Numbers 11 - Ohiatonhseratokénti

Ne Waʼtenátaien Taberah Iotékha Konwáiats

¹ Nonhkweshón꞉ʼas tahontáshawen wahonwatrihwakatatʼtse ne Roiá꞉ner tsi niwenhtorá:tsie. Nó꞉nen ne Roiá꞉ner shaʼsakotʼthónteʼne, wahotenakwaserónhnien tánon ótsire thaʼsakoteniéten nonhkweshón꞉ʼa. Wahakotiatáʼtsahahte tsi ratinákere tánon wakarihwá꞉tonte tsi iehiótʼte ne tsi roʼnahnátaien.

² Nonhkweshón꞉ʼa iathotihénreʼte ne Mahís nashaʼkosniénon; rahonháke ne Roiá꞉ner iahaterénhnaien, tánon nótsire sónsʼwa.

³ Káti ne watenáthaien Taberah wakonhwanáthonkwe, tsioríhwa thóh-nónhwe ne Roiá꞉ner raótsire ne wahakotiatatʼtsaháhte tsi nónhwe nihónhnes.

Ne Mahís Tsáta Nihatiʼhiatáhsen Washaʼkohiatarakwenháton Nashaʼkotihéntenhse

⁴ Né nónhwe né thihononhontsátes skát꞉ke tehonatsʼtikafʼfenháties ne Israerʼró꞉nons. Kwáh íken tsi ratiwaʼranónhwakskwe, tánon káti ó꞉ni NʼIsraerʼró꞉nons roʼnónha ó꞉ni tahontásawen nahatirihwaʼkáthaʼte: “Tó꞉ka nek khók nahón꞉ton nahionhkwahwaʼraiéntaʼne!

⁵ Né Egypt kwáh sesnènhne tsi níkon tehionhkwaʼtonhontsóhnine ne kèntsionk tsi í꞉tewatsʼkwe, tánon iáh othènen tethewakáriaksʼkwe. Sewehiáre kèn nènhne nononʼónseras, ne waʼhiáris, ne kahrhakón꞉ha oʼnónkseri, ne oʼnónkseris, tánon ne iononkseráte ionkwahiéntaʼkwe?

⁶ Ók kíʼ nónhwa iáh othènen tetsionhkwaʼshatstensheráien. Kwáh iáh othènen tetsionhkwáien ne thènen ahítewake—iáh othènen nek khók kí꞉ken oraʼwísta ne niaʼtewenhniseráke!” (

⁷ Norawístha thóh ní꞉ioht tsi shí꞉ken ní꞉ioht ne ká꞉nen, tehioterakénseronhte notsínekwar niwashokóten.

^8-9 Tsi ionhkwahtenátaien enkakeronhtháseron nokarasnéha nikaháwi ó꞉ni enhioáhweiasthe. Tsi enhió꞉renhne nonhkweshón꞉ʼas ienhiehiákenhne nahiakorónhko, enhiétʼthete khès enhienekónhreke tsi enhiontetʼthesherónhni, tánon ethòne tehienekónhtiete tánon kènk nikátens tsi enhiontkaretsherónhni. Thóh nihiawekonhonhtseró꞉ten tsi ní꞉ioht ne iakenhiewátha kènhie tekaiéston tsi kanatarónhni.)

¹⁰ Ne Mahís akwékon wahothónhtene nonhkweshón꞉ás tsi nihiakorihwakatènhen tsi ní꞉ioht tsi ronhʼnéton ne tsi iehonthawehiatáhkwah ne rahonatohsehrákons. Thóh nikonhrénhen tsioríhwa ne Roiá꞉ner tsi washakonákwahse,

¹¹ tánon wahawénhase ne Roiá꞉ner, “Nonhtiéren tsi thóh nióre tsi waskaʼteweienhnakʼsháten? Nonhtiéren tsi thóh nióre tsi iáh tesheʼrientí꞉ios tsi nó꞉kwah nʼí꞉i? Nonhtiéren tsi í꞉i wastiataráko akhehiaterihwaʼkéhtaʼtshe kíʼ onhkweshón꞉ʼas?

¹² Iáh í꞉i tekhehiatíson iáh ó꞉ni í꞉i tekhenakerátston! Onhnonhtiéren tsi askherihwanónhtonhse thóh naʼtiéren tsi shí꞉ken ní꞉ioht ne tewátsnie tsi akhehiaʼkhitàhroke tsi ní꞉ioht nowirá꞉a kwáh tsi nióre ne tsiohontsáien né sehiararatsʼténhni ne shaʼkotisotʼthonkonhkénʼen?

