Numbers 16 - Ohiatonhseratokénti

Ne Tehatiʼrihwaríhtha Né꞉ne Korah, Dathan, Tánon Ne Abiram

^1-2 Ne Korah né roʼní꞉ha né꞉ne Izhar, né꞉ne tsi ratiʼtáraien ne Levite nithaʼwénon né꞉ne Kohath nónhwe, waharìhwahko tsi nòkwah ne shakohenténhse Mahís. Wahonwatiaʼtárahse ne áhsen niháti ne tsi ratiʼtiókwahien ne Reuben—né꞉ne Dathan tánon ne Abiram, né sakohiohʼokónhas ne Eliab, tánon On ne ne roiénha ne Peleth—tánon ne ó꞉ia 250 niháti ronátsiakes Israerʼró꞉nons, né kwáh íken tsi ronhwatiʼientéris ne tsi kanakeraseráien.

³ Rahotihénton ne Mahís tánon ne Aaron wahonteró꞉rohke tánon wahonwahnénhase, “Sóhtsi ahínon niahisewáhawe! Ratiʼkwékon ne ienákere ne tsi kanakerasehráien Roiá꞉ner rahonkwetashón꞉ʼas, tánon ne Roiá꞉ner tewakwékon, Nonhtiéren, káti, Mahís, tsi é꞉neken shaʼtatónhnis tsi nó꞉kwah ne Roiá꞉ner rahonkwetashón꞉ʼas?”

⁴ Nónen ne Mahís saharihwáronhke kí꞉ken, ohontsáke wahathatiatónhti tánon wahaterénhnaien.

⁵ Ethóne wahawénhase ne Korah tánon ne ronhwanonhteráties, “Ohronhkeʼnéha ne Roiá꞉ner enshonkwahnatónhase ónhka né rahónha rahonkwetashón꞉ás íken; né kíʼ ne, shakoiatarákwen íken, ákta ne ientsienharákwahke nónhwe natenhontátʼken.

^6-7 Oronhkeʼnéha níse tánon ne ieshaʼnonhteráties iasehwanatsienhásehron ne wátʼtsironhtákwa, wish niwaswénhthakes sehwátharon ne kanátsakons tá꞉non kanethanórons sehwaró꞉sehron, tánon ietsienharakwáhke niasewáhaf. Ethòne kíʼ enhionkwahtó꞉kense ónhka ne tsi nítsion ne Roiá꞉ner shakohiatarákwen. Íse ne Levites sóhtsi ahí꞉nonh niahisewáhaʼwe!”

⁸ Ne Mahís iahakónhtakwe ró꞉tharani ne Korah. “Sewatahónsatat í꞉se ne Levites!

⁹ Ne kén íhseweʼre kén niʼiorihiwáha nètho SakowenNí꞉io NʼIsraerʼró꞉nons tsi watetsisewakʼkhási ne ronátsiakes ne ratinákere, né káti nahónton rahiatákʼtha niahí꞉sewe, niahisewahióten ne Roiá꞉ner rahotoserákon, tánon taietʼtsirihwásnieʼse ne ienákere tánon naietʼtsihiótenhse?

¹⁰ Waʼtsisewaríhon níse tánon ne ronátsiakes ne Levites nahisewaiéna kí꞉ken kakwenienstátshera—tánon káti ónenh nónhwa sewaʼteniéntha nahisewaiéna tsi nihotiʼhiotenhserótens ne ratiʼtsihénstatsis!

¹¹ Né nó꞉nen entsiʼsewarihwá꞉kwaʼse ne Aaron, kwáh seh Roiá꞉ner tsi sewarihwakwénhnis nètho níse tánon ne ietsinonhterá꞉ties iáh tesewatewenhnarákwa.”

¹² Ethòne ne Mahís iashakoterihwaniénhten ne Dathan tánon ne Abiram, ók waʼníron, “Iáh tshiaʼiákene!

¹³ Iáh kén tshiatekaiéri tsi teʼteskwahiatinekénhʼen ne hiohonhtsiʼióne ne Egypt nónhwe né naskwahnonhwariákon ne karakhonkówa nónhwe? Kwáh kén ó꞉ni ioterihwíson naskwatenonhtí꞉ioste?

