Nehemiah 9 - Ohiatonhseratokénti

Nonkwehó꞉kons Wahatiriwaní꞉rate ne Raotiriwanerahatʼthseras

¹ Tánon ne tewáhsen kaié꞉ri siwenhniserá꞉te ne tsi niwenhnitá꞉rakwe, nahonkweʼtashón꞉as Nisrael wahontiaʼtaró꞉roke skátne tsi wahonhnenhtónhtsete tánon kaiá꞉re wahontserón꞉niate tánon ratinontsí꞉ne wahonthatenkenrá꞉ro.

² Eʼthò꞉ne tsi nithonatwatsirí꞉non ne Israerʼró꞉nons washakonatsiathontákwahse ne thiononhontsá꞉tes, tánon wathatí꞉nahne wahatirihwaní꞉rate ne raotirihwaneraháktsheras tánon ne raotirihwaneraháktsheras ne sakotinihó꞉kons.

³ Tánon thóh wathatí꞉nahne tsi nón꞉we nihonhné꞉te tánon wahatiwenhnanhó꞉ten ne kaiatonhserakweʼnón꞉ni ne raoianerénhsera ne Roiá꞉ner raotiʼNí꞉io né꞉ne áhsen nakawistáheke nikaríhweskwe ne thóh wenhniserá꞉tekwe, tánon nó꞉ia áhsen nonsakawistáheke ne thóh wenhniserá꞉tekwe ne wahatirihwaní꞉rate tsi rotiriwanéren tánon wahonwahshén꞉naien ne Roiá꞉ner raotiʼNí꞉io.

⁴ Eʼthò꞉ne ne Levites, Jeshua tánon ne Bani, Kadmiel, Shebaniah, Bunni, Sherebiah, Bani, Chenani, wahthatí꞉nahne thóh tsi ierahthenstháhkwa tánon iathonsénhto rotiwénhte rahonhà꞉ke ne Roiá꞉ner raotiʼNí꞉io.

⁵ Tánon ne Levites, Jeshua tánon Kadmiel, Bani, Hashabneiah, Sherebiah, Hodiah, Shebaniah, Pethahiah, wahonhní꞉ron, “Teshewátat tánon tsisewahiathatérist ne Roiá꞉ner SewaʼNí꞉io né꞉ne tsi nénhwe tánon tsi nénhwe enkenhá꞉ke! Tánon Kaiathateristón꞉hak ne ionerakwát sasenhna nene ahiót꞉tsenhnakarathatonke nene akwé꞉kon kaiathaterihtsheras tánon tahiontenón꞉weraton.”

Naterénhnaient ne Kariwaniratʼtshera

⁶ “Shonwahaʼkhók, oh Saiá꞉ner, shonhní꞉son ne tsi karonhiá꞉tes, né꞉ne tsi karonhiá꞉tes ne tsi karonhiá꞉tes ne kontikwé꞉kon ratikwé꞉kon ne ratironhiakeró꞉nons; ne tsi ionhontsá꞉tes tánon tsi nahoʼténhsons né꞉tho í꞉wah; ne kaniatarakeʼkó꞉wa tánon tsi nahoʼténhshons neh thóh nón꞉we nikónhnes. Kontikwé꞉kon í꞉se teshehiá꞉wi natónhnhets tánon ne ratironhiakeró꞉nons ne karonhiá꞉ke ieshashén꞉naiens.

⁷ Í꞉se ne Saiá꞉ner Ní꞉io í꞉ken í꞉se tsiatahrákwen ne Abram tánon tsehiá꞉ron ne tsi ronathonhontsiá꞉ien ne Ur thóh nón꞉we ne Chaldearó꞉nons nihatinákere tánon ne wahtsénhnon Abraham.

