Nehemiah 8 - Ohiatonhseratokénti

¹ Ratikwé꞉kon nonkwehó꞉kons wahonhnitsiokwahró꞉roke skátne tsi ní꞉ioht ne tionkweʼtákhok í꞉ken thóh ne kanatakweʼní꞉ioke thóh ohénton nohnékanos tsi iothenhenrakáronhte tánon wahonwénhase ne Ezra né꞉ne rahiatónskwe, ne nahontaháhawe ne teiothiatonhserakwenónhni ne raoianerénhsera Mahís né꞉ne tsi nisakoná꞉hon ne Roiá꞉ner Nisraeró꞉nonʼs.

² Káti, ne shontonhtenhniseratié꞉rente ne tsá꞉ta khaton shiwenhnitárakwe, ne Ezra, ne ratsihénstatsi í꞉ken, taháhawe ne kaianerénhsera akohénton ne iakokʼkenhní꞉son, tetsá꞉ron né꞉ne ronhnón꞉kwe tánon ne konhnónkwe, tánon tsi nihá꞉kon nenhiekwé꞉ni naiakonikonraién꞉tane; tánon nonkwehokón꞉s wahontahonsáthate kwáh tahionteweién꞉ton ne kaiatonserakwenón꞉ni ne kaianerénhsera.

³ Tánon thóh nón꞉we wahawenhnanó꞉ten ohénton ne kanahthakweʼní꞉ioke nétho né꞉ne ohénton nohnékanos tsi iotenhenraká꞉ronhte, ne noronhkè꞉ne kwáh tsi niió꞉re nénhtie niká꞉re, raotihénton ne ronhnón꞉kwe tánon ne konhnón꞉kwe, tánon tsi niiá꞉kon nenhiekwé꞉ni nahiakoʼnikonraiéntahne; tánon nonkwehokóns wahontahonsáthate kwáh tahionteweién꞉ton tsi nikahorotahkwenón꞉ni ne kaianerénhsera.

⁴ Tánon ne Ezra né꞉ne rahiá꞉tons thóh í꞉rate ne waskwenhnón꞉te né꞉tho ne ionhniá꞉ton ne kí꞉ken aorihwá꞉ke. Tánon ne rahiatáktah, Mattithiah tánon Shema tánon Ananiah tánon Uriah tánon Hilkiah tánon Maaseiah thóh rónhnete saweientethákwen ók ne Pedaiah tánon Mishael tánon Malchijah tánon Hashum tánon Hasbaddanah, Zechariah, Meshullam thóh rónhnete ne sanekwá꞉ti.

⁵ Tánon né꞉ne Ezra wahthahiatonhserakhási thóh akohénton nonkweʼtakwé꞉kon è꞉neken rá꞉rate; tánon nó꞉nenh sahahiahthonseranontónko, onkweʼtakwé꞉kon watié꞉tahne.

⁶ Eʼthò꞉ne ne Ezra wahohiathaté꞉riste ne Roiá꞉ner, né꞉ne tehotenonhianì꞉ton Ní꞉io tánon onkweʼtakwé꞉kon watseriwaʼserá꞉ko, “É꞉ʼtho niiáwenh! Eʼtho niiá꞉wenh!” tánon wahonhnentsakaráhthate tánon wathontsakéhte, ronwashén꞉naiens ne Roiá꞉ner tse hatikonwahró꞉te nonhontsà꞉ke.

⁷ Tánon Jeshua tánon Bani tánon Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, Pelaiah, tánon ne Levites, wahsakotinikonraientháten ne kaianerénhseras nonkwehó꞉kons tsi nikarí꞉wes nonkwehó꞉kons thóh rónhnete tsi nón꞉we nihonhné꞉tons.

⁸ Káti wahatiwenhnanó꞉ten ne kaiatonhserakwenón꞉ni né꞉ne Ní꞉io raoianerénhsera kwáh wahatinikonraiéntahte, tánon tahsakó꞉non ne nahotinikonraiéntaʼne ne káti tsi nihiá꞉kon ne thóh iakokʼkenhní꞉son.

⁹ Eʼthò꞉ne Nehemiah, rahón꞉ha rakó꞉rakwe, tánon Ezra ne ratsihenstowá꞉nenkwe rahiá꞉tonskwe, tánon ne Levites raónha ne sakoʼnikonraienthaténhniskwe nonkweʼó꞉kons washakawénhase ratikwé꞉konʼs nonkwehó꞉kón꞉s, “Ón꞉wa wenhniserá꞉te ne iotokénhtiʼi꞉ken rahonhà꞉ke ne Roiá꞉ner séwah Ní꞉io. Tó꞉sa sewatiónhnion tánon tó꞉sa tesewasénhto; tiorì꞉wa tsi watonsénhtho sahonaʼtónhtene nahowenhnaó꞉kons ne kaianerénhsera.”

¹⁰ Tánon washakawénhase, “Wáhs tánon í꞉sewak ne kakhwáhereh wathenhnikonhró꞉ri tánon sewahnekí꞉ra! Tánon iahetsiiatenié꞉ten ostón꞉ha asè꞉ken ne ronónha iáh ne othé꞉non tehonwatikwahtakwén꞉ni! Asè꞉ken kén꞉en wenhniserá꞉te ne iotokénhti í꞉ken rahonhà꞉ke nón꞉kwa Iá꞉ner. Tánon tó꞉sa sewaktiónhnion, asè꞉ken ne raotsenhnonhniá꞉tshera ne Roiá꞉ner né꞉ne sewá꞉wenk iothenhenraní꞉ron í꞉ken.”

¹¹ Tánon ne Levite sak washakahón꞉ni ratikwé꞉kon nonkwehó꞉kons ratónhionʼs, “Tahtesewathó꞉tat! Asè꞉ken ón꞉wa wenhniserá꞉te ne iotokénti í꞉ken tánon ní꞉se kwáh ensewanikonrát꞉sen.”

¹² Eʼthò꞉ne ratikwé꞉kons nonkwehó꞉kons iahónhne tánon watonskáhon tánon wahatinekí꞉ra tánon iahonwanateʼnié꞉ten ostón꞉ha tánon wahonteʼnikonhró꞉ri, tiorì꞉wa tsi wahotinikonraién꞉tahne nowenhnashónhas tsi nahonwanaronhká꞉then ne ronónha.

Ne kanonhweratónhtsera ne Waskwakarenre

¹³ Ne tekenihá꞉ton siwenhniserá꞉tekwe, ne sakotihenténhses ne kaní꞉seras ó꞉ni onhkweʼtakwé꞉kons, ne ratitsihénstatsis ó꞉ni ne Levites skátne wahonhnitiokwahró꞉roke ne Ezra né꞉ne sakohiatón꞉nis, ne nahotinikonraién꞉tahne naowenhnaʼshón꞉as ne kaianerénhsera.

¹⁴ Tánon wahatiʼtshénhri kahiá꞉ton thóh kaianerenhserá꞉kon, tsi niká꞉ien ne Roiá꞉ner thó꞉wi ne Mahís, né꞉tho ne sakotiioʼokón꞉ahs Nisraeró꞉nonʼs kwáh thóh enhatiʼterón꞉take ne tsi waskwahkarénhres tsi nikarí꞉wes wateʼnikonhró꞉ri ne tsatá꞉khaton wenhnì꞉tare.

¹⁵ Tánon né꞉tho aó꞉wenk nahontró꞉ri nahó꞉ten aorì꞉wa tsi tahonré꞉ni kí꞉ken owén꞉na thóh ne akwé꞉kons ne raotinatahshón꞉ahs tánon ne Jerusalem tsi watón꞉nions, “Wáhs thóh niahá꞉se ne tsi ionontahrónhnions tánon tatʼsaf onerahtaʼshón꞉ahs ne iakeniewáhthas tánon ne karakónhas iakeniewáhthas tánon ne karonhtaʼshón꞉as ne iotenerathákate tánon ne ioneratésons tánon noiáhsons ioneratóntons keríhtons ne nahionhnihá꞉ke ne waskwakarénhres tsi kiʼnikaiá꞉ton.”

¹⁶ Káti nonkwehó꞉kóns iahehiá꞉kenhne tánon tahieháhseron tánon wahakonhniánion ne waskwahkarénhre ne ronónha raotirihwà꞉ke, kwáh tsi niatehá꞉ti ne ronhnónkwe tsi rotihiò꞉te ne rahoʼnhoronhkwená꞉kes ne tsi ronónhshote tánon ne raotenhenrákons, tánon ne raothenhenrákon ne tsi ronónhshote ne Ní꞉io, tánon ne kanatakweʼní꞉ioke ne ohnékanos tsi iothenhenrakáronhte tánon ne kanatakwení꞉ioke ne Ephraimke iothenhenrakáronhte.

¹⁷ Tánon ratikwé꞉kon ne ronatkenhní꞉son, né꞉ne tsi niká꞉ien shó꞉ti ne ronhwanahnakerakwáhton, wahonhnonhniá꞉nion ne waskwahkarénhres. Tánon thóh wahóntien tsi waskwahkarénhres asè꞉ken iáh é꞉tho tehotí꞉iere tsi ná꞉he thóh tenhniseraténionskwe ne Joshua, né꞉ne roʼiénha ne Nun tánon né꞉ne kowá꞉nen tsi wahontonhnarónhnion.

¹⁸ Káti wahawenhnanhóten ne tehiothiatonhserakwenón꞉ni ne raoianerénhsera ne Ní꞉io kwáh niatewenhniserá꞉ke, Tánon wahonterihwathentsáte ne watenikonhró꞉ri né꞉ne tsá꞉ta nón꞉ta niwenhniserá꞉kes tánon ne shatekonhá꞉ton siwenhniserakéhaton, né꞉ne iotokénti tsi ní꞉ioht tsi wahontkenhní꞉sa, tsi thóh nikarihó꞉ten.