¹³ Kaʼnahonthakhewarénhawe niaʼtakaiérihke natʼkhénonhte kíʼ onhkweshón꞉ʼa? Iehotikonhtáhkwen ronatʼtsharokwáhton tánon owáron ratirihwanóntha.

¹⁴ Iáh thaʼhónton ne ratikwékon hiathahontsiátiste nakhehiaʼterihwasonhtérase, sóh꞉tsi iawetowánen nakerihwáke!

¹⁵ Tó꞉ka thóh kíʼ nenstiérase, thaʼkítenr tánon takenonhwariákon, ne káti ne tó꞉sa ské꞉kon ahonsakatakáts꞉taʼte tsi nisehniakáts꞉te.”

¹⁶ Ne Roiá꞉ner wahawénhase ne Mahís, “Sehiataróhrok tsáta niwáhsenh niháti né ronathonkweʼtatkwéniens né꞉ne ronhwatiʼientérih tsi shaʼkotihenténhse nonhkweshón꞉ʼas, thaʼsehiaténhaf tsi watóhsehrote tsi nónhwe nikíteron tánon sehró꞉ri thóh nónhwe tsatákʼta tehatítann.

¹⁷ Kwáh entʼkátsnenhte tánon thóh nónhwe natenʼtenithá꞉ren, tánon ostónha enskónhkwah nonikonhratokénti ne tkonhiáwi tánon roʼnónha thetekhéhion. Ethòne kíʼ enhathikwéni nahiesaiénawase nashaʼterihwakéthaʼte kí꞉ken onhkweshón꞉ʼa akorihwáke, tánon iáh sonhá꞉aʼkhók thasatkéthate.

¹⁸ Ónenh kíʼ sehró꞉ri nonhkweshón꞉ʼas, ‘Sonhtenikonhrasehrónhni ne niaʼtehatihiátis nenhiórenhne; enshaʼwarhaiénhtake ná꞉sehke. Ne Roiá꞉ner wahiatʼthóntene tsi nisatʼtsarokwáhton tánon shaʼtónhnions tsi nisaskáneks nahisawaraiénhtake tánon tsi sènha shaʼtáhskatsʼkwe ne Egypt shitèseweskwe. Ónenh kíʼ ne Roiá꞉ner éntʼhion nowáh꞉ronh, tánon ónenk tsi énsehke.

¹⁹ Ónenk tsi énsehke tánon iáh khók tó꞉ka kèn sewenhnísera khès ne tewenhniseráke, khès ne wísk nónhta, khès noiéri, khès ne tewá꞉senh niwenhniseráke,

²⁰ ók kíʼ sewenhníta nikaríhwes, tsi nióre ne tsi teshaʼhonthakáronhte tentkahiákenhne, tsi nióre ne kwáh ensonhnákʼshaʼte. Thóh kíʼ nenhiáwenhne tsioríhwa tsi watsʼkénron ne Roiá꞉ner né tsi rahónha kèn í꞉res tsi nónhwe nísehwes tánon rahónha waʼtserihwakátatʼtse né tsi tó꞉sa nonhwènhton tahontesehwaténhtionke ne Egypt.’”

²¹ Ne Mahís wahawénhase ne Roiá꞉ner, “Kénʼen í꞉kes kheʼhentenhsehátie ne 600,000 nihionkwétake, tánon shá꞉ton tsi kwáh ensehwaránonhte niaʼtakaiérihke né sewenhnítha nikaríhwes?

²² Iathakaiérihke kèn tsi nakonhtíhaʼke ne tionónskwahron tánon ne teiotinakaronhtón꞉ʼa akonhwanawèntʼtho niatahotiʼiérihse? Tsi níkonh kónhnes ne kèntsionk ne kaniatarakhekówa niatahotiʼiérihse?”

²³ “Iehiotók꞉the kèn nakeshatsténshera?” ne Roiá꞉ner watharihwasehráko. “Kwáh iosthó꞉re ensatʼkátho tó꞉ka kèn tsi nahó꞉ten wáken thóh nenhiáwenhne khès ne iáh!”

²⁴ Káti ne Mahís thóh niahá꞉re tánon washaʼkoróri nonhkweshón꞉ʼas tsi nahó꞉ten ne Roiá꞉ner wahénron. Waʼshakohiataróhroʼke ne tsáta nihatiʼhiatásen ne sakotihenténhse tánon thóh waʼshakóteron aktóntie tsi watóhsehrote.

²⁵ Ethòne ne Roiá꞉ner thaʼhásnenhte notsikeráke tánon watʼnhitháren. Ostónha ne Rawenni꞉io raonikónra ne thó꞉wi ne Mahís oni né꞉ne tsáta nihatiʼhiathásen ne sakotiʼhenténhse tahonwénhnon. Nó꞉nen nonikónhra wahonatsiénhase, thaʼhontáshaʼwenh wathotihénrete tsi ní꞉ioht ne rotitókenhse, ók iáh kíʼ tekaríhwes.

²⁶ Tenihiáse ne tsáta nihatihiatáhsen ne sakotihenténhse, né꞉ne Eldad tánon ne Medad, tót꞉khók ienhíteron tsi nónhwe nihonanahthaiéntakwe tánon iáh tshiehotihiakènʼen ne tsi tewatóhsehrote niahoné꞉nonhke. Thohnónhwe tsi nónhwe nihonanáhtaien Rawenni꞉io raonikónra wahonatsiénhase, tánon tahiatásawenh wathoʼtihénrete tsi ní꞉ioht ne rotitókenhse.

²⁷ Kén nithoʼiónha iatharátate nahoróri ne Mahís tsi nihiatiéra ne Eldad tánon ne Medad.

²⁸ Ethòne ne Joshua ne roʼní꞉ha né꞉ne Nun, né꞉ne Mahís shiʼhosniénonskwe né kwáh kén shiʼthohiónha kènhne, tahaʼtáti tánon wahawénhase ne Mahís, “Teshé꞉tast, sénhshion!”

²⁹ Ne Mahís waʼtharihwasehráko, “Teshaʼthatenikónhrahre kén nakerihwasónhas? Kaská꞉neks nètho Roiá꞉ner ahontasakáwenh ratiʼkwékon nonhkweshón꞉ʼas ne rahonikónhra tánon ratiʼkwékon thóh ní꞉ioht tsi tahotihénrethe tsi ní꞉ioht ne rotitokénhse!”

³⁰ Ethòne ne Mahís tánon ne tsáta nihatiʼhiatásen ne sakotiʼhéntenhse NÍsraerʼró꞉nonke tsi thóh nanáhthaien hionhsahónhne

Ne Roiá꞉ner Ohkwesenhtarìwase Iashaʼkoténieʼte

³¹ Thontaiawénhstsi ne Roiá꞉ner iahaʼtewerániete né tahiakohiaténhawe ne ohkwesenhtarìwase ne kaniatarakhekówane, áhsen niwasí꞉take nióre èhneken nonhontsáke nihatítie. Waʼthatiterónhtane tsi nónhwe niʼwatenáthaien tánon akwékon wathatiwánaʼke né꞉ne tshiaʼtehiotkarókʼtha tsi nióre ne kwáh tsikʼnonhwéson nokwáhti iahiontkátho.

³² Káti konhtatiekówa né wenhniserátekwe, asonhtakwékon, tánon konhtatiekówa nó꞉ia sahiórenhne, nonhkweshón꞉ʼa ne wahotihióten waʼsakotiʼienenháton nokwesentarì꞉waʼse; iáh ónhka ne tsi niháti ne ká꞉ron ne wísk-niwáhsen nikawinotseráke waʼshakotiʼiéna. Waʼthonkwatásehte ne tsi ronanáhtaien ohontsáke waʼshakotihiatakéron nahonstáʼthate.

³³ Tsikʼshé꞉kon wéso rotiwáraien nahónhneke, ne Roiá꞉ner wateshaʼkoteriatíkon nonhkweshón꞉ʼas tánon ne warónhniate nahotinráhtarihnhe.

³⁴ Né thóh nónhwe niwatenátaien né konwáiats ne Kibroth Hattaavah (né kéntons “Ionstatonkwanónwaks”), tsioríwa tsi thóh nónhwe nisakotiʼhiatáten nonhkweshón꞉ʼas ne iewaranónhʼwakskwe.

³⁵ Thóh nónh꞉we thontahonténhti nonhkweshón꞉ʼas tánon Hazeroth niahónhne, thóh nónh꞉we ionsahontenátaien.