Nehemiah 4 - Ohiatonhseratokénti

Nehemiah Iatarénhnate tsi nihonwariwakénhni ne Raoioténhsera

¹ Nó꞉nen ne Sanballat waharihwáronhke tsi tionwakwahtakwenhátie ne tsi tewasón꞉tote, wahoʼnhákwen tánon kwáh í꞉ken tsi wahatatenakónhni tánon kaierónhsera washakahónhni ne né꞉tho Sitaeró꞉nons.

² Tánon wahénron rahotihénton ne thonatenró꞉hon tánon ne ronterí꞉ios ne Samaria, “Onhnahó꞉ten ki꞉kenʼs iáh othé꞉nen tehatístas ratishiʼtaehró꞉nons tsi nihontié꞉rah? Kwáh ken ronónha ensatikwathakwenháton ne raonawenhshón꞉as? Kwáh ken tsiknahó꞉ten akénhake nahontahatí꞉ieste? Kwáh ken enhatísa ne sewenhniserákhok? Kwáh ken ahonsahonhnónnhete nononwenhsera ne tsi nihiotonhióte ne iáh othé꞉nen teskarihwástha ne tsi nahó꞉ten ne ioté꞉ken?”

³ Tánon ne Tobiah né꞉ne Ammonró꞉non rahónha ne rahiatákta ratákwe, wahèn꞉ron, “Nosténra ronathenhenronhnihátie ne rononhnihátie Shé꞉kon ki ne tsístso thóh iaharát꞉ten kwáh kíʼ thewaréni!”

⁴ “Takwahtahónsatat, O onkwaní꞉io asè꞉ken thihionkhiié꞉ron; thonsaskaraté꞉ni tsi natehionkhihiatkaronhtsheséronʼs ahion akorénhsons thóh nihonwatiiéras, tánon iehonwatiiathénhaf ne tsi tionhontsá꞉ien ne ronwatiié꞉nas.

⁵ Tó꞉sa seró꞉rok ne raotirihwaneráhtshera tánon tó꞉sa serákef ne raotirihwaneraháktshera ne sahénton, asè꞉ken ronwatinikonratʼsáton ne rotihióte.”

⁶ Káti iahakwahthasónhteren sahiakwahtenhenrónhni nosténra tánon neh tekenítken ne ashénhnon tsi nitiót꞉te; nonkweshón꞉as thóh tinikonrakontákwen niakashón꞉ke.

⁷ Nó꞉ne ne Sanballat tánon Tobiah tánon ne Arabiaró꞉nons tánon ne Ammonró꞉nons tánon ne Ashdodró꞉nons wahatirihwáronhke né꞉tho ne tsi shonatenhenronhnihátie nosténhra ne Jerusalem ne tsi iosontakáronte tionahnonhátie kwáh í꞉ken tsi wahotinhá꞉kwen.

⁸ Káti kwáh ratikwé꞉kon tsi wahonhtenhnikonhrónhni skátne tsi ahontahónne niakonwatsatónhti Jerusalem tánon tahonhnithonhniáte.

⁹ Ók onh kwáh Ní꞉ioke iahakwaterén꞉naien tánon watsiatʼkhitatste nahontenhnikónhrare tsi niwenhniserésons ó꞉ni tsi niwasónhtesons.

¹⁰ Tánon ne Judah, “Wahénron rahotishatsténhsera ne rotiriehniákete wahontesastenserók꞉ten, tánon tsi niwé꞉so nononwénhsera tehiotháron iáh tahónton nahonsetewasonhtón꞉ni.”

¹¹ Tánon ne ionkhísons wahonhní꞉ron “kwáh iáh tahonaterienʼtá꞉rane, khéhs nahontkáto tsi niió꞉re iatenhietihiatónko tánon enietinonwariá꞉kon tánon ne entionhniáte ne raotiioténhsera taká꞉tahne.”

¹² Nó꞉nen ne shiʼtaéhró꞉nons ne thóh ákta ratinákere ronónha tahón꞉ne tánon wahonkhiièn꞉hase oié꞉ri niioríhwake, “Tsi nonwéhsons nisewanákeres ní꞉se kwáh khi tentísewe nontionháke.”

¹³ Káti ne eʼtà꞉ke í꞉kens noná꞉ke ne tsi tewasónthote tánon ne tsi nón꞉we ne teiotskaráwens thóh wahkhéteron ne rahotiwá꞉tsires, skátne ne raonasarekó꞉was, ne raonashí꞉kwaras tánon ne raotihénnas.

¹⁴ Eʼthó꞉ne iakatkáto tánon watettane tánon wahiién꞉hase ne rasennowá꞉nen tánon ne ratikoráhsons tánon ne ronátiaʼkes nonkweshón꞉as, “Tó꞉sa ietsittsánitsek. Tsi sewehiá꞉rak ne teotenonhianì꞉ton tánon rohiatanerákwat Roiá꞉ner, Tánon ietsiiaterí꞉ios ne sewathatekenokónhas tánon ne sewanekenteronhtsherashón꞉as tánon ne ietsiioʼokónhas tsonattonwí꞉sens tánon ne sewaniátkons tánon ne tsi sewanonshó꞉tons.”

¹⁵ Nó꞉nen ne ionkhí꞉sons sahatirihwá꞉ronhke tsi ionkwahrihwá꞉ronhke tánon né꞉tho Rawenni꞉io tsi tehoríhton tsi nihonateʼnikonrón꞉nikwe, tewakwé꞉kon thóh nientsí꞉tewe tsi tewasón꞉thote, satiiatatʼtions ne ronhnónkwe thóh niensón꞉ne tsi thóh tiiotenserhó꞉tenhne.

¹⁶ Thóh wenhniserátekwe, ashén꞉non nakonkweʼtashón꞉as thóh rotiiotén꞉en tsi nihonthasontonhníhakwe, tsi ná꞉he ne rohnatiá꞉kes rotiienawákons ne otsikwáras tánon ne teioniatastákwa ne ronatʼtieronhniáton ne ionteriiostháhkwa; tánon ne shakotihentenhse oná꞉ken ne tsi kanonshó꞉tons ne Judah wahontatiteron.

¹⁷ Tsi nihá꞉ti ne shontonsónhniskwe tánon tsi nihá꞉ti né꞉ne rotikete nononwénhseras, satinentʼtsakaríhti khók rotikarenonhátie norié꞉nia tánon ne satínents kakará꞉ti né꞉ne rotiienawá꞉kon notshikwára.

¹⁸ Satihiatatʼtions ne ronshontónhnis ne rahotishikwáras thóh kawanéren tsi ronatsathánen tsi ná꞉he rotihiò꞉te. Tánon tsi niká꞉ien ne rathatístha ne iehonrawátsta tsatákta ne í꞉res.

¹⁹ Tánon wahiiénhase ne rasenhnowá꞉nen tánon ne rakó꞉ra tánon ne ronátiaʼkes nonkweshón꞉as, “ne kahioʼténhsera kwáh í꞉ken tsi kahiotenserowá꞉nen tánon tehioréhnion; tánon kwáh í꞉ken tsi ahí꞉non natehiakwátere.

²⁰ Skátne sewáton tsi nón꞉we nenhsewathón꞉tene ne iehonrawatstháhkwa, tánon nónkwa ní꞉io rahón꞉ha enshonkwaterí꞉iose.”

²¹ Káti wahakwathatsió꞉tenste tánon satekanenhrí꞉hen ratishikwarénhawe kwáh tsi nathentsioswát꞉tene kwáh tsi ienskarakwénhne.

²² Eʼthó shikahá꞉wikwe Kwáh ó꞉ni wakheién꞉hase nonkweshón꞉as, “Áhion kwáh tsi niatehionkwè꞉take tánon tsi niháti ne raonhá꞉tsera thóh rasontí꞉iat Jerusalem nón꞉we, ne káti nahionkhiiatenhnikónraren tánon tsi niwasón꞉tes tánon nahionkwahiò꞉ten ne tsi niwenhníseres.”

²³ Tánon khéhs ní꞉i khéhs ne iatiathatekénha khéhs nakenátsera khéhs ne rakenikónhrare ronhnón꞉ha ne tionkwatswanónhne iáh nonwénton tehionkwatieronhniáshion, kwáh iekaníhare iehatiháskwe ne ronteriiotháhkwa nó꞉nen enhontawénha.