⁸ Tánon wasetsénri ne rawé꞉ri ne sahénton tánon ní꞉se skátne wetsateriwasherón꞉ni nahontashátʼkawe ne rahononhóntsa ne Canaanró꞉nons, ne Hitró꞉nons, ne Amorʼró꞉nons, ne Perizró꞉nons, ne Jebusró꞉nons, tánon ne Girgashró꞉nons, thóh tsi wahawatsirathátie; tánon ní꞉se washerihwaié꞉rite ne sawenhnaó꞉kons asè꞉ken ní꞉se saiá꞉nere.

⁹ “Ní꞉se sátkaton ne raotironhiakénhseras ne Egypt nón꞉we ne iakinihokonhkén꞉ens tánon sathontéhon tsi natehonahséntʼto ákta ne Red Sea.

¹⁰ Tánon ní꞉se thisatkáwenhs tsi nisehnéstons tánon ne iorihwanerakwahténions tsiatkontáhon ne Pharaoh tánon sehiatkontáhon ratikwé꞉kon ne raonhatsherashón꞉as tánon seiatkontáhon ratikwé꞉kon nonkwehó꞉kons ne rahonhontsà꞉ke, tiorì꞉wa ní꞉se saterienʼtá꞉rakwe né꞉tho tsi nahatí꞉iere kanaieshé꞉ra wahakhokʼkónhten. Káti ní꞉se ne wahshón꞉niate ne sashén꞉na né꞉tho akatáhke ne kén꞉en wenhniserá꞉te.

¹¹ Tánon ní꞉se wateshekhási ne kaniatarakeʼkó꞉wa ne raotihén꞉ton tánon thóh wahontó꞉hetste ashén꞉non ne kaniatarakeʼkó꞉wa thóh niahón꞉ne ne tsi iahontsiaténhake, tánon ní꞉se wathesenióthako ne ronwathisehréhne thóh niahón꞉ne tsi iotasátahre ne ionó꞉tes kwáh né꞉ne onenhiaʼshón꞉as iewátions ne ionekaʼshátstes.

¹² Tánon ní꞉se wasehiasá꞉rihne ne washátste ne tsi nihiotsikeró꞉te ne tsi niwenhní꞉seres, tánon noʼkarasnéha ne tsi nihiotsiró꞉tons nó꞉tsires noʼkarasné꞉ha, tsi wateseswathéten tsi nihiohahó꞉ten ahonthahí꞉tha.

¹³ Tánon ní꞉se thóh wateshatasénhte tsi Ionónte ne Sinai ne nasehthá꞉rase tsi nonhtáwe Karonhiá꞉ke. Ní꞉se tashé꞉ion ne karihwakwahrihshióntshera ne kariwenhtáhtsheras, ó꞉ni kaianerénhseras ne tokenskehón꞉we, kaianerenhserí꞉ios tánon natsiawenhráhseras.

¹⁴ Tánon ní꞉se wahshenésten ne senhniseratokentí꞉tshera tánon tashé꞉ion natsawenhrá꞉tseras, naterihwasehronhniá꞉tsheras tánon ne kaianerénhseras tsi nitsawè꞉non ne sanhá꞉tshera Mahís.

¹⁵ Tánon ní꞉se washé꞉nataranonte aseʼken rontón꞉karhiakskwe tánon tasnekinekénhkwe nostenhráke ne raotirihwà꞉ke asè꞉ken rotiniatatʼténskwe. Tánon ní꞉se washeién꞉hase thóh niehónhne tánon rontsenáwast ne ohón꞉tsa né꞉tho sarihwaní꞉raton nenhshé꞉ion.

¹⁶ “Ók neh ronón꞉ha tánon neh iakhinihó꞉kons tsi nahatí꞉iere wahonthatónhnine tánon rotinontsistaní꞉rons tánon iáh tehonatahonsatháton ne sharihwataʼtsheras.