¹⁴ Níse kwáh orihwihiohʼónwe tsi iáh teteskwahiaténha tsi nónhwe ne ionhontsí꞉io akénhake khès nahontaskwáhwiʼke ne kahentashónhas ó꞉ni ne kanenharaientʼthósehrons nahionkwaʼwenhkhónweke, tánon ónenh nónhwa sateniéntʼtha naskwahnikonhráten. Iáh kíʼ tshiahiákwe!”

¹⁵ Ne Mahís wahotenakwenhserónhnien tánon wahawénhase ne Roiá꞉ner, “Tó꞉sa othènen tsiéna nahoténsons enthatíhawe kí꞉ken ronhnónhkwe. Iáh thaʼhóten tekhetkenhténhni; Iekaníhare iáh né saiáta tshiehihiaténha ne rahotiʼtshénen tewahóntes.”

¹⁶ Ne Mahís wahawénhase ne Korah, “Oronhkeʼnéha níse tánon ne 250 niháti iesanonhteráties ónenk tsi entísehwe rahotosehrákon ne Roiá꞉ner tsi nónhwe nihénteron; ne Aaron thóh nònh꞉ne enrésehke.

¹⁷ Tsi sewahiatáʼtshons kwáh tèsehwakwe ne tsónhtaks waʼtsironhtákwa, tánon kanetanó꞉ron thóh sewéta, tánon ethòne ietsienharákwahke iasewá꞉ren.”

¹⁸ Káti satiʼhiatáʼtshons wathónhnekwe ne rahonónhtak watʼtsironhtákwah, wísk niwaswénhtake tánon ne kanetanó꞉ron wahonnó꞉kawe, tánon tsi iehionhthawehiatákwah natohsehrákon wathatítaʼne skát꞉ke ne Mahís tánon ne Aaron.

¹⁹ Ethòne ne Korah ratiʼkwékon washaʼkohiataró꞉rohke ne ienákere, tánon tsi waʼthatítane tehonwatikánere ne Mahís tánon ne Aaron ne tsi iehiontawehiatákwah natoserákon. Thontahiawénhstsi ne tehiohaseraswátʼthe watsioswátʼthete tsi nónhwe nihénteron ne Roiá꞉ner wahakothotáshien kanenrakwékon ne ienákere,

²⁰ tánon ne Roiá꞉ner washaʼkawénhase ne Mahís tánon ne Aaron,

²¹ “Onàken ísehnet tsi rónhnes kí꞉ken onhkweshón꞉ʼas ónenk enkehiáʼtonhte.”

²² Ók kíʼ ne Mahís tánon ne Aaron wathiaʼtshàkete ohontsáke teniká꞉nere tánon waní꞉ron, “Ó Sewenní꞉io, í꞉se akwékon tsatakwení꞉io ne tsi iakónhnhe. Nó꞉nen tsaʼkwahiatáʼtshons enhiakwarihwánerake, kanakerasehrakwékon kén ensehnákwahse?”

²³ Ne Roiá꞉ner wahawénhase ne Mahís,

²⁴ “Sehró꞉ri nonhkweshón꞉ʼas èhren rónhnet tsi ronatatóhsehrote ne Korah, Dathan, tánon ne Abiram.”

²⁵ Ethòne ne Mahís, né rónhne꞉ne ne sakotiʼhenténhse NʼIsraerʼró꞉nons, tsitʼnes ne Dathan tánon ne Abiram niaháre.

²⁶ Washaʼkawénhase nonhkweshón꞉ʼas, “Ahéren ísewet ne tsi ronatatóhsehrohte kí꞉ken roʼtirihwáneren tánon tó꞉sa othènen iáh sewaiéna ne rahonáwenk akénhake. Tó꞉ka iáh, kwáh kíʼ skát꞉ke tsi ienietshiʼiaténhaʼwe ne rahotirihwaneraháktsheras.”

²⁷ Sók kíʼ èhren wahónhnete ne rahonatohsehráktha ne Korah, Dathan, tánon ne Abiram. Ne Dathan tánon ne Abiram thóh tanihiáke:ne tánon thóh íhnete tsi iehiontawehiatáhkwah ne rahonatóhsehras, skát꞉ke ne rotiniáʼkhons ó꞉ni ne sakotihioʼonkónha.

