Nehemiah 6 - Ohiatonhseratokénti

Ronwateristaiénhni ne Nehemiah

¹ Nó꞉nen shón꞉terihowanate rahonháke ne Sanballat tánon ne Tobiah tánon ne Geshem ne Arab, tánon ne ronatiá꞉kes ne ionkhisónʼs, nètho tsi sewaká꞉sonhtonhni tánon neh nón꞉we iáh ká꞉neka thatetió꞉rihwenhte; ók iáh ki arehkho tesewakenohanihiontón꞉nion ne tsi iothenhenrakarontes;

² Ne Sanballat tánon ne Geshem tahonwanatori nakonhá꞉ke iatonhnionʼs, “Káts, ahion tewák꞉kenhnisa skát꞉ne tho kanatakon ne tsi niahonrakwaièn ne Ono.” Ók ronatenikonrón꞉nihatseskwe ne karihwahét꞉ken tsi nahiontierase.

³ Káti iakhehiá꞉teniete ratirihwakarénies ronón꞉hake rontón꞉nionʼs, “Ne wakaterihwathentsiá꞉ton ne kahiotenhseró꞉wanen, tánon iáh tatkweʼni neh tho iá꞉ke. Nontié꞉ren ne kahiothensera tsi taká꞉tahne, tsi nikaríhwes tionhake nienwakenon?”

⁴ Tánon tahionkatenieten ki ken owenhnasón꞉ʼahs kaiéri niahonteratste, tánon wá꞉tekherihwaserakwahse kwa neh saowenhna

⁵ Eʼthó꞉ne ne Sanballat tahó꞉teniete raonhá꞉tshera nakonhá꞉ke nó꞉nen wísk khaton niaká꞉ièn꞉te ne kahiatonsera teká꞉takwarihton ratsá꞉nake,

⁶ tsi niká꞉hiaton nètho, “Tsi niká꞉rihowanaton ronón꞉hake nonkweʼshón꞉ʼahs—tánon ne Geshem kwáh ó꞉ni watons—nètho ní꞉se tánon ne ratishí꞉taʼehró꞉nons tsi sewatenikonrón꞉nis nahí꞉sewatenontsistatʼsate; neh ki ahó꞉rihwa tsi sewahsón꞉tonhnis, tánon ne ahontahiohianenhawe ki kenʼs owenhnaokonʼs tsi nisaská꞉neks asatenonhtí꞉ioste.

⁷ Tánon ní꞉se kwáh ó꞉ni tho shé꞉teron ne rotitó꞉kenhse nahiesarihó꞉wanahten tho nón꞉we Jerusalem, rontonhnionʼs, ‘Kanontí꞉iotsheraièn ne Judah.’ Ó꞉nen ki kwáh enhonwahrihó꞉wanahthen ne ronnontí꞉io neh entió꞉hianenhawe ki ken owenhnasón꞉ʼahs. Káts ká꞉ti ó꞉nen tánon tetewahthá꞉ren skát꞉ne.”

⁸ Káti iahí꞉hiateniethen, watonhnionʼs, “Nètho kwáh iáh othènen tho tehiót tsi nisatonhnionʼs; thí꞉serihonhni tsi nisanontón꞉nionʼs!”

⁹ Aseʼken ratikwé꞉kon wahón꞉khiionhnien nahionkwahterón꞉ne, rontón꞉nionʼs, “Ne rontsá꞉nakes kwáh kíʼ enhiotsiiohá꞉ne tsi nòkwah ne raotiiotensera tánon iáh thóh thá꞉iawenhne.” Ó꞉nenh kíʼseshaststenseron ne katsá꞉nake.

¹⁰ Eʼthó꞉ne thóh iahá꞉ke tsi tho nón꞉shote ne Shemaiah, nene roʼiénha ne Delaiah, nene roiénha ne Mehetabel ne rahón꞉ha ronwanhó꞉tonhkwe, tánon wahénron, “Ahnion thóh tewát꞉kenhnisa tsi ronón꞉shote ne Rawenni꞉io, kanónskon nononsató꞉kentikowane, tánon ahnion tewá꞉nienhtharók꞉konʼs tsi ionón꞉karontonʼs nononsató꞉kentikowa; aseʼken tahón꞉ne nahiesahnón꞉warhiakon, enhió꞉karahwe kwáh entón꞉ne nahiesanonwarhiá꞉kon!”

¹¹ Ók tsi niwaton, “Teiotonhontsohon ken ne rón꞉kwe tsi ní꞉ioht ní꞉i nahateko? Tánon teiotonhontsohon ken ne rón꞉kwe tsi ní꞉ioht ní꞉i niahatawehiá꞉te nonnonsató꞉kentikowane nahanónstahte tsi rón꞉nhene? Kwáh kíʼiáh tiá꞉katahwehiate!”

¹² Tánon sát꞉kato, Iatsienterehne nètho tsi iáh Rawenni꞉io tethotenieton, ók nètho tsi neh rotahrá꞉kwen ne iekarihwá꞉ken nahionkát꞉konten aseʼken Tobiah tánon Sanballat ronhwá꞉nhahon.

¹³ Neh ronwá꞉nhaton ne káti nahónt꞉teronhne tánon akerihwá꞉nerahke tánon ne akón꞉ni nahont꞉senhnaksenhne ne ronón꞉hake ne káti ne ronón꞉ha nontierent ahiont꞉senhnatsate.

¹⁴ Sehiarák, akeNí꞉io, ne Tobiah tánon ne Sanballat, neh nisehre tsi nihó꞉tihiotenhseró꞉tens tánon ó꞉ni ne Noadiah ne iotó꞉kenhse tánon notsá꞉kes ne rotitó꞉kenhse ronón꞉ha wahá꞉tirihwakwé꞉ni nahonterón꞉ne.

Tsi niahontéhsa ne Raoioténhsera

¹⁵ Káti wísk-niwásen tekeni niwenhniserake nasón꞉ta iahón꞉tesa, nene tewásen-wísk siwenhniserakehaton ne Elul siwenhnitarakwe.

¹⁶ Tánon nó꞉nenh ratikwé꞉kon ne ionkhisonʼs wahatirihwarón꞉ke kí ken, ratikwé꞉kon nonkweʼshón꞉ʼahs ne iakwahiatattón꞉tses wahónt꞉kato ki ken, iáh thateshonthaterenssarons; aseʼken ronaterientarakwe nètho ki ken kahiothensera tsi nikahiothenhen ne tsi onhkwah ní꞉io rahón꞉ha rohiothenhen.

¹⁷ Kwáh ó꞉ni neh tho tewenhniseratenionkwe, ne ratisennhó꞉wahnens ne Judah nón꞉we iehonwateniethenhni wé꞉so kahiatónhsera ne Tobiah, tánon ne Tobiah raohiatonhsera rotiienahon.

¹⁸ Aseʼken iakotió꞉kowanen ne Judah tsi iakorihwaniraton ne rahonháke, tsió꞉rihwa tsi ne rawehnón꞉sa í꞉ken ne Shecaniah, nene roʼiénha ne Arah, tánon neh ró꞉ièn꞉ha ne Jehohanan, nene rotiniakon ne Meshullam sakoʼièn꞉ha, nene roʼiénha ne Berechiah.

¹⁹ Ne ronón꞉ha kwáh ó꞉ni neh ronwathará꞉kwen ne raotiní꞉io rahó꞉hiothenseras natkenton tánon wahonwahró꞉ri nakewenhnasonhas. Tánon tahát꞉hiatonhserateniethanion nahát꞉teronhkwens.