¹⁷ Iáh tehonathontháton nahonthahonsáthate, khéhs nahonehiá꞉rakes ne iorihwanerakwahténions tsi nahoʼténhsons tsi nisehiatié꞉rahse ne ronónha; ók wahontenontsistahní꞉rate tánon iathotirihwaién꞉tahse thóh niahonsahón꞉ne ratináskwa ahonsahónton thóh tsi ronatenontistahní꞉raton; ók í꞉se ne Ní꞉io ne sheseʼnikonrénhse, thisarihwaié꞉ri tánon sanitenhrátskon tánon iáh tesenhakwástore tánon titkáhere kanoronhkwátshera; tánon ní꞉se iáh teseiatewenhtétha.

¹⁸ Iekaní꞉hare nó꞉nen enhontsatonhniserón꞉ni ne tionhnónskwaron owí꞉ra ne raotirihwá꞉ke, tánon wahonhní꞉ron, ‘Ne kí꞉ken ne sah Ní꞉io í꞉ken, ne raónha tetʼiahiaténha tsi tiohontsá꞉ien ne Egypt’ tánon ne wesahió꞉ten ne kowá꞉nen asehrihwaié꞉sate.

¹⁹ Ók shé꞉kon kíʼ, thóh tsi nihiawetowá꞉nen ne sanitenhrátshera, ní꞉se iáh tesheiatewenhtéton thóh tsi iahonwenhtsathénhake. Ne iotsikeró꞉te iáh kíʼtehiakotsiatontakwén꞉ni ne tsi niwenhní꞉seres, ne nahiakohenténhse tsi niahonenonhátie. Iáh ó꞉ni ne iotsiró꞉te ne tsi niwashón꞉tes ne tahiakoswathè꞉ten ne tsi iohá꞉te tsi nón꞉we ahó꞉wenk niahón꞉ne.

²⁰ Ní꞉se tashé꞉ion ne sanikonrí꞉iosera ne nashehiónhnien aotinikonraién꞉tahne tánon ní꞉se iáh thitishón꞉ne ne karonhiakhé꞉ka kákhwa ne tsi ratishakáronte, tánon washenekanónte ne tsi nihotiniataʼténskwe.

²¹ Kaié꞉ri-niwáhsen nihioserá꞉ke nikarí꞉weskwe ní꞉se tashehiatʼká꞉wen tsi natehonatonhontsó꞉nis thóh iahonwenhtsaténhake, káti kwáh iáh othé꞉non tethonatoʼtahní꞉kwe. Ne rahonaʼtsherónhnia iáh nonhwénton tehiokahiónhon, tánon iáh tehonarashí꞉to.

²² Tánon ní꞉se thashé꞉ion ne kanakeráhseras tánon nonkweshón꞉as, tánon thóh wateshehiaré꞉niate kwáh tsi niió꞉re ne tehiotenontahwenhétkons. Tánon wahontié꞉nawatste tsi iohontsá꞉iens ne Sihon tánon ne rahóntsas ne ronhnontí꞉io thóh nón꞉we Heshbon tánon ne tsi ionhontsá꞉ien ne Og, né꞉ne ronhnontí꞉io ne Bashan.

²³ Ne washehionhniá꞉te ne raotinekenteronhtsherashón꞉as Toh nahonatiókwasʼke tsi iotsistohkwarónhnions ne tsi karonhiá꞉te, tánon ní꞉se thóh niashehiaténhawe tsi tiohontsá꞉ien tsi niká꞉ien ne sheró꞉ri ne shakotinihó꞉kons tehiotonhontsó꞉hon thóh niahón꞉ne tánon ronhtié꞉nawast né꞉tho.

²⁴ Tánon ne sakotiioʼokón꞉ʼas thóh niahón꞉ne tánon wahontié꞉nawatste nohón꞉tsa tánon washakotishatstenhserákwa né꞉tho nón꞉we niienákere tsi ionhontsá꞉ien, né꞉ne Canaanró꞉nons, thóh raotihén꞉ton ne ronónha, tánon ní꞉se tashé꞉ion thóh rontsá꞉nakes, skátne ne rontinontí꞉ios tánon nonkwehokóns ne tsi ionhontsá꞉ien thóh nihatí꞉iere tsi nenhthatinón꞉weʼne.

