Numbers 19 - Ohiatonhseratokénti

Nahokénra Nonekwénhtara Niwashokóten Tsionónskwahron

¹ Ne Roiá꞉ner washakorihónten ne Mahís tánon ne Aaron

² nahontasakónon NʼIsraerʼró꞉nons ne naioriwatokénhake kaianerénseras. Tsi ítnes ne Mahís tánon ne Aaron thonwahiaténhaf nonekwénhtara niwashokóten tsionónskwahron né꞉ne kwáh iáh othènen tehiotsihiótare tánon né꞉ne iáh nonhwénhton tehiohioténhʼen,

³ tánon Eleazar thónʼhion né꞉ne ratsihénstatsi. Tánon áhtste ne tsi ronanáhtaien niekonhwahiaténhaf tánon rahohénton konhwanonhwariákon.

⁴ Ethòne ne Eleazar ostónha enhatháwa nahonekwénhsa tánon rasnonhsáke énraste tsi tehatstarokwahtánion tsáta nihiorihwáke tsi nihtsiotieráton ne tewatóhsehrote.

⁵ Kaiataʼkwékon ne katshénen, tshiewakwékon ne kané꞉honk, nowáron, nonekwénhsa, tánon nokaróhstha, thóh watsahatónhak rahohénton ne ratsihénstatsi.

⁶ Ethóne ienhá꞉hawe nonenhtakwènhte óiente, ne kahonthowánen, tánon ne onekwénhtara niwasehriʼietó꞉ten tánon otsiráke ienhó꞉ti.

⁷ Ethòne, enshanóhare ne rahotserónhnia tánon enhatatʼnekósehrawe, tánon ethòne enwáton niahonsahatáwehiate tsi nónhwe nihonanátaien; ók kíʼ kwáh tenhohiatatsionhtónhake tsi nióre ienhiókarawe.

⁸ Tsi nikáien ne rohtsaháhton ne tsionhnónskwahron ónenk nónhne tsi enshaʼnóhare ne rahotserónhnia tánon ó꞉ni enhatatnekóserawe, ók kíʼ ó꞉ni rahónha ó꞉ni iáh tahotkwenienstónhake tsi nióre ienhiókarawe.

⁹ Ethòne nónhka ne kwáh sihiorenhnáhon iakotkwéniens enhonkenraró꞉rohke ne tsionónskwahron ahokénra tánon thóh nónhwe nenhkaiéntake tsi nónhwe ne kwáh tiotkwéniens íken né náhtste tsi watenáthaien, thóh nónhwe nenhwateweienhtónhake né꞉ne Israerʼró꞉nons tsi ratinákere náhonste nahatiweienénhtane nonékanos né꞉ne èhren skahawítha ne iáh tehiotkwéniens. Kí꞉ken orihwakáhion thóh nihatiʼiéra nèhren hahonsakaháwite ne karihwáneren.

¹⁰ Tsi nikáien ne rokenraró꞉ron ónenk kíʼ tsi enshanóhare ne rahotserónhnia, ók tenhohiatátshonhke tsi nióre ienhiókarawe. Kí꞉ken kaianerénhsera tsi kwáh enhioianeréhake né꞉ne tsi nènhwe thóh nenhiotónhake, tetsarónhkwen tsi thóh nenhiotónhake né꞉ne Israerʼró꞉nons tánon ne tihononhontsátes ne skát꞉ke ratinákere.

Niahatiʼiéna Nawenhehióntha

¹¹ Tsi nihiákon nienhieiéna nawenheiónhtha kwáh tenhiakohiataʼtsionhtónhake né꞉ne tsáta nónhta nikaríhwes.

¹² Ónenk tsi enshontiatóhare onékanos énhonhste né꞉ne tionhthonhnakanonhnitákwah né asénhaton nónhta tánon ne tsatakháton nenhwenhnisehráteke, tánon kíʼ ethòne entsakotkwenienstónhake. Ók kíʼ tó꞉ka iáh tahonsahiontiató꞉hare nasenháton niwenhniserakéhaton ó꞉ni ne tsatakháton nónhta, kwáh kíʼ iáh tahonsahiakotkwenienstónhake.

¹³ Tsi nihiákon ienhiehiéna nawenheiónhtha tánon iáh tahonsahionhtiató꞉hare tenhiakohiathationhtónhake kíʼ, tsioríhwa nonékanos ne tionhthonakanonhnitákwah tsi iáh tehonwatinekósehren. Wathatíʼtsionhte ne Roiá꞉ner rahotóhsera, tánon kíʼ iáh ne tahonsahonwatinatónkwahke Rawenni꞉io rahonkwetashón꞉ʼas.

¹⁴ Tsi naiawénhne nónhkak atohsehrákon ahiaiéheie, nónhka né thóh í꞉ienskwe tsi nikaháwi wahaʼéh꞉heie khès nónhkak iahontáwehiate watiakohiatátshonhne kíʼ né꞉ne tsáta nónhta nikaríhwes.

¹⁵ Kwáh tsi niatekatshétake ó꞉ni nóntak natohserákon káien ne iáh tehiotenonhtékon né ó꞉ni watsiotshónhtane.

¹⁶ Né nónhkak iahontatiéna ne hionhthatenonhwariákon khès ne thikénhak tsi wahaʼéh꞉heie náhtste nónhwe khès ne ónhkak iahieiéna nónhkwe akóstsien khès natʼtshatónkwah, watsiakohiatátshonhne kíʼ né꞉ne tsáta nónhta nikaríhwes.

¹⁷ Nèhren ahonsakahawítonke ne iáh tehiotkwéniens, ostónha kíʼ nahokénhra ne onekwénhtara niwashokóten né tsionónskwahron ne konwatsiatatʼtsaháton néren ahonsakahawíthonke ne karihwáneren ienhkáhake kanatsákon, tánon oné꞉kase enhkanekátenhke.

¹⁸ Né tiotserénton thóh nenhiawénhne, nónkak ne kwáh iakotʼkwéniens ienhiéhawe ne kahontowánen, onékanoske ienhióhwe, tánon tehiontstaró꞉kwahte natóhsera, kwáh tsi nahó꞉ten natohsehrákon káien, tánon nonhkweshón꞉ʼa né thóh í꞉ienskwe. Ne tekeníhaton né naiáwenhne, nónhkak ne kwáh iakotʼkwéniens onékanos tenhonwanatstaró꞉kwahte nónhka iehiakoiénen nónhkwe akóstsien khès ne iakawenhéion khès natʼtsatónkwah.

¹⁹ Nasénhaton niwenhniserakéhaton tánon ne tsatákhaton nónhkwe ne kwáh sihiorihwakáhion iakotkwéniens tenhonwanastaró꞉kwahte nonékanos ne iáh tehonatkwéniens. Ne tsatákhaton niwenhniserakéhaton ensehsakonikonhrasehrónhni tsi niháti, nó꞉nen sohtinó꞉hare ne rahonatserónhnia tánon ne ronhwatinekósehren, kwáh shaʼhonatkweniénstane shiaʼkaráhkwenhne.

²⁰ Tsi niháti kwáh sahonatkweniénstane tánon iáh teshonatenikonhrasehrónhni iahatikónhtakwe kíʼ iáh teshonatkwéniens, tsioríhwa nonékanos ne tsontonhnakanonhnitákwah iáh tehonwatinekósenhren. Waʼthatítsionsthe ne Roiá꞉ner rahohtóhsehra tánon iáh shé꞉kon ne tahonsahonatenátonkwe Rawenni꞉io rahonkwéta íken.

²¹ Ensewarihwanó꞉ronhste kí꞉ken kaianerénhseras né꞉ne tsi nènhwe thóh nenhiotónhake. Nónhkwe nónhka tenhiontstaró꞉kwahte nonékanos ne tionhtonhnakanonhnitákwah ónenk tsi ensatinó꞉hare ne rahonatʼtserónhnia; ónhka ienhieiéna nonékanos ienwatkónhthakwe kíʼ tsi tenhiakohiatátsontonhake tsi nióre ienhiókarawe.

²² Kwáh tsík nahó꞉ten ne iáh tehiakotkwéniens nónhkwe ienhieiéna tsi iáh tahonsahiotkwenienstónhake, tánon ónhka nakóren ienhieiéna kwáh kíʼ iáh tahiotkwenienstónhake tsi nióre ienhiókarawe.