²⁸ Ne Mahís washaʼkawénhase nonhkweshón꞉ʼas, “Thóh kí꞉ken ní꞉ioht tsi ensewató꞉kenhse nètho Roiá꞉ner tsi thakateʼniéton nahontióten orihwakwékons kíʼ nahorihoténsons tánon tsi iáh í꞉i tewakatenikónhra tsi thóh nátiere.

²⁹ Ók tó꞉ka kí꞉ken ronhnónhkwe skenènstsi tsi ní꞉ioht tsi enhonhníheie né꞉ne kwáh iáh othènen Rawenni꞉io teshakorewáton, né káti tsi iáh kíʼ Roiá꞉ner tethakateniéton.

³⁰ Ók tó꞉ka ne Roiá꞉ner thènenh nahá꞉iere ne iáh ónhka tetiakorihwarónhken, tánon nonhóntsa enwatenonhtónko nahiaʼkotiatanékwahne skát꞉ke akwékon tsi nahoténson ahotiʼiéntake, ne káti ne tshiehónonhnhe thóh nienhónhne ne tsi tsiohóntsaien ne kenhéion, kwáh kíʼ ensewateriéntarane kí꞉ken ronhnónhkwe tsi wahonwakénron ne Roiá꞉ner.”

³¹ Kwáh kíʼ tsi niʼiostó꞉re wahása tsi rothárakwe, nonhóntsa ná꞉kon tsi í꞉rate ne Dathan tánon ne Abiram waʼtewatóren tsi hontenonhtónko

³² tánon iahakotiatanékwahne ó꞉ni ne rahotiwátsires, skát꞉ke ne Korah tánon ne ronhwanonhteráties ó꞉ni akwékon tsi nihotiʼientatsheráiens.

³³ Káti tshiehonónhnhe iahónsnenhte tsi tsiohóntsaien ne kenhéion, skát꞉ke ne raotiʼientátsheras. Nonhóntsa tahiakoró꞉rohke tsi shontenóton, tánon wahatihiatáton.

³⁴ Onhkwetaʼkwékon kí꞉ken NʼIsraerʼró꞉nons né thóh rónhneskwe shahontèko nó꞉nen sahonatʼthóntene tehonsénhthos. Wathotihénrete, “Sewatèko! Nonhóntsa nonhtiérenk í꞉i ó꞉ni ienhionkwahtiaʼtanékwahne!”

³⁵ Ethòne ne Roiá꞉ner ótsire tahaténiete wakatsiróten tánon wahakotiatáʼtsahate ne 250 niháti ne iehonatkáwen ne kanetanó꞉ron.

Ne Watʼtsironhtákwah Ónhtaks

³⁶ Ethòne ne Roiá꞉ner wahawénhase ne Mahís,

³⁷ “Tsró꞉ri ne Eleazar né roʼní꞉ha né Aaron né ratsihénstatsi íken né꞉ren ahonsahahá꞉wite ne teiotwístaron notsínekwar watʼtsironhtákwah ónhtaks né iatehiotaténron tsi niháti ne ronhwanatiataʼtsaháton, tánon kakʼnónhwe iatesehwaréniat noswénhthas né iwa ne watʼtsironhtákwas ne onhtákʼne, tsioríhwa ne waʼtsironhtákwas onhtáks tsi iotokénti íken.

³⁸ Thó꞉ne wahotokenhtíne né nó꞉nen shiaʼhatíren ne Roiá꞉ner rahówenk ietsienharakwáhke. Káti iasehwáhaf kí꞉kens waʼtsironhtákwas ónhtaks né꞉ne tsi nikáiens né ronhwatinonhwariakónhnion ne rahotiʼrihwaneraháktseras iorihonhníhon, kènk nikatensonhhak tsi sehwatwasónhniat, tánon ne tsiónhniat nahonterohróks꞉te ne ietsienharákwah. Né enhiakotokatenhníheke nonhkweshón꞉ʼas NÍsraerʼró꞉nonhke.”

³⁹ Káti ne Eleazar ne ratsihénstatsi íken iaháhawe ne watsironhtákwas onhtakʼsónhas tánon wahaténhnane nahontʼwasónhniate ne ahonhnónhniate ne tsienharákwah ahonteróhroksʼte.

⁴⁰ Né káti kí꞉ken nahonwanaronhkáten NʼIsraerʼró꞉nons né꞉ne tsi niháti ne iáh Aaron nónhwe thitonatwatsiríhnon ónenk tsi ientsienharákwahke ní꞉tsien nahonwatsahátaʼse ne kanetanóron ne Roiá꞉ner. Ók tó꞉ka iáh, nonhtiérenk kíʼ enhonwanátonte tsi kíʼ ní꞉ioht ne Korah tánon ne rahonkwetashón꞉ʼas. Akwékon kí꞉ken thóh naháwenhne tsi kíʼ nihoríhonhte ne Roiá꞉ner ne Eleazar rahonháke ne Mahís.

Ne Aaron Washaʼkonónsthate Nonhkweshón꞉as

⁴¹ Nóia shahiórenhne kanenhrakwékon wahonwarihwakatáʼtshe ne Mahís tánon ne Aaron tánon wahonhníron, “Óhtsiakes wasehnonhwariakhónhnion ne Roiá꞉ner rahonkweʼtashónhas.”

⁴² Né nó꞉nen kanenhrakwékon sahonteróroke wahonwarihwaiatʼse ne Mahís tánon ne Aaron, wathohtkaraténi tsi tewatóhsehrote niahontiérate tánon wahontkátho notsíkera iohrorókston tánon nètho tehiohaseraswáhthe tsi nónhwe nihénteron ne Roiá꞉ner onhthotáshion.

⁴³ Ne Mahís tánon ne Aaron thóh niaháne tánon ohénton ne tsi watóhsehrote waʼníthane,

⁴⁴ tánon ne Roiá꞉ner wahawénhase ne Mahís,

⁴⁵ “Èhren íset tsi rónhnes kí꞉ken onhkweshón꞉ʼas, tánon kwáh tsi nónhwe nihónhnete tsi enkhehiáthonʼte!” Ne tenihiáse waʼkhiatshákete ohontsáke tenikánere,

⁴⁶ tánon ne Mahís wahawénhase ne Aaron, “Iahásaf ne sónhtak waʼtsironhtákwa, wísk niwaswénhtake séhtha né꞉ne ietsienharakwáhke sráko, tánon kanetanó꞉ron sèh roséhron noswénhtas. Ethòne iatesasteríhen tsi thónʼnes nonhkweshón꞉ʼas niaháse tánon ne saterihwaténhtsiat ne orihwakahionhnéha tsionhʼthonhnakanonhnitákwah ne rahotirihwáke. Tesasteríhen! Ne Roiá꞉ner rahonakwáhtshera ónenk tsiotásawe tánon ne kannratarihnétsheras ónenk thontásawen.”

⁴⁷ Ne Aaron wahatewénhnarakwe, iahá꞉hawe ne rahóntak waʼtsirarákwa tánon hiatharáthate shaʼtekanenhríhen tsi nónhwe nihonatiataró꞉ron nonhkweshón꞉ʼas. Nónen sahatkátho ne kannratarihnétshera ónenk tsiothásawen, ne kanetanó꞉ron waharóhsehron noswenhthakéson tánon wahaterihwaténhtiaʼte norihwakahionhnéha tsionhntonhnakanonhnitákwa nonhkweshón꞉ʼas akorihwáke.

⁴⁸ Né kíʼ watʼkátatste ne kannratarihné꞉tsheras, tánon thóh í꞉rate tsi natehónteres ne ronhnónhnhe tánon ne ronenhéions.

⁴⁹ Tsi niháti ne wahonhníheie 14,700, niháti iáh tehonwanaséhton tsi niháti ronenhéion ne Korah ronenhraketskwénhne.

⁵⁰ Nónen ne kannratarihné꞉tshera watʼkátane, ne Aaron tsítres ne Mahís hionhsáre ne tsi iehiontawehiatákwah natohsehrákon.