²⁵ Tánon wahontiaʼtakweʼní꞉ioste ne tsi kanatowá꞉nens tánon ne tekenstenró꞉tons watenhenráien kwáh tiohontsí꞉ios tánon wahontiaʼtakweʼní꞉ioste ne tsi kanónshote ne titkáhere ioiá꞉neres tánon skátne nonawerashón꞉as, tsi kanenharaientóhseron tánon ne iakeiewátha karontaʼshón꞉as tánon ne wahiaienthóhserons tsi nihiawetowá꞉nen. Tánon wahón꞉neke tánon kwáh wahoná꞉tahne tánon wahonréhsen tánon tsi nahonerienhtí꞉io thóh tsi nateiotenonhianí꞉ton tisarihwaié꞉ri.

²⁶ “Ók iáh tehontewenhnaráhkwa tánon rotinontsistahní꞉ron tsi nokwáh ní꞉se tánon í꞉se iehonátses ne sahianerénhsera thóh ratishón꞉ne tánon sakotinonwarhiaʼkhónhnion s rotitokenséhakwe né꞉ne ronónha rotirihwaní꞉raton tsi nokwáh ne ronónha ne nahónton tahonsahontkarahté꞉ni isé꞉ke niahonsahón꞉ne tánon tsi nihonahtié꞉ren kowá꞉nen rotirihwaiesá꞉ton.

²⁷ Ne kíʼwakarihón꞉ni ní꞉se iashehiatsakwaríhsi rononhà꞉ke ne ronwatí꞉shons tánon wahonwatironhiá꞉kente. Tánon thóh tsi tahonhnikónhraren, iathonséntho shonhà꞉ke tánon ní꞉se washehiathón꞉teʼne thóh nón꞉we ne tsi karonhiá꞉tes; tánon ne tahiohianénhawe ne sáwenk atahniténhron ní꞉se tsahshé꞉ion ne sakohiatáhkwas raónha sakonónstahton thóh ronhtsá꞉nakes ne ronwatí꞉shons.

²⁸ Ók nó꞉nen shiateshotiwisaiewenhtáhon, ne sahonterihwathentsá꞉te ne karihwahétken ne sahénton, káti washehiatewenhtéthe thóh rontsá꞉nakes ne ronwatí꞉shons tánon ne washakotiianerenhserónhnien; ók nó꞉nen sathonsahontkaraté꞉ni tánon iathonséntho shonhà꞉ke, washehiaʼthónhtene thóh tsi karonhiá꞉tes tánon shasehnónsthate wé꞉so iorihwá꞉kes thóh sanitenhratsherá꞉kon.

²⁹ Tánon ní꞉se washerehtsá꞉ron ne káti nahónton thóh niahonsahon꞉ne saianerenhserá꞉kon. Ók ronthathónhnikwe tánon iáh teonathahonsatháton ne sarihwataʼtsheras, ók wahatirihwané꞉rake tsi nokwáh ne shatiawenráhsera, tó꞉ka ne rónkwe thóh nenhá꞉iere kwáh kíʼ thóh nón꞉we nenhatonhnhathénti. Wahonswaté꞉ni tánon wahontenontsistaní꞉rahte tánon kwáh iáh teonatahonsatáhton.

³⁰ Asè꞉ken wé꞉so ioserá꞉ke sehiatenikonrí꞉ioston tánon sherihowanhathénhni thóh sanhakwatsherá꞉kon ne rontsá꞉nakes ne rotitokénhse; ne kit sá꞉ka iáh teonathahonsatháton, ne káti aoríhwa ní꞉se tashé꞉ion thóh rontsá꞉nake nonkweshón꞉a ne tsi ionhontsá꞉ien.

³¹ Ók thóh sentenratsherá꞉kon, iáh kíʼ tesheiastáhtion, iáh ó꞉ni tesheiatewenhtéton tiorì꞉wa ní꞉se tsi tisarihwaié꞉ri tánon sanonronkwahtsherá꞉ien Ní꞉io.

³² “Tánon nón꞉wa, ne Ní꞉io, né꞉ne teotenonhianì꞉ton tánon rashátste tánon teotenonhianitonhkó꞉wa Ní꞉io, raónha rohnóns꞉te naterihwasheronhniá꞉tshera tánon torihwaié꞉ri, tó꞉sa ne shón꞉ni ne kenk nakonhà꞉ke ne karonhiakénhsera akwé꞉kon ne karonhiakénhsera ionkwahrá꞉hon, ó꞉ni ne rotirá꞉hon nonkwahnontí꞉ios. Ó꞉ni rotitokénhses, ó꞉ni ne ionkinihó꞉kons tánon rotirá꞉hons ratikwé꞉kon ne shonkweʼtashón꞉as tsi ná꞉he tiotáhsawe shiohnhatenhniseraténionskwe ne rontinontí꞉ioskwe ne Assyria nón꞉we tsi niió꞉re nón꞉wa wenhniserá꞉te.

³³ Ní꞉se tisaieríhton nakwé꞉kon tsi nahonkwahrá꞉ne, asè꞉ken ní꞉se tsi nashá꞉tiere né꞉ne iorihwató꞉ken tsi ná꞉he thóh nihionkwahtié꞉ren ne karihwahetkénhsera.

³⁴ Tánon nonkwahnontí꞉ios, ne ionkihéntenhse, nonkwahtsihénsthatsis, tánon ne ionkinihó꞉kons kwáh nonhné꞉e iáh teonatienawáston ne saianerénhsera khéhs nahonathahonsatháton ne sarihwataʼtsheras tánon tsi nasheronhkáhten né꞉tho theshehiá꞉wi.

³⁵ Iekaní꞉hare ne raotinakerahserá꞉kons tánon ne kowá꞉nen ioiá꞉neres né꞉tho ní꞉se teshehiá꞉wi, tánon thóh tsi natewahtaká꞉ron tánon niohontsí꞉io né꞉tho teshehiá꞉wi, iáh ne í꞉se teiesahiothénse khehs ne tahonsahonatkarahtánion tsi nihatiweienhnátsens.

³⁶ Kén꞉en iá꞉kwes, iakwanhá꞉tshera nón꞉wa wenhniserá꞉te, ionkwahtenhatsherón꞉ni tsi ionwenhtsá꞉te né꞉tho tesheiá꞉wi ne iakhinihokhonkénhens né꞉ne ahiakwáhke tsi nitkhánios tánon ne ioiá꞉neres.

³⁷ Ók ne iokwáts tsi nihiakwaientkwákwas thóh niewé꞉tha rontinontí꞉ioke né꞉ne ronónha thóh shetéron nahionkhiiatenhnikónraren ne aorihwà꞉ke nonkwahrihwaneraháktsheras. Ne thóh tiniarotá꞉ron nonkwahierónhtas tánon nonkwahtshenenhó꞉kons tionhnónskwahrons tsi nenhthatinón꞉wene, tánon tsi nikowá꞉nen tehionkwahnikòn꞉rare.”

Nonkweshónhas Wahontatʼtsénhnare Ateriwaseronhniá꞉tsheras

³⁸ Ne wahkarihón꞉ni akwé꞉kon kí꞉꞉ken tsi nahawénhseron wahatiónhni naterihwasheronhniá꞉tshera tsi onthiá꞉ton, tánon ne ionkhihéntenhse Levites tánon ne ratiʼtsihénstatsis ne wahatinethanenhtákʼthe.