nakíron.”

Ne Balaam Tekeniháton Hionsaharíhwaken

¹³ Ethòne ne Balak wahawénhase ne Balaam, “Káts ìtene nó꞉ia tsiokwénhrare né nónhwe nék khók ne Israerʼró꞉nons enshé꞉ken. Seréwat ne nónhwe nakerihwáke.”

¹⁴ Iahoiaténhawe tsi tkahénhtaien ne Zophim né nothoharáke ne tsi Ionónhte ne Pisgah. Thóh ó꞉ni nónhwe tsáta níkonh waʼronhniánion ientsienharákwah tánon iaharónhnion satihiatáʼtshons ne teró ó꞉ni ne teiotinakaronhtón꞉as.

¹⁵ Ne Balaam wahawénhase ne Balak, “Kénʼen téstann ákta tsi satéskonhte, tánon ahéren ítken thóh nónhwe natenhiatiaʼtátken ne Rawenni꞉io.”

¹⁶ Ne Roiá꞉ner wathiatátken ne Balaam, wahoró꞉ri tsi nahó꞉ten ahénron, tánon hionsahoténiete tsi ítres ne Balak nahonthaháwen kíken oríhwa.

¹⁷ Káti thóh nionhsáre tánon wahohiatatʼtsénri ne Balak shé꞉kon thóh í꞉rate ákta tsi rotéskonhte, skát꞉ke ne sakotihenténhse ne Moab nónhwe. Ne Balak waharihwanónhton tsi nahó꞉ten wahénron ne Roiá꞉ner,

¹⁸ tánon ne Balak wahatróri kí꞉ken iekarihwáken: “Káts, Balak ne roʼní꞉ha né꞉ne Zippor, Tánon sathahónsatat tsi nahó꞉ten wátienh nakíron.

¹⁹ Ne Rawenni꞉io iáh né thóh tehahiatóʼten tsi ní꞉ioht nonhkweshón꞉ʼas, tsi nihotinówenhs; Iáh né ónhkwe tèken ne tahonshaʼhoterihwaténien. Tsi nahó꞉ten nenharárasthe, ehʼnihaiérha; Enhthatáti, tánon thóh nenhiáwenhne.

²⁰ Hionkenáhon natiatatéristhe, Tánon nó꞉nen ne Rawenni꞉io enhahiatatéristhe, iáh thakʼkwéni ne tahontakákʼthate.

²¹ Tsi iekatkáthos nètho Isaraerʼró꞉nons tsi niahonenonhátie Kwáh iáh othènen tahonateraskwakʼsenhne khès ne tahonhnikonhráren. Ne Roiá꞉ner Raotiní꞉io tsi ratiʼkwékon; Rontró꞉ris tsi rahónha Sakonontí꞉io í꞉ken.

²² Rawenni꞉io tethesakohiaʼtinekénhʼen ne Egypt nónhwe; Rahónha sakoteriʼióse tsi ní꞉ioht ne karhakónha tehoná꞉kares.

²³ Iáh othènen ne iótkon akénhake, iáh thahóten tekáien natenhennaráhtshera akénhake, Né꞉ne ahónsthonke tsi ratiʼtiókwahien Isarerʼró꞉nons Nónhwa tsi nenhiaiéron nonhkweshón꞉ʼas tsi nòkwah Israerʼró꞉nons, ‘Sewatʼkátho tsi nihoiéren ne Rawenni꞉io!’

²⁴ Tsi ratiʼtiókwahien Israerʼronónke thóh ní꞉ioht tsi shí꞉ken ní꞉ioht ne roʼshatstenserowánen kénreks: Iáh thaʼhatoríhsen tsit enharatsiónhko tánon enshakowèntho, tsi nióre enhanekíra ne rahotinekwénhsa ne ronhwatinonhwariákhon.”

²⁵ Ethòne ne Balak wahawénhase ne Balaam, “Iáh tesatʼthontáton nasehrewáton nonhkweshón꞉ʼas NÍsraerʼronónhke, ók tó꞉sa kíʼ sehiatatérist!”

²⁶ Ne Balaam watharihwasehráko, “Iáh kén tekonhró꞉ri tsi ètho nènhtiere tsi kíʼ nenhakróri ne Roiá꞉ner?”

Ne Balaam Asénhaton Ionsaharíhwaken

²⁷ Ne Balak wahénron, “Káts íteʼne, tánon ó꞉ia tsiokwénhrare nónhwe nienskonhiaténhawe. Tó꞉ka nónhwa ne Rawenni꞉io enhathónthate né nónhwe naseréwathe nakerihwáke.”

²⁸ Káti iahohiaténhawe ne Balaam onontoharáke ne Peor iahonwentsaʼthènke nokwáhti niehiotieráton.

²⁹ Ne Balaam wahawénhase, “Shonniánion tsáta níkons ietsienharákwahs ne kénʼen nónhwe nakerihwáke tánon tasehiaténhaf tsáta niháti teró tánon tsáta niháti teiotinakaronhtónʼas ratítsinn.”

³⁰ Ne Balak thóh kíʼ naháiere tsi nahonwaró꞉ri, tánon iasakohiatarónhnion ne teró ó꞉ni ne teiotinakaronhtónʼa ratítsinn ne skát꞉tshons ne ietsienharakwáhke.