Numbers 1 - Ohiatonhseratokénti

Ne Thontiérenhte Wahonwatisénhnaren NIsraerʼró꞉nons

¹ Ne tiotenhniseraʼtsherénhton ne tekeníhaton wenhnítare né tekeníhaton ioseráte nó꞉nen nonhkweshón꞉ʼas NIsraerʼronónke èhren shonhsahónnete ne Egypt, ne Roiá꞉ner wahothárase ne Mahís thóh rahothohserákon tsi nónhwe nihenténhron ne Roiá꞉ner né꞉ne iahonwentsaʼthènke ne Sinai nónhwe. Wahénron,

² “Í꞉se tánon ne Aaron ietsisenhnarónhnion nonhkweshón꞉ʼas NIsraerʼronónke né꞉ne tsi nihotiʼtaróhtens tánon tsi nihathiʼwatsiʼróhtens. Ietsisenhnarónhnion ratikwékon ne ronhnónhkwes

³ né꞉ne tewáhsen natehonosehriʼiákons tó꞉ka ó꞉ni ne sénha thoʼtíh꞉ions né nahónton nahonkʼtsiotharónhni.

⁴ Tsisehwarihwanónhtons saiáta ne renhtaraʼkweʼní꞉io ne skentharáhʼtshons naietʼtshiʼsniénon.”

^5-16 Né kí꞉ken ne ronhnónhkwe, shaʼkotihéntense ne roʼnónha rahothiʼtiókwahkons, né꞉ne roʼnónha ronhwatiʼhiatarákwen né tsi kanakeraseráien nahotihióten kí꞉ken kahioténhsehra: Ne Raotitsiokwahs Ne shaʼkotihéntense Reuben Elizur ne roʼiénha né꞉ne Shedeur Simeon Shelumiel né roʼiénha né꞉ne Zurishaddai Judah Nahshon né roʼiénha né꞉ne Amminadab Issachar Nethanel ne roʼiénha né꞉ne Zuar Zebulun Eliab né roʼiénha né꞉ne Helon Ephraim Elishama né roʼiénha né꞉ne Ammihud Manasseh Gamaliel né roʼiénha né꞉ne Pedahzur Benjamin Abidan né roʼiénha né꞉ne Gideoni Dan Ahiezer ne roʼiénha né꞉ne Ammishaddai Asher Pagiel ne roʼiénha né꞉ne Ochran Gad Eliasaph ne roʼiénha né꞉ne Deuel Naphtali Ahira ne roʼiénha né꞉ne Enan

Ne Raotitsiokwahs Ne shaʼkotihéntense

¹⁷ Tsi enhonsniénon kí꞉ken tékeniʼiawénhre niháti ronhnónhkwe ne Mahís tánon ne Aaron

¹⁸ kanakeraserakwékon washaʼkotihiataróhroke né꞉ne tioʼtenhniseratierénhton ne tekeníhaton wenhnítare tánon washaʼkotisenhnarónhnion onhkwetakwékon né꞉ne tsi nihothiʼtarótens tánon tsi nihatiwatsiró꞉tens. Tsi nihothisenhnótensons rathikwékon ne ronhnónhkwe né꞉ne tewásenh natehonosehrihiákons tánon ne ronathawenhráton wahonwathisénhnaren tánon wahonwanásehte,

¹⁹ kwáh kíʼ tsi nihotenhnáhon ne Roiá꞉ner. Thóh nónhwe né꞉ne iahonwenhtsaʼthènke ne Sinai, ne Mahís washaʼkosenhnarónhnion nonhkweshón꞉ʼas.

^20-46 Ne ronhnónhkwe né tewásenh naʼtehonosehrihiákons tánon ne ronatawenhraton tsi nikáien nahónton nahontsoʼtharónhni wahonwatiʼsenhnaʼrónhnion né tsi nihotisenhnótens tahioianénhawe tsi nihothitarótens ó꞉ni tsi nihatiwatsiró꞉tens, né tahontiérenhte tsi rathiʼtáraien ne Reuben, né꞉ne Jacob kwáh tokʼsténha roiénha. Ne tsokwéktons tsi nihotiʼtiókwahkes ken kahiatónhnion: Ne Raotitsióhkwas Tsi nihotiʼtsiókwah Reuben 46,500 Simeon 59,300 Gad 45,650 Judah 74,600 Issachar 54,400 Zebulun 57,400 Ephraim 40,500 Manasseh 32,200 Benjamin 35,400 Dan 62,700 Asher 41,500 Naphtali 53,400 Tsiokwékton: 603,550

Ne Raotitsióhkwas Tsi nihotiʼtsiókwah

⁴⁷ Ne Levites iáh nènhne tehonwatiʼsénhnare skát꞉ke ne thihotiʼtiókwahtes,

⁴⁸ tsioríhwa ne Roiá꞉ner rohró꞉ri ne Mahís,

⁴⁹ “Nónen ensehsenhnarónhnion ne ronhnónhkwes nahónton ahonktsotarónhni, tó꞉sa kíʼ nènhne sehiátaren ne Levites kentiókwa.

⁵⁰ Khéʼkenk, ne Levites né sehrihónten nahonterihwatsʼtériste Natóhsehra tsi nónhwe niʼkíteron tánon akwékon tsi niwatsʼtasónhas. Ronhnónha enhatíhawe tánon tsi niwatsʼtasónhas, thóh enhotiʼhióten, tánon thóh aktóntie enhontená꞉taien.

⁵¹ Né nónen tenhtsiʼsewanáʼthakwe, ne Levites ronhnónha enshonʼtohsheraʼríhsi tánon enshonʼtohsehró꞉ten ne á꞉se tsi nónhwe ientsiʼtewaʼtenátaien. Nónkha akó꞉ren nákta nahontáhien tsi waʼtohsehróte kwáh kíʼ enhionthaʼtenonhwariákon.

⁵² Né꞉ne roʼnátsiakes NʼIsraerʼró꞉nons enshontohsehrakétsko, skenhtiokwá꞉tshon tsi skenhtiokwáʼtshon, saiáta ne rónhkwe skát꞉ke ne rahotiókwa tánon né rahónha rahoniaʼtará꞉ʼa.

⁵³ Ók kíʼ ne Levites thóh ákta tsi watóhsehrote enhontenátaien ne naʼhontenhʼnikonhráren, né káti ne tóhsa ónhka ákta nahontháien tánon ahierihónhni nakenakwáhtshera ahotí꞉iente ne tsi ratiʼnakerasehráien ne Israerʼró꞉nons.”

⁵⁴ Káti nonhkweʼshón꞉ʼas NIsraerʼronónke orihwakwékon thóh nahatí꞉iere tsi kíʼ nihoríhonte ne Roiá꞉ner ne